"სამივე დამწვრობითი შოკის მდგომარეობაშია" - გუგა ქაშიბაძე აფეთქების შედეგად დაშავებულთა შესახებ

ფონიჭალაში მომხდარი აფეთქების შედეგად დაშავებულ პაციენტებს სასუნთქი გზების დამწვრობაც აღენიშნებათ.

დამწვრობის ცენტრის ხელმძღვანელის გუგა ქაშიბაძის განაცხადებით, ერთი ოჯახის დაშავებული სამივე წევრი მკურნალობას რეანიმაციულ განყოფილებაში გააგრძელებენ.

„სამივე დაშავებულს აღენიშნება სხვადასხვა მიდამოს თერმული დაზიანება. მათ დამწვარი აქვთ ხელის მტევნები, სახეები, გულმკერდი, ქვემო კიდურები. სამივე მათგანი დამწვრობითი შოკის მდგომარეობაში იმყოფება. სამივე მათგანს აღენიშნება თერმულ-ინგალაციური დაზიანება და გარე ტრავმები", - განაცხადა გუგა ქაშიბაძემ.

მისივე თქმით, პაციენტების მდგომარეობა მძიმეა, თუმცა სტაბილური.

დამწვრობის ცენტრში პაციენტები დღეს ჯანდაცვის მინისტრის მოადგილემ ზაზა ბოხუამ და პრეზიდენტობის დამოუკიდებელმა კანდიდატმა სალომე ზურაბიშვილმა მოინახულეს.

"სამაშველო ღონისძიება არის გადამწყვეტ ფაზაში და იმედია მალე დასრულდება. ყველაფერი კეთდება იმისთვის, რომ ამ ორი ადამიანის გადარჩენა და პოვნა მოხდეს. მერიის სამსახურებთან ერთად ვმუშაობთ. მიმდინარეობს შენობის გამაგრებითი სამუშაოები. საფრთხის შემცველია შენობის შიგნით მუშაობა. რთული მდგომარეობაა", - განაცხადა საგანგებო სიტუაციების მართვის სამსახურის უფროსმა შალვა ხუციშვილმა.

მისივე ინფორმაციით, ადგილზე 30-მდე მაშველი და მერიის შესაბამისი სამსახურების წარმომადგენლები მუშაობენ.

ფონიჭალაში, სავარაუდოდ, ბუნებრივი აირის აფეთქების შედეგად სამი ადამიანი დაშავდა. ისინი დამწვრობის ცენტრის რეანიმაციულ განყოფილებაშია მოთავსებული. დაშავებულები არიან 44 წლის მამაკაცი, მისი 24 წლის შვილი და 6 წლის შვილიშვილი. მაშველები ამ დრომდე ეძებენ დედა-შვილს, რომელიც სავარაუდოდ, ნანგრევებშია მოყოლილი.