დონალდ ტრამპი საყვარელი გადაცემის ყოფილ წამყვანს გაეროში ელჩად ნიშნავს  - ამერიკული მედია

პრეზიდენტი დონალდ ტრამპი დღეს, სავარაუდოდ, გაერო-ში აშშ-ს ელჩს დაასახელებს. NBC News-ის ინფორმაციით, პრეზიდენტმა არჩევანი ტელეკომპანია „ფოქსის“ ყოფილ ჟურნალისტზე, ჰიზერ ნაუერტზე შეაჩერა.

თუ მის გადაწყვეტილებას სენატი მხარს დაუჭერს, ნაუერტი ნიკი ჰეილის ჩაანაცვლებს, რომელმაც ოქტომბერში განაცხადა, რომ წლის ბოლოს თანამდებობას დატოვებს.

ნაუერტს გადაცემა Fox & Friends („ფოქსი და მეგობრები“) მიჰყავდა, 2017 წლის აპრილიდან კი სახელმწიფო დეპარტამენტში მუშაობს.

ის ახალი ამბების კორესპონდენტად 1998 წლიდან მუშაობდა, კარიერის უდიდესი ნაწილი Fox News-ში აქვს გატარებული, მცირე პერიოდის მანძილზე მუშაობდა ABC News-ში. ჟურნალისტიკის სამაგისტრო კურსი ნაუერტმა კოლუმბიის უნივერსიტეტში გაიარა.

„ფოქსი“ ტრამპის ფავორიტი ტელევიზიაა. როგორც „ბიზნეს ინსაიდერი“ 2017 წელს წერდა, მას ყველაზე მეტად სწორედ ის გადაცემა მოსწონს, რომელიც ნაუერტს მიჰყავდა - Fox and Friends. გადაცემაში გაკეთებული განცხადებების შესახებ ტრამპი „ტვიტერზე“ ჯერ კიდევ პროგრამის მიმდინარეობისას წერდა ხოლმე.