"ისეთ ცეკვას ვამზადებთ, სისხლი აუდუღდება მაყურებელს" - კონკურსანტები სუხიშვილების ტურის შესახებ

პროექტი "ცეკვავენ ვარსკვლავები" ქართული ტურისთვის ემზადება. კონკურსანტებს სუხიშვილების ქორეოგრაფები ამზადებენ. ენერგიას არავინ ზოგავს, ამაში ჩვენც დავრწმუნდით, როდესაც დარბაზში მათ რეპეტიციებს დავესწარით და მონაწილეების შთაბეჭდილებები და ემოციები ჩავწერეთ.

რატი დურგლიშვილი:

- ქართული ცეკვა ჩემთვის ქართული სულია, ჩემი ხორცი და სისხლია, ისევე, როგორც ნებისმიერი ქართველისთვის. ეს არის ჩვენი კულტურა. მართლაც, ყველა ადამიანის ღირსებაა. ეს ტური ძალიან საპასუხისმგებლოა ჩემთვის. ჟიურისთან ერთად, უამრავი ტელემაყურებელი იქნება შემფასებელი, რადგანაც ქართველების 99%-მა ქართული ცეკვა იცის. უდიდესი მინუსი ის არის, რომ ეს სარეპეტიციო დღეები არის ქართულ ცეკვაში ჩემთვის პირველი გაკვეთილები. არასდროს არსად მიცეკვია. ასე მესმოდა ყოველთვის - მხოლოდ ერთი ცეკვა რომ მესწავლა, ამით შეურაცხყოფას მივაყენებდი ქართულ ცევებს. ის საფუძვლიანად არის შესასწავლი, რაც აქამდე ვერ მოვახერხე. ისიც აღმოვაჩინე, რომ ამ რეპეტიციებზე განსაკუთრებით ვიღლები, ურთულესი ილეთებია, ასე არც ერთ ცეკვაზე არ დავღლილვარ. თურმე ჩვენი მოცეკვავეები რას უძლებენ, თუმცა ბიჭებზე მეტი დატვირთული ილეთები გოგოებს აქვთ. ორშაბათს "აფხაზური" უნდა ვიცეკვო.

ოთო ფოლადაშვილი:

- ყოველ სეზონზე განსაკუთრებულად ველოდები ქართული ცეკვების ტურს. მსოფლიოში ერთადერთი ღირსშესანიშნავი რამაა ქართული ცეკვა, რითიც ყოველთვის უნდა ვიამაყოთ. მე და ირინკა ისეთ ცეკვას ვამზადებთ, სისხლი რომ აუდუღდება როგორც მოცეკვავეებს, ისე მაყურებელს. ეს არის "ხანჯლური". კი, ნებისმიერს ჟრუანტელი დაუვლის და დაბურძგავს. ისეთი ცეკვა გვაქვს, ძვალსა და ჯიგარში რომ ატანს! ამ პროექტის მიღმა ქართული ცეკვა არასდროს მიცეკვია და აქ ისეთ სიამოვნებს ვიღებ, რომ უბედნიერესი ვარ. ამიტომ ყოველთვის დიდი მონდომებით ველოდები და მერე დიდი სიხარულით ვმუშაობ. სულ სხვადასხვა ცეკვას ვირჩევ და მირჩევენ. ჯერ კიდევ პირველი იყო რაჭული, რომელსაც დიდი აჟიოტაჟი მოჰყვა. მე და ნუკი კოშკელიშვილმა წარმოვადგინეთ, მერე "მოხეური" ვიცეკვე, "აბრაგულიც" და ბევრი სხვა, რაც მეამაყება.

ჯულიანა ბარგნარი:

- ჩემთვის ქართული ცეკვის ტური ძალიან დიდი ემოციაა. შეიძლება ეროვნებით ქართველი არ ვარ, მაგრამ რადგან საქართველოში გავიზარდე, ეს არის ჩემი სისხლი და ხორცი. როცა ვცეკვავ და მუსიკა მესმის, სხეულში ჟრუანტელი მივლის. ყველაფერი დიდ სიამოვნებასთან ერთად, გამორჩეულ სილამაზესთანაა დაკავშირებული, რასაც მაყურებელი გრძნობს. ამიტომ, თითოეული მონაწილე სხვა გულით ემზადება ამ ცეკვისთვის. მოკლედ, პროექტში შესრულებული მაქვს ოსური, ხორუმი, ცდო, ყველა თავისებურად დასამახსოვრებელი, საინტერესო იყო. ახლა აჭარულისთვის ვემზადები, უნიჭიერესი პარტნიორი (ამიკო ჩოხარაძე) მყავს, ყოველ კვირას მაოგნებს თავისი ნიჭით და მონდომებით.

ამიკო ჩოხარაძე:

- რაოდენ საოცარი და გასაკვირიც უნდა იყოს, აჭარელს აჭარულის ცეკვა მიწევს. ვფიქრობ, სწორი გადაწყვეტილებაა. მჯერა, ამით ბევრ მეგობარს გავახარებ, ასევე ბევრ აჭარელს და საერთოდ, სრულიად საქართველოს. უმაგრესი ცეკვაა, არა იმიტომ, რომ ამ კუთხიდან ვარ, ხალისიანია, სახასიათო და სადაც უნდა იყო, გაცეკვებს. ასევე საპასუხისმგებლოცაა. ამიტომ, მეც და ჯულიანაც ძალიან ვინდომებთ. ჯულიანა ბათუმში უნდა წავიყვანო, აჭარული ყოფა ვაჩვენო, ბებიაჩემის გამომცხვარი ხაჭაპური გავასინჯო და ბათუმის ქუჩებში გავასეირნო, - ამ ასურელ გოგონას ჩემი თვალით დანახულ აჭარაზე თვალი უნდა შევავლებინო.

თამთა შედანია:

- ილოურს ვცეკვავ, სწრაფი, ცეცხლოვანი და არამოსაბეზრებელი ცეკვაა. გვინდოდა, ლაზური ელემენტებით შეგვევსო. არასდროს მქონია ქართული ცეკვის გამოცდილება. ღრმა ბავშვობაში კი დავდიოდი ქართულ ცეკვაზე, მაგრამ იქიდან არაფერი მახსოვს. მეგონა, ძალიან გამიჭირდებოდა, მაგრამ ილეთებს რაღაც კარგად ვითვისებ. ჩვენს ნომერში ორივეს ბიჭის სამოსი გვაცვია. უბრალოდ, ბოლოში ვიხდი ქუდს.

ნინუკა შარაშიძე, სუხიშვილების ქორეოგრაფი:

- როგორც კონკურსანტები და მათი პარტნიორები აღნიშნავენ, განსაკუთრებით ელოდებიან ხოლმე ქართულ ტურს, რომელმაც სახელი სუხიშვილების ტურით დაიმკვიდრა. მას მაყურებელიც განსაკუთრებით ელოდება ხოლმე, საკმაოდ რთულია სამუშაო პროცესი, არა მარტო კონკურსარტებისთვის, ამავე დროს პროფესიონალებისთვის, რადგან ქართული ცეკვა სამეჯლისო ცეკვებისგან რადიკალურად განსხვავდება. მათაც უწევთ თითოეული დეტალის შესწავლა, რადგანაც აბსოლუტურად განსხვავებულია ქართული და სამეჯლისო ცეკვის სპეციფიკა. პროფესიონალები არიან, ნამდვილი ვარსკვლავები, იგივე სალომე ჭაჭუა, ჯულიანა ბარგნარი, ოთო ფოლადაშვილი და ყოველთვის განსაკუთრებით აინტერსებთ ხოლმე თითოეული დეტალი. აქტიურად არიან ცეკვის შერჩევაშიც ჩართულები, თვითონაც გვეხმარებიან. მოკლედ, ამ ტურის მომზადება შრომატევადი პროცესია, საკმაოდ რთული. პროფესიონალ მოცეკვავეებს განსაკუთრებით უნდათ ხოლმე, რომ ქართული ცეკვა გამორჩეულად წარმოაჩინონ და მაყურებლის წინაშე თავი არ შეირცხვინონ. პროცესი ძალიან საინტერესოა და ჩვენ ყოველთვის გვიყვარს ამ ტურის მომზადება. ვცდილობთ, მაქსიმალური შედეგი მივიღოთ. თავს არ ზოგავენ, დილიდან საღამომდე სარეპეტიციო დარბაზში არიან და ცდილობენ, თავიანთი მაქსიმუმი აჩვენონ. როდესაც პირველად ილეთებს ვამუშავებდით, რატი დურგლიშვილი ამბობდა, არ გამომივაო... ასე რომ, მარტივი ილეთიდან დაწყებული, ყველაფრის სწავლება გვიწევს. თან, ორივეს ვასწავლით - ვარსკვლავებსაც და პროფესიონალ მოცეკვავეებს. სამეჯლისო მოცეკვავეებისთვის თეძო მნიშვნელოვანია. ჩვენთან პირიქით, თეძო გაჩერებულია. მათთან ხელია უხეში, მკაცრი და ჩვენთან რბილი, ნაზი. ამიტომ ერთ კვირაში ყველაფრის გადაკეთება გვიწევს.