"ოთხი წელი ელოდა მოსავალს... 128 ხე გაჩეხილი დახვდა" - გაუგონარი ფაქტი გორში

საქართველოს ფერმერთა ასოციაციის თავმჯდომარე ნინო ზამბახიძე გორში მომხდარი გაუგონარი ფაქტის შესახებ წერს. ზამბახიძე ვაშლის ბაღში გადაღებულ ფოტოებს ავრცელებს, რომელზეც მოჭრილი ხეებია ასახული და წერს:

"ასეთი ვაშლის ხე ქონდა ერთ ფერმერს გორში...

მივიდა და დახვდა 128 ხე გაჩეხილი. მგონია რომ, ამის გამკეთებელი არის ნაძირალა და მეტი არაფერი! ეს კაცი 4 წელი ელოდა მოსავალს და მსხმოიარობაში რომ შევიდა ხე, გაუჩეხეს. ამის გამკეთებელი მერე სადღეგრძელოს დალევს შვილების, ოჯახის და ქართველობის!" - წერს ზამბახიძე და ინციდენტის ამსახველ ფოტოებს ავრცელებს.

მისივე ინფორმაციით, ჯერჯერობით დამნაშავის ვინაობის დადგენა ჭირს, რადგან გაშენებული ბაღები სოფლიდან ძალიან დაშორებულია და ფაქტის თვითმხილველის მოძებნა გაჭირდება.

როგორც Ambebi.ge-ს შინაგან საქმეთა სამინისტროში აცხადებენ, მომხდარზე გამოძიება სსკ-ის 187-ე მუხლის პირველი ნაწილით მიმდინარეობს, რაც სხვისი ნივთის დაზიანებას გულისხმობს.