"ადრე ბევრი უცხოელი ქირაობდა ბინას, ახლა იშვიათად" - თბილისში უძრავი ქონების გაქირავების ფასი 15%-ით შემცირდა

საქართველოში ბინის გაქირავება მოსახლეობისთვის შემოსავლის ერთ-ერთი მნიშვნელოვანი წყაროა. ბოლო პერიოდში დედაქალაქში ბინის ქირაზე მოთხოვნა შემცირდა, რაც სავარაუდოდ, ლარის კურსის ცვალებადობამ განაპირობა. მოთხოვნის შემცირებამ კი, თავის მხრივ გამოიწვია ქირის გადასახადის 10-15 %-ით შემცირებაც.

AMBEBI.GE დაინტერესდა, რა ღირს ბინის დაქირავება თბილისის სხვადასხვა უბნებში.

ss.ge-ზე გამოქვენებული განცხადებების მიხედვით, 50 კვ/მ ბინის ქირის ფასი თბილისში 300 ლარიდან იწყება და უბნების მიხედვით 400 დოლარამდეც ადის. ღირებულება დამოკიდებულია იმაზე, თუ რა მდგომარეობაშია ბინა და რომელ უბანში მდებარეობს.

როგორც უძრავი ქონების სააგენტოს "კიბეს" დირექტორმა ნელი გოგუაძემ AMBEBI.GE-სთან საუბრისას განაცხადა, იმის გამო რომ მოსახლეობას შემოსავალი ლარში აქვს, ხოლო ქირას დოლარში იხდის, კურსის ცვალებადობამ მათ გადასახადზე პირდაპირ იმოქმედა.

"როდესაც კურსი არასტაბილურია და ქირა დოლარში აქვთ, ფასდაკლებას ითხოვენ ხოლმე. ზოგადად მაღალფასიანი ბინების გაქირავება ძალიან ჭირს. რეალურად, ყველაზე კარგად ერთ და ოროთახიანი ბინები ქირავდება.

საბურთალოზე ბინის ქირის ფასი მინიმუმ 250 დოლარია, უფრო მეტად 300 დოლარიდან იწყება ხოლმე. სამ ოთახიანი, შესაძლოა 500-700 დოლარიც კი ღირდეს. ფასი რა თქმა უნდა, ბინის მდგომარეობაზე და ადგილმდებარეობაზეა დამოკიდებული.

როგორც წესი, მსურველებს უფრო ახალაშენებული ბინები აინტერესებთ, თუმცა მცირე ბიუჯეტის შემთხვევაში ძალიან ბევრ რამეზე თვალს ხუჭავენ. მოთხოვნა ბოლო პერიოდში ნამდვილად შემცირდა, ამიტომ ქირას გამქირავებლებიც აკლებენ.

მოთხოვნის შემცირებაზე ბევრი ფაქტორი მოქმედებს. ადრე ბევრი უცხოელი იყო, რომლებიც ბინას ქირაობდნენ, ახლა ძალიან იშვიათად, რომ უცხოელმა ბინა დაიქირაოს. რაც შეეხება ქართველებს, ბინის დაქირავება ძირითადად რეგიონებიდან ჩამოსულებს სურთ, ისინი ვინც სტუდენტები არიან და როგორც წესი, დაბალბიუჯეტიან ბინებს ეძებენ.

ყველა ამ ფაქტორის გათვალისწინებით, გაქირავების ფასები კატასტროფულად შემცირებული არ არის, თუმცა 10-15%-იანი შემცირება შეინიშნება" - განაცხადა გოგუაძემ.

პორტალი ss.ge-ს რედაქტორმა ლელა არაბულმა AMBEBI.GE-სთან საუბრისას განაცხადა, რომ თბილისში უძრავი ქონების გასაქირავებელი ფასი 150 ლარიდან იწყება და 12 000 ლარამდეც კი ადის. მისივე თქმით, 150-200 ლარის ფარგლებში ბინებში ან კერძო სახლებში ერთი ოთახი ქირავდება.

"მიუხედავად იმისა, რომ კანონი იურიდიულ პირებს ავალდებლებს ლარში მოხდეს ანგარიშსწორება, მაინც დოლარის კურსის მიხედვით ხდება გადახდა.

ჩვენს საიტზე ასეთი ფუნქციაა, რომ მომხმარებელს შეუძლია ავტომატურად ლარში ნახოს ფასი და დოლარშიც, ანგარიშსწორება კი ეროვნული ბანკის კურსის მიხედვით ხდება. სამწუხაროდ, ათვლას მაინც დოლარში აკეთებენ. დაბალბიუჯეტიან ბინებზე კურსის ცვალებადობა მაინცდამაინც არ აისახება ხოლმე" - აღნიშნა არაბულმა.

AMBEBI.GE-სთან საუბრისას ბინის ფასის შემცირებაზე აკეთებს აქცენტს კომპანია "ბერუკას" დირექტორი ავთანდილ გუგეშაშვილიც. მისი თქმით, ფასების ცვლილება ფიქსირდება როგორც ცენტრალურ უბნებში, ასევე გარეუბნებშიც.

"დოლარის კურსი ფასზე პირდაპირ მოქმედებს. ამ ეტაპზე ფასები შემცირებულია, გასაქირავებელი ბინების ფასი 10-15 პროცენტითაა დაკლებული. ცენტრალურ უბნებში, მაგალითად ვაკის რაიონში, ერთოთახიანი ბინის გაქირავების ფასი 300-350 დოლარია, მაშინ როცა მინიმუმ 400 დოლარი იყო ხოლმე.

გარეუბნებში ფასი შედარებით დაბალია, თუმცა შემცირება იქაც შეინიშნება და ფასი 150-200 დოლარის ფარგლებში მერყეობს. რაც შეეხება მოთხოვნას, ადრე უცხოელები უფრო მეტად ქირაობდნენ, ახლა აღარ - ალბათ ეს იმან გამოიწვია, რომ უძრავი ქონების ყიდვის საშუალება მიეცათ", - გვითხრა გუგეშაშვილმა.