ოქიტაშვილი - ჩემი დიდი პატივისცემა ქალბატონ ნინო ანანიაშვილს, სხვადასხვანაირად აიტაცეს ჩემი ნათქვამი
მე არ მითქვამს, რომ ნინო ანანიაშვილი ოპერიდან უნდა წავიდეს ან გამოაგდონ, როგორც ჩანს, სხვადასხვა საიტებმა სხვადასხვანაირად აიტაცეს ჩემი ნათქვამი, - ამის შესახებ "პალიტრანიუსის" გადაცემაში "360 გრადუსი" კულტურის პალატის თავმჯდომარემ დავით ოქიტაშვილმა განაცხადა. მისი თქმით, ნინო ანანიაშვილთან მიმართებით მას უარყოფითი განცხადება არ გაუკეთებია და მედიას არასწორი ინფორმაციის გავრცელებაში ადანაშაულებს.
"მინდა ბოდიში მოვუხადო მკითხველს, მსმენელს, რადგან სხვადასხვა საიტებმა სხვადასხვანაირად აიტაცეს და ისე გამოიტანეს სათაურში, რაც უნდოდათ. ჩემი ძალიან დიდი პატივისცემა ქალბატონ ნინო ანანიაშვილს, მან ბევრი რამ გააკეთა ქვეყნისთვის და თავისი სფეროსთვის.
ჟურნალისტმა დამისვა შეკითხვა, ბატონო დავით, ქალბატონი ნინოს მეუღლე, რომელიც ამ ხელისუფლების დამხობას მოითხოვს, რომ ეს ხელისუფლება არის კრიმინალების, შეიძლება, რომ ასეთ თანამდებობაზე იყოს ნინო ანანიაშვილი და მათგან იღებდეს ხელფასს? რაზეც ვუპასუხე, რომ ეს არის ძალიან ცუდი. თუ ხელისუფლება არის კრიმინალი, თუ ხელისუფლება არის დასამხობი და მისი მეუღლე ამას იძახის, მაშინ ის ამ განცხადებას უნდა გაემიჯნოს. ღმერთმა დამიფაროს, მე არ მითქვამს, რომ ნინო ანანიაშვილი ოპერიდან უნდა წავიდეს ან გამოაგდონ", - განაცხადა დავით ოქიტაშვილმა.
დავით ოქიტაშვილმა დღეს გამართულ პრესკონფერენციაზე განაცხადა, რომ დაიწყებს პერმანენტულ აქციებს, რათა ოპერა გათავისუფლდეს ვაშაძეებისა და ანანიაშვილების კლანისგან. მისი თქმით, ოპერის საბალეტო დასს არ უნდა ხელმძღვანელობდეს ნინო ანანიაშვილი, რადგან მისი მეუღლე გრიგოლ ვაშაძე„ქვეყნის მოსახლეობას ხელისუფლების დამხობისკენ მოუწოდებს“.
"კრიზისული მდგომარეობაა ოპერაში შექმნილი. ოპერის საბალეტო დასს ხელმძღვანელობს ადამიანის მეუღლე, რომელიც საქართველოს მოსახლეობას მოუწოდებს დაამხოს ეს ხელისუფლება; საქართველოს მთავრობას კრიმინალებს ეძახის, ბიძინა ივანიშვილს – ნარკობარიგას. მე მივმართავ ქალბატონ ნინო ანანიაშვილს, ის ან გამოვიდეს და გაემიჯნოს და თქვას, რომ არ ეთანხმება მისი მეუღლის განცხადებებს, ან გადადგეს, რადგან ასე არ შეიძლება. ყველა ქვეყანაში ოპერა ქვეყნის სავიზიტო ბარათია", – განაცხადა დავით ოქიტაშვილმა დღეს გამართულ პრესკონფერენციაზე.
VIDEO: "უხერხულია, როდესაც მისი მეუღლე და ოჯახის წევრი ითხოვს ამ ხელისუფლების დამხობას"
შეძლებს თუ არა ილია მეორე უხემძღვანელოს წმინდა სინოდის სხდომას - რა კომენტარს აკეთებს ექიმი პატრიარქის ჯანმრთელობაზე
ისრაელის საელჩო საქართველოში დღეიდან არ იმუშავებს
