დაავადებული ცხოველების ლაბორატორიები, კრემატორიუმები - 100-ზე მეტ ადამიანს დანიაში მიტოვებულ კუნძულზე გადაასახლებენ

დანია გეგმავს, ყველაზე არასასურველი უცხოელი სტუმრები ყველაზე არასასურველ ადგილას დაასახლოს - New York Times-ის ინფორმაციით, ლტოლვილებს, რომლებსაც კრიმინალური წარსული აქვთ, გადაასახლებენ პატარა კუნძულზე, სადაც ცხოველების გადამდები დაავადებების შემსწავლელი ლაბორატორიები და კრემატორიუმებია.

ორი ბორნიდან ერთ-ერთს, რომელიც კუნძულს ემსახურება, „ვირუსი“ ჰქვია.

„მათი ყოფნა დანიაში არ გვიხარია და ამას იგრძნობენ,“ - დაწერა „ფეისბუქზე“ იმიგრაციის მინისტრმა ინგერ სტოჯბერგმა.

მემარჯვენე ცენტრისტმა მთავრობამ და მემარჯვენე „დანიის სახალხო პარტიამ“ განაცხადეს, რომ ლინდჰოლმის კუნძულზე დაახლოებით 100-მდე ლტოლვილის გადაყვანის შესახებ შეთანხმდნენ. მათი განმარტებით, იქ გადაასახლებენ ადამიანებს, რომლებსაც კრიმინალური წარსული აქვთ, თუმცა გარკვეული მიზეზების გამო მათი სამშობლოში დაბრუნება არ ხერხდება.

კუნძული ბალტოოს ზღვაში, უახლოესი სანაპიროდან, დაახლოებით, 3 კმ-ს დაშორებით მდებარეობს და გადაადგილების მსურველებს ბორნებიც არარეგულარულად ემსახურებიან. უცხოელები ვალდებულები იქნებიან, ყოველ დღე გამოცხადდნენ კუნძულის ცენტრში, წინააღმდეგ შემთხვევაში, მათ დააპატიმრებენ.

დანიის სახალხო პარტიის წარმომადგენელმა მარტინ ჰენრიკსენმა განაცხადა, რომ ბორნების მოძრაობას მაქსიმალურად შეზღუდავენ, გააძვირებენ და მოუხერხებელს გახდიან.

საიმიგრაციო ცენტრების ასაშენებლად 115 მლნ დოლარი დაიხარჯება, დაწესებულებების გახსნა კი 2021 წელს იგეგმება.