ლტოლვილმა აეროპორტში 7 თვიანი ცხოვრების შემდეგ კანადაში სახლი და სამსახური მიიღო - უჩვეულო ამბის ბედნიერი დასასრული

ჰასან ალ კონტარის 7 თვიანი ცხოვრება მალაიზიის აეროპორტში დასრულდა. CNN-ის ინფორმაციით, სირიელი კონტარი აეროპორტში ცხოვრების შესახებ „ტვიტერზე“ მიმდევრებს იუმორით, ფოტოებითა და ვიდეოებით სისტემატურად უყვებოდა.

37 წლის მამაკაცი, საბოლოოდ, ორგანიზაციების - „ბრიტანეთის კოლუმბიის მუსულმანთა ასოციაციისა“ და „კანადის ზრუნვის ასოციაციის“ დახმარებით კანადაში, ვანკუვერში ჩაფრინდა.

„თავისუფლების პირველი დღე მინდა სუფთა ჰაერზე სეირნობით აღვნიშნო, რაც შეიძლება ბევრს ვივლი ვანკუვერის ქუჩებში, მივიღებ ცხელ შხაპს და დავლევ ყავას მეგობრებთან ერთად,“ - ამბობს კონტარი CNN-თან.

სირიელმა მამაკაცმა 2 თვე მალაიზიის დაკავების ცენტრში, 7 თვე კი - კუალა ლუმპურის საერთაშორისო აეროპორტში გაატარა.

„ჩამოვედი და არ მჯერა, აღელვებისგან ვერ დავიძინე. სასტუმროში სამსახური მელოდება, როგორც კი დავისვენებ, მუშაობას შევუდგები. მივხვდი, რომ ცხოვრებაში არის მომენტები, რომელიც ბევრად ლამაზია, ვიდრე ოცნებები,“ - ამბობს ჰასან ალ კონტარი.

მამაკაცი ქალაქ დამაში ცხოვრობდა, 2006 წლიდან 2012 წლამდე არაბეთის გაერთიანებულ საემიროებში მუშაობდა მარკეტინგის მენეჯერად.

მუშაობის უფლება მას შემდეგ დაკარგა, რაც სირიაში სამოქალაქო ომი დაიწყო, სამშობლოში დაბრუნება არ სურდა, ამიტომ საემიროებში 2016 წლამდე არალეგალურად ცხოვრობდა.

კონტარი დააკავეს, თუმცა მალევე გაათავისუფლეს. მამაკაცმა მოახერხა ახალი პასპორტის აღება, მაგრამ მალაიზიაში დეპორტაციას თავი ვერ აარიდა.

კონტარი ცდილობდა მარტში თურქეთში ჩასულიყო, თუმცა ავიაკომპანიამ Turkish Airlines ის უკან გააბრუნა და კუალა ლუმპურის აეროპორტში ჩარჩა.

ვანკუვერში ჩასულ კონტარს ლორი კუპერი დახვდა - ჯგუფის ერთ-ერთი ინიციატორი, რომელიც მამაკაცის დასახმარებლად ფულს აგროვებდა. კუპერის თქმით, ალ კონტარის დასახმარებლად არასამთავრობო ორგანიზაციებმა და კანადის მთავრობამაც ყველაფერი გააკეთეს.

უჩვეულო ისტორიის მოყოლისას კონტარი ამბობს, რომ ცხოვრების აღქმა მთლიანად შეეცვალა.

„დანებება გამოსავალი არასოდეს არის, თუ დანებდებით, ეს ნიშნავს რომ არ გჯერათ საკუარი თავის, არ აკეთებთ საკმარისს,“- ჰყვება კონტარი და ამბობს, რომ მინიმალური მოთხოვნები ჰქონდა - სურდა, ეცხოვრა უსაფრთხოდ, ჰქონოდა სამსახური და საცხოვრებელი ადგილი.

„როდესაც თვითმფრინავი მიწაზე დაეშვა და დავინახე ლორი, ყველაფერი ერთად მივიღე, რაც კი მინდოდა. ახლა, ბოლოს და ბოლოს, შემიძლია დავისვენო და დავტკბე. სიბნელის შემდეგ სინათლე გამოჩნდა,“ - ამბობს კონტარი.