სალომე ზურაბიშვილს ინაუგურაციაზე აცმევს დიზაინერი, რომელიც კაბებს ნატალია ვოდიანოვას და ადრიანა ლიმას უკერავს

რამდენიმე საათში საქართველოს პირველი ქალი პრეზიდენტი ეყოლება. საფრანგეთში ემიგრაციაში დაბადებული სალომე ზურაბიშვილი თავდაპირველად საფრანგეთის სრულუფლებიანი ელჩი იყო საქართველოში, შემდეგ მიხეილ სააკაშვილის ხელისუფლებაში საგარეო საქმეთა მინისტრის პოსტს იკავებდა, მოგვიანებით მის ოპოზიციაში წავიდა და საზოგადოებას თავი მიტინგებზე დამახასიათებელი გამონათქვამებით დაამახსოვრა...

მას ყოველთვის მიიჩნევდნენ გემოვნებიან პოლიტიკოსად და სამართლიანადაც - მიდი კაბები და ქვედაბოლოები, პიჯაკები, მკვეთრი ფერები, მასიური საყურეები და აქსესუარები ზურაბიშვილს ყოველთვის გამოარჩევდა სხვა პოლიტიკოსი ქალებისგან. აღსანიშნავია, რომ წინასაარჩევნო პერიოდში მან მასიურ ბეჭდებსა და საყურეებზე უარი თქვა და შედარებით მოკრძალებულად გამოიყურებოდა შეხვედრებზე.

ერთ-ერთ ინტერვიუში სალომე ზურაბიშვილმა აღნიშნა, რომ საკუთარ სტილზე თავად ზრუნავს და ქალიშვილი ქეთევან გორჯესტანი მისი ყველაზე დიდი შემფასებელია. თუმცა, საქართველოში დაბრუნების შემდეგ, ზურაბიშვილი ქართველ დიზაინერებთან ხშირად თანამშრომლობს. მაგალითად, ვაჟის, თეიმურაზ გორჯესტანის ქორწილისთვის მან კაბა დიზაინერ ქეთი ჩხიკვაძესთან შეიკერა.

როგორც AMBEBI.GE-მ გაარკვია, ინაუგურაციაზე სალომე ზურაბიშვილი საფრანგეთში მოღვაწე ქართველი დიზაინერის ჯაბა დიასამიძის სამოსით წარსდგება. დიასამიძე მაკა ასათიანის საყვარელი დიზაინერია და ბარსელონაში მისი მაღაზიის Darial-ის კრეატიული დირექტორი. ისევე როგორც სალომე ზურაბიშვილი, ჯაბა დიასამიძეც საფრანგეთში, ემიგრაციაში გაიზარდა და მათ ერთმანეთი სწორედ იქ გაიცნეს.

დღეს ჯაბა წარმატებული დიზაინერია, მის შემოქმედებაში ყოველთვის იგრძნობა ფრანგულ-ქართული ნაზავი, რომელიც მსოფლიოს წამყვან ბაიერებს, ჟურნალისტებს და ვარსკვლავებს აღაფრთოვანებს. ჯაბა დიასამიძის სამოსი არაერთმა ცნობილმა ქალმა მოირგო, მათ შორის: ანჯელინა ჯოლი, რომელიც ერთ-ერთ ფოტოსესიაში დიასამიძის შლაპით გამოჩნდა, ასევე სუპერმოდელები ადრიანა ლიმა, ნატალია ვოდიანოვა და სხვები.

სალომე ზურაბიშვილის სტილის და მისი საინაუგურაციო კოსტიუმის შესახებ ჯაბა დიასამიძემ მოკლედ ისაუბრა AMBEBI.GE-სთან ინტერვიუში.

- ქალბატონ სალომეს ბავშვობიდან ვიცნობ. ისევე როგორც მისი ოჯახი, ჩემი ოჯახიც საფრანგეთში ემიგრაციაშია და ჩვენც იქედან ვიცნობთ ერთმანეთს. მგონი 17 წლის ვიყავი, როდესაც პირველად შევუკერე კაბა. შავი, ლამაზი კაბა იყო, მაგრამ რომელი ღონისძიებისთვის შევუკერე, არ მახსოვს.

მეამაყება, რომ საქართველოს პირველი ქალი პრეზიდენტისთვის ინაუგურაციაზე კაბას მე ვქმნი. ამ კაბას სიმბოლური დატვირთვა ექნება.

- თქვენს კოლექციაში ყოველთვის შესამჩნევია დახვეწილობა და შთამბეჭდავი დეტალები, სალომე ზურაბიშვილის კაბაც ასეთი იქნება?

- კი, ასეთი იქნება. ჩემთვის თავადაც ასეთ ენერგიას გამოყოფს და ორმაგად მსიამოვნებს მასთან მუშაობა. კაბა საბოლოოდ როგორი იქნება, ინაუგურაციაზე იხილავთ. სალომე ზურაბიშვილი არის ადამიანი, რომელმაც იცის რა უნდა, გემოვნებიანია და სასიამოვნოა მასთან ურთიერთობა. პრეტენზიული არ არის და ჩვენი აზრები ყოველთვის ემთხვევა ერთმანეთს.