"მთელი ოჯახი გაანადგურე" - კაცს, რომელმაც ცოლი და სიდედრი მოკლა, სამუდამო პატიმრობა მიუსაჯეს

მამაკაცს, რომელმაც საყვარელი ქალისა და მისი დედის სასტიკი მკვლელობა აღიარა, სამუდამო პატიმრობა მიესაჯა. ინფორმაციას BBC ავრცელებს.

49 წლის ხაოლა სალიმი და 22 წლის რანიმ უდეჰი ინგლისში, სალიმის სახლის წინ 27 აგვისტოს მოკლეს. უდეჰი 21 წლის ჯანბაზ ტარინზე იყო დაქორწინებული, თუმცა მას შემდეგ, რაც აღმოაჩინა, რომ ტარინს ავღანეთში სხვა ცოლ-შვილი ჰყავდა, ქმარს დაშორდა.

ჯანბაზი მთელი დღის განმავლობაში უთვალთვალებდა უდეჰსა და დედამისს და როდესაც მათ თავს დაესხა, სალიმი ტელეფონზე პოლიციას ესაუბრებოდა. მკვლელი მიიმალა, თუმცა სამი დღის შემდეგ ტარინი დააკავეს.

სასამართლო სხდომაზე ჯანბაზმა მკვლელობა აღიარა. მას სამუდამო პატიმრობა მიუსაჯეს.

სალიმის დამ, ნურ ნორისმა სხდომაზე მკვლელს მიმართა:

„როდესაც ჩემი და შვილს დასაცავად გადაეფარა, მას დანა დაარტყი, რანიმი კი ამ დროს ძირს ეგდო და ფეხით გეჭირა, ძირს დაათრევდი. შენ მთელი ოჯახი გაანადგურე“.

მოსამართლემ კი აღნიშნა, რომ მკვლელი ამის შემდეგ კვლავ რანიმს მიუბრუნდა, მკერდის არეში ორი სასიკვდილო ჭრილობა მიაყენა და ადგილიდან მიიმალა.

პოლიციის განცხადებით, ეს იყო ორი დაუცველი ქალის სასტიკი მკვლელობა.

ტარინმა და უდეჰმა ერთმანეთი კოლეჯში გაიცნეს და 2016 წელს ისლამური ცერემონიით დაქორწინდნენ. მათ ქორწინებას დიდი ბრიტანეთის კანონმდებლობა არ ცნობდა.

უდეჰს წინა ქორწინებიდან 2 წლის შვილი ჰყავდა, რანიმი და დედამისი სირიაში დაიბადნენ.

მას შემდეგ, რაც ქალმა შეიტყო, რომ მის ქმარს ავღანეთში ცოლი და შვილები ჰყავდა, ტარინი მიატოვა. რამდენიმე კვირაში კი ჯანბაზმა ქალი და დედამისი მოკლა.

რანიმზე ტარინი ერთად ცხოვრების პერიოდშიც ძალადობდა ფიზიკურად, დაშორების შემდეგ კი მუქარას აგრძელებდა. რანიმმა თავის დასაცავად პოლიციას მიმართა, სამართალდამცველებმა მის წინააღმდეგ შემაკავებელი ორდერი გასცეს. მკვლელობის დღეს, თავდასხმამდე პოლიციაში უდეჰის სამი ზარი შევიდა.

რანიმის შვილზე მზრუნველობა ახლა მისმა დეიდამ აიღო. ნორისის თქმით, დაქორწინების შემდეგ პირველი 6 თვე რანიმი საკუთარ მძიმე მდგომარეობას მალავდა.

„ტარინი ეუბნებოდა, რომ თუ ცოლი მიატოვებდა, მას და მისი ოჯახის წევრებს დახოცავდა. ერთ დღეს რანიმმა მითხრა - „დეიდა, მგონია, რომ ჩემი სიცოცხლე მალე დამთავრდება“ - იხსენებს ნორისი.

მოსამართლე მოკლულ უდეჰს ახასიათებს როგორც „განათლებულ, დამოუკიდებელ ქალს“, რომელიც კოლეჯში სწავლის პარალელურად ზრუნვას არ აკლებდა პატარა შვილს, რომელიც მას ძალიან უყვარდა.

მისი დედა კი, სალიმი, მოსამართლის თქმით, „შესანიშნავი ქალი იყო, რომელსაც კარგად იცნობდა ყველა. ის მუდმივად ეხმარებოდა უსახლკაროებს და გაჭირვებულებს“.