პატრულებმა იაკუტიელი ტურისტი მონათლეს - "ქალმა გვითხრა, რომ აქამდე არც ერთი რელიგიის მიმდევარი არ იყო..."

უკვე რამდენიმე თვეა თბილისის ტურისტულ უბნებში პატრულირება ქვეითმა პატრულებმა დაიწყეს. ე.წ. ტურისტული პატრულები დედაქალაქში ჩამოსულ სტუმრებს სხვადასხვა დახმარებას უწევენ. მათ ყოველდღიურ საქმიანობაში გარკვეული მოულოდნელობებიც არის. ასე მოხდა კოტე აბრამიას და ზვიად ზურაბიშვილის მორიგეობისას, როდესაც ისინი სრულიად შემთხვევით იაკუტიელი ტურისტის ნათლიები გახდნენ.

ეს უჩვეულო ამბავი AMBEBI.GE-ს ქვეითმა პატრულმა კოტე აბრამიამ უამბო:

"4 თვეა ქვეითი პატრული ვარ თბილისის ტურისტულ უბნებში. მეწყვილესთან ერთად 4 ნოემბერს აღმაშენებლის გამზირზე ასაკოვან ქალბატონს შევხვდით, რომელსაც საცხოვრებელ მისამართამდე მისვლა უჭირდა. რა თქმა უნდა დავეხმარეთ, მივაცილეთ და შევნიშნეთ, რომ ტურისტები გვაკვირდებოდნენ. შემდეგ გამოგველაპარაკნენ, ცოტა არ იყოს გაკვირვებული იყვნენ პოლიციის ასეთი ქცევის გამო.

ტურისტი ქალბატონი და მამაკაცი იაკუტიიდან ჩამოსული სტუმრები აღმოჩნდნენ და მათი სურვილით გავცვალეთ ტელეფონის ნომრები. მეორე დღეს, მოულოდნელად დამირეკეს და შევხვდით. განახლებულ აღმაშენებელზე ფინჯან ყავაზე საუბრის შემდეგ, გაუჩნდათ სურვილი მართლმადიდებლურ ტაძარში შევსულიყავით. იქვე, სანაპიროზე წმინდა ნიკოლოზის სახელობის ტაძარს ვესტუმრეთ. სანთლები ავანთეთ ჩვეულებრივ და 40 წლამდე ასაკის ქალბატონმა თქვა, რომ აქამდე არცერთი რელიგიის მიმდევარი არ იყო. სურვილი გამოთქვა იქვე მონათლულიყო მართლმადიდებლურად.

ძალიან მოულოდნელი იყო, გაგვესაუბრა ტაძრის მოძღვარი. საბოლოოდ, ხის ჯვარით შესრულდა საიდუმლო. მყავს ახალი ნათლული ტურისტი იაკუტიიდან, გვარად მირონოვა - სიმბოლურია. სტუმრები მეწყვილესთან ერთად თბილისიდან დღეს გავაცილეთ" - ამბობს ჩვენთან საუბარში კოტე აბრამია.

ფოტოზე: ქვეითი პატრული კოტე აბრამია და იაკუტი ტურისტი