ქალმა, რომელსაც საშვილოსნო საერთოდ არ ჰქონდა, ჯანმრთელი შვილი გააჩინა

გვამური დონაციის შედეგად გადანერგილი საშვილოსნოს საშუალებით ბრაზილიაში პირველი ჯანმრთელი ბავშვი დაიბადა, ინფორმაციას BBC ავრცელებს.

ქალს, რომელიც საშვილოსნოს გარეშე დაიბადა, ტრანსპლანტაციის 10 საათიანი პროცედურა სან-პაულოში 2016 წელს ჩაუტარდა. გვამური დონაციის შედეგად გადანერგილი 10 შემთხვევა მანამდე წარუმატებლად დასრულდა.

რაც შეეხება ცოცხალ დონორებს, ტრანსპლანტაციის 39 შემთხვევის შედეგად 11 ბავშვია დაბადებული. დონორებს შორის იყვნენ დედებიც, რომლებმაც საკუთარი საშვილოსნო შვილებს გადაუნერგეს.

სან-პაულოელი ქალის შემთხვევაში დონორი სამი შვილის დედა იყო, რომელიც ტვინში სისხლდენის გამო გარდაიცვალა.

დონაციის მსურველ ქალს კი მაიერ-როკიტანსკი-კუსტერის სინდრომი ჰქონდა, რომელიც ყოველ 4 5000 ქალიდან ერთს აღენიშნება - მათი ვაგინისა და საშვილოსნოს ფორმირება არასწორად ხდება.

ამის მიუხედავად, ქალის საკვერცხეები ფუნქციონირებდა და ექიმებმა შეძლეს, აეღოთ კვერცხუჯრედები, გაენაყოფიერებინათ მომავალი მამის სპერმით და გაეყინათ.

ტრანსპლანტაციიდან 6 კვირის შემდეგ პაციენტს მენსტრუალური ციკლი დაეწყო. 7 თვის შემდეგ განაყოფიერებული კვერცხუჯრედები მის საშვილოსნოში გადაიტანეს. უპრობლემო ორსულობის შემდეგ კი, 2017 წლის 15 დეკემბერს საკეისრო კვეთით ჯანმრთელი ბავშვი დაიბადა.

სან-პაულოს კლინიკის ექიმი დანი ეჟზენბერგი ამბობს, რომ ცოცხალი დონორების საშუალებით საშვილოსნოს ტრანსპლანტაცია ძალიან დიდი მიღწევა იყო მედიცინაში, თუმცა დონორების რაოდენობა ძალიან არის ლიმიტირებული, რადგან ისინი, ძირითადად, ოჯახის წევრები, ან - ახლო მეგობრები არიან.

გვამური დონაციის შედეგად წარმატებულ ორსულობასა და მშობიარობას ეჟზენბერგი ძალიან სასიხარულოს უწოდებს.

„ეს დონორის პოვნის მეტ შანსს იძლევა, ნაკლებ ხარჯებთან არის დაკავშირებული და ცოცხალი დონორების ქირურგიული ჩარევის თანმდევ რისკებსაც გამორიცხავს,“ - ამბობს ექიმი.