როგორ გამოიყურება სალომე ზურაბიშვილი ინაუგურაციაზე - პირველი კადრები

თელავში, ერეკლე მეფის სასახლეში მიმდინარე ინაუგურაციის ცერემონიაზე, არჩეული პრეზიდენტი სალომე ზურაბიშვილი საქართველოს დროშის ფერებში წარსდგა. ზურაბიშვილს თეთრი და წითელი ფერების სამეული აცვია. სასახლემდე არჩეული პრეზიდენტი ავტომანქანით მიიყვანეს, წითელ ხალიჩასთან ის შვილებმა - თეიმურაზ და ქეთევან გორჯესტანებმა მიაცილეს.

როგორც AMBEBI.GE-სთვის გახდა ცნობილი, ზურაბიშვილის ჩაცმულობაზე საფრანგეთში მოღვაწე ქართველმა დიზაინერმა ჯაბა დიასამიძემ იზრუნა. დიასამიძე მაკა ასათიანის საყვარელი დიზაინერია და ბარსელონაში მისი მაღაზიის Darial-ის კრეატიული დირექტორი. ისევე როგორც სალომე ზურაბიშვილი, ჯაბა დიასამიძეც საფრანგეთში, ემიგრაციაში გაიზარდა და მათ ერთმანეთი სწორედ იქ გაიცნეს.

ახალარჩეული პრეზიდენტის მიერ ფიცის დადებისთანავე უფლებამოსილება შეუწყდა გიორგი მარგველაშვილს.

იხილეთ ვიდეო: როგორ გამოუყურებიან სალომე ზურაბიშვილი და მისი შვილები ინაუგურაციაზე - ყველაზე ემოციური წუთები ღონისძიებიდან

კონსტიტუციის თანახმად, სახელმწიფოს მეთაურის თანამდებობის დაკავების წინ სალომე ზურაბიშვილმა დადო ფიცი: - მე, საქართველოს პრეზიდენტი, ღვთისა და ერის წინაშე ვაცხადებ, რომ დავიცავ საქართველოს კონსტიტუციას, ქვეყნის დამოუკიდებლობას, ერთიანობასა და განუყოფლობას, კეთილსინდისიერად აღვასრულებ პრეზიდენტის მოვალეობას, ვიზრუნებ ჩემი ქვეყნის მოქალაქეთა უსაფრთხოებისა და კეთილდღეობისათვის, ჩემი ხალხისა და მამულის აღორძინებისა და ძლევამოსილებისათვის".

ცერემონიას მსოფლიოს 55-მდე ქვეყნის 150-მდე წარმომადგენელი ესწრება, მათ შორის არიან მაღალი რანგის სტუმრები 20-ზე მეტი ქვეყნიდან, ასევე 16 საერთაშორისო ორგანიზაციის წარმომადგენელი.