"საქართველოს საჰაერო სივრცეში ყველა თვითმფრინავს ვაკონტროლებ" - ცნობილი მოცეკვავის ადრენალინით სავსე პროფესია

პროფესიით პილოტია, ცნობილი თვითმფრინავებით და ცნობილ კომპანიაში ფრენის გამოცდილებაც აქვს, მაგრამ ახლა თბილისის აეროპორტში ავიამეთვალყურედ მუშაობს, საჰაერო ზოლს აკონტროლებს. ალბათ ამის დაჯერება ცოტათი ჭირს, როცა საქმე სამეჯლისო მოცეკვავეს, "ცეკვავენ ვარკვლავების" კონკურსანტის მეწყვილეს, რამაზ ლაზარიშვილს ეხება, მაგრამ დღეს ის ალბათ ერთადერთი მოცეკვავე ავიატორია.

რამაზ ლაზარიშვილი:

- სამი წელი არ ვცეკვავდი, მანამდე საფრენოსნო სასწავლებელი დავამთავრე, ვიყავი პილოტი, "აირზენაში" ცოტა ხანს ვიმუშავე. ვაპირებდი კარიერა ამეწყო, მერე ავიამეთვალყურის ვაკანსია გაჩნდა და 1500 კაცში გავიმარჯვე. სასწავლებლად ჩეხეთში გამიშვეს, 7 თვე იქ ვსაწვლობდი და აქ რომ ჩამოვედი, წელიწად-ნახევარი აქაურ რეგულაციებს, სისტემას ვსწავლობდი.

უკვე ლიცენზირებული ავიამეთვალყურე ვარ, თბილისის მისადგომებს ვაკონტროლებ... პილოტობა საინტერესო იყო, მაგრამ ცხოვრებაში სიახლეები მიყვარს, ამიტომ ახალი პროფესია შევიძინე. ასე რომ, საქართველოს საჰაერო სივრცეზე რა თვითმფრინავიც დაფრინავს, გადამფრენი, დამჯდომი - ყველას ვაკონტროლებთ, მათი სიმაღლის შეცვლა, დაჯდომა აეროდრომზე ჩვენი საქმეა. პილოტს ჩვენი ნებართვის გარეშე უფლება არ აქვს, თუნდაც 2 გრადუსით გადაუხვიოს.

- ჰოდა, რა ხდება იქ, ზემოთ ჰაერში?

- ზემოთ განსაკუთრებით ზაფხულის პერიოდში გადატვირთულია. ახლა ზამთარი რომ მოდის, ნაკადი შედარებით მცირდება, მაგრამ მაინც საკმაოდ დიდი მოძრაობაა. საქართველოს საჰაერო სივრცე კავკასიის ქვეყნებს რომ შევადაროთ, ყველზე დატვირთულია. ბევრი ხაზია და ბევრი მკვეთიც - ზოგი სამხრეთიდან მოდის, ზოგი ჩრდილოეთიდან და ამიტომაც არსებობს ჩვენი პროფესია, რომ ეს ყველაფრი გაკონტროლდეს.

- გამიგია, რომ მცეხეთასთან საჰაერო ტრასა იყოფა, ანუ საქართველოს "ზეციური" გზები ძალიან საინტერესოა...

- კი, ტრასები დაყოფილია, თუმცა გზა არა მცხეთასთან, უფრო მუხრანთან იყოფა. მოკლედ, როგორც ხმელეთზე, ისევეა ჰაერშიც. რამდენიმე ათეული გზა არის, რითაც თვითმფრინავები სარგებლობენ, გააჩნია, რომელი წერტილიდან მოდიან, რომელი კუთხიდან გადიან და ა.შ.

- თბილისის აეროპორტიდან აფრენილი თვითმფრინავი მცხეთის თავზე რამდენ ხანში აღმოჩნდება?

- გააჩნია თვითმფრინავის ტიპს, ალბათ 2-3 წუთში. აფრინდა და თითქმის მცხეთის თავზეა. თუ დასავლეთის მიმართულებით მიდის, 20 წუთი უნდა, რომ საერთოდ საქართველოს საჰაერო სივრცე დატოვოს. ზოგს კიდევ ნაკლები სჭირდება, გააჩნია, რა მიმართულებით იღებს გეზს. აქედან ბათუმისკენ თუ წავიდა, 15 წუთში დატოვებს ქვეყნის საზღვარს, თუ ქვემოთ, სამხრეთისკენ - 5 წუთშიც.

- რატო აირჩიე ეს პროფესია, როცა პარალელურად მოცეკვავე ხარ.

- ცეკვა 17 წლისამ დავიწყე, თუმცა პროფესიული არჩევანი 14-15 წლის ვიყავი რომ გავაკეთე. ამიტომ უარი აღარ ვთქვი იმ პირველ გადაწყვეტილებაზე. ცეკვა როგორც მოყვარულმა ისე დავიწყე, უბრალოდ, მიყვარდა, მერე კონკურსებმა ისეთი ინტერესი და ჟინი მომიტანა, რომ შემიყოლია და დღეს ძალიან ბედნიერი ადამიანი ვარ. ზოგი ერთ საქმესაც ვერ აკეთებს ცხოვრებაში, რომელიც უყვარს და მე ორი საყვარელი საქმე მოვძებნე და ორივეს სიამოვნებით ვემსახურები. პრინციპში, უფრო მეტი საქმეც მაქვს (პილოტობა, პედაგოგობა, ქორეოგაფობა, ჩემი სტუდია მქონდა), მაგრამ ამ ეტაპზე მხოლოდ 2-ით ვარ დაკავებული - ავიამეთვალყურეობა და ცეკვა.

- მასწავლებლობას თავი დაანებე?

- სტუდია მქონდა, მაგრამ ქორეოგაფობას თავი დავანებე, რადგანაც დრო ფიზიკურად აღარ მრჩებოდა. ასევე რაღაც პერიოდი ბოდიბილდინგითაც ვიყავი დაკავებული, სამი წელი ვვარჯიშობდი, ახლა თავისუფლად შემიძლია როგორ მწვრთნელმა ისე ვიმუშავო.

- ცეკვა რა არის შენს ცხოვრებაში?

- რამდენიმე წელი თავი დანებებული მქონდა, რადგანაც ავიაციაში კარიერის აწყობა აუცილებლად მინდოდა, მაგრამ ახლა ისე გამოვიდა, რომ ერთგანაც ვარ და მეორეგანაც. ამიტომ, ვამბობ, რომ უბედნიერესი ადამიანი ვარ.

- ე.ი. მოგწონს ავიამეთვალყურეობა?

- ძალიან სტრესული საქმეა, ბევრი ადრენალინია, ყურადღება სჭირდება, დეტალებზე ორიენტირებაა სჭირდება, რაც ცხოვრებაში ჩემი პლუსია, შემიძლია. ამიტომ, მომწონს და უკვე მიყვარს კიდეც.

- "ცეკვავენ ვარსკვლავებში" სხვადასხვა პარტნიორები გყავდა - ია სუხიტაშვილი, სოფო ნიჟარაძე, ახლა - ნინო ჩხეიძე. რას გვეტყვი?

- კი, კარგი პარტნიორები მყავდა... ნინოც კარგი ადამიანია, კომფორტულია მასთან მუშაობა. ძალიან კარგი იუმორის გრძნობა აქვს, არ მოგაწყენს.

- მოგყვება ცეკვის სწავლისას?

- ყველა მეწყვილესთან მომთხოვნი ვარ, მიმაჩნია, რომ ეს ჩემი ხასიათის ნაწილია და ამაზე უარს ვერ ვიტყვი. ეს მე ვარ და ასეთი, მუშაობის დროს. რაც შეეხება ნინოს ცეკვას, მთავრია, ადამიანი ცდილობდეს, ირჯებოდეს, დანარჩენი - ცეკვაა, ნინო აქ არ მოსულა, რომ გახდეს პროფესიონალი მოცეკვავე, მოვიდა იმისთვის, რომ განავითაროს საკუთარი თავი ამ სფეროში. ტურებს რომ გადავხედოთ, ნელ-ნელა იცლება, ყოველდღიური შეხება მაქვს და ვიცი, რომ ცდილობს, უნდა მაყურებელს მუდმივად კარგი ნომერი შევთავაზოთ...

- თქვენი წყვილის შესახებ რა პროგნოზს გააკეთებდი.

- ფინალში ცხადია, რომ ძალიან ძლიერი მოცეკვავეები უნდა მოხვდენ, თუმცა ვნახოთ, რა იქნება, მაყურებლის და ჟიურის გადასაწყვეტია. ჩვენი მხრიდან მაქსიმუმს ვაკეთებთ.