ვიდეოჩანაწერი, სადაც სოფელ დიღომში მომხდარი აფეთქება ჩანს - სახლში გაზი შეყვანილი არ ყოფილა

Palitravideo.ge სოფელ დიღომში მომხდარი აფეთქების ახლო პერიმეტრიდან გადაღებულ ჩანაწერს ავრცელებს. ვიდეოფაილის ბოლო წამებში აფეთქების მომენტია ასახული. კადრებში ჩანს, როგორ ამოიფრქვევა სავარაუდოდ, გაზის აალებისგან წარმოქმნილი ცეცხლის მასა.

ამასთან, Palitravideo.ge-ის ინფორმაციით, მშენებარე სახლში, რომელიც ძლიერი აფეთქებისგან დაზიანდა, აფეთქების მომენტში გაზი საერთოდ არ იყო შეყვანილი. შესაბამისად ჩნდება კითხვა - როგორ უნდა მოხვედრილიყო გაზის დაგროვება შენობაში, სადაც გაზი შეყვანილი არ არის.

ნახეთ აფეთქების ამსახველი ვიდეოჩანაწერი - როგორ შეიძლება მომხდარიყო აფეთქება სახლში, სადაც გაზი არ არის შეყვანილი

ამ თემაზე, ვიდეოს გამოქვეყნებამდე, ჩვენ საქართველოს ტექნიკური უნივერსიტეტის ენერგეტიკისა და კომუნიკაციის ფაკულტეტის დეკანს გია არაბიძეს ვესაუბრეთ. მისი თქმით, ამის მიზეზი შესაძლოა იყოს ის, რომ გაზის მილსადენი, რომელიც მიწის ქვეშ არის განთავსებული, შესაძლოა დაზიანებული ყოფილიყო, რა შემთხვევაშიც მისგან გაზის გაჟონვა ხდება. ამ დროს გაზი მიწაში არსებული სხვა კომუნიკაციებიდან - საკაბელო ჭები, ელექტროგაყვანილობა, წყლის მილები და ასე შემდეგ, შესაძლოა გაჰყვეს სახლში შემავალ საკომუნიკაციო არხებს და თავმოყრა განიცადოს კონკრეტულ წერტილში. შესაბამისად შენობაში, რომელშიც გაზი არ არის შეყვანილი, და თუ აფეთქება ნამდვილად გაზით არის გამოწვეული, გაზი მხოლოდ ამ საშუალებით შეიძლება მოხვედრილიყო.

შეგახსენებთ, რომ სოფელ დიღომში მომხდარი აფეთქების შედეგად ოთხი პირი დაშავდა. სასწრაფო დახმარების ბრიგადამ ოთხი დაშავებულიდან ორი კლინიკაში გადაიყვანა, ორის საავადმყოფოში გადაყვანა კი საჭირო არ გახდა.