სიცილიაში მაფიასთან ბრძოლა გრძელდება - დაკავებულია "კოზა ნოსტრას" 46 წევრი

სიცილიაში მაფიასთან ბრძოლის სამმართველომ მასშტაბური სპეცოპერაცია ჩაატარა, რომლის ფარგლებში „კოზა ნოსტრას“ 46 წევრი დააკავა, მათ შორის მაფიოზური ორგანიზაციის სავარაუდო ლიდერი სეტიმინო მინეი.

როგორც იტალიური მედია იუწყება, გამოძიების ვერსიით, 80 წლის სეტიმინო მინეიმ 2017 წელს ტოტო რიინას გარდაცვალების შემდეგ „კოზა ნოსტრას“ სხვა ლიდერებისგან პალერმოში დანაშაულებრივი ორგანიზაციის ხელმძღვანელობის უფლებამოსილება მიიღო.

სპეცოპერაციის შედეგად დაკავებულებს ბრალად ედება მაფიოზურ საქმიანობაში მონაწილეობა, ფულის გამოძალვა, იარაღის უკანონო ტარება და სხვა მძიმე დანაშაულები.

გამოძიების მიერ მოპოვებული ინფორმაციის თანახმად, ბოლო პერიოდის განმავლობაში „კოზა ნოსტრა“ რეორგანიზაციის რთულ პერიოდს განიცდიდა, რაც დაკავშირებულია ცენტრალიზებული ხელმძღვანელობის არარსებობასთან.