ბიძინა ივანიშვილი სალომე ზურაბიშვილის ინაუგურაციას არ დასწრებია

"ქართული ოცნების" თავმჯდომარე ბიძინა ივანიშვილი თელავში, საქართველოს მეხუთე პრეზიდენტის სალომე ზურაბიშვილის ინაუგურაციას არ ესწრება. ამის მიზეზი სავარაუდოდ ის არის, რომ რამდენიმე დღის წინ ექსპრემიერის დედა, ციცინო ივანიშვილი გარდაიცვალა და დაკრძალვა გუშინ იყო.

ფიცის დადების ცერემონია თელავში, "ბატონის სასახლეში" ცოტა ხნის წინ დასრულდა. ცერემონიალში მონაწილეობა მსოფლიოს 55-მდე ქვეყნის 150-მდე წარმომადგენელმა მიიღო. მათ შორის იყვნენ, მაღალი რანგის სტუმრები 20-ზე მეტი ქვეყნიდან, ასევე 16 საერთაშორისო ორგანიზაციის წარმომადგენელი.

საქართველოს მეხუთე პრეზიდენტი ინაუგურაციის ცერემონიაზე საქართველოს დროშის ფერებში წარსდგა. ზურაბიშვილს თეთრი და წითელი ფერების სამეული აცვია. სასახლემდე არჩეული პრეზიდენტი ავტომანქანით მიიყვანეს, წითელ ხალიჩასთან ის შვილებმა - თეიმურაზ და ქეთევან გორჯესტანებმა მიაცილეს.