შარლიზ ტერონის დედამ ქმარი თავდაცვის მიზნით მოკლა - "დედაჩემი შთაგონების წყაროა"

შარლიზ ტერონი ფილმებში თითქმის ყოველთვის ძლიერ ქალს განასახიერებს. რეალურ ცხოვრებაში კი მისთვის მისაბაძი საკუთარი დედაა.

43 წლის მსახიობმა დედის, გერდას შესახებ ჟურნალ Elle-ს მიერ გამართულ ღონისძიებაზე ისაუბრა.

„არავინ იბადება ცოდნით, როგორ უნდა ვიმოქმედოთ ცხოვრებაში და როგორ მივიღოთ რთული გადაწყვეტილებები, განსაკუთრებით - ახალგაზრდა გოგონებმა. გამიმართლა, რომ მყავს არაჩვეულებრივი დედა, რომელმაც გაბედულ ადამიანად მაქცია და ყოველთვის მომიწოდებდა, ძლიერი ვყოფილიყავი,“ - ამბობს შარლიზი.

ტერონი 15 წლის იყო, როდესაც მისი მამა, ჩარლზი ცოლს თავს დაესხა, გერდამ კი, თავდაცვის მიზნით, მას ცეცხლსასროლი იარაღიდან ესროლა, მამაკაცი გარდაიცვალა. ტერონმა ოჯახის მძიმე წარსულის შესახებ ადრეც ისაუბრა.

2017 წელს ჰოვარდ სტერნის შოუში შარლიზმა განაცხადა, რომ თავდაპირველად არ იცოდა, რა რეაქცია უნდა ჰქონოდა მომხდარის შესახებ.

„ვთამაშობდი, თითქოს არაფერი მომხდარა. არავისთვის მომიყოლია, ამაზე საუბარი არ მსურდა. თუ ვინმე მამაზე მკითხავდა, ვეუბნებოდი, რომ ის ავტოავარიაში გარდაიცვალა,“ - განაცხადა მსახიობმა.

მისივე თქმით, მამის სიკვდილი მისთვის ტრავმა არ ყოფილა, რადგან მასთან ერთად ცხოვრება ოჯახის წევრებისთვის ჯოჯოხეთი იყო.

„ჩემი აზრით, ბავშობაში მომხდარი ამბებიდან უფრო დიდი გავლენა ჩემზე ზრდასრულ ასაკში მოახდინა იმან, რომ ვცხოვრობდი სახლში ლოთთან ერთად, ვიღვიძებდი, და არ ვიცოდი, რა შეიძლებოდა მომხდარიყო იმ დღეს, ყველაფერი იყო დამოკიდებული სხვა ადამიანზე, დამოკიდებული იყო მის გადაწყვეტილებაზე - დალევდა თუ არა ალკოჰოლს.

მე მყავს არაჩვეულებრივი დედა, ის ჩემი ცხოვრების უდიდესი შთაგონების წყაროა. ფსიქოთერაპიის კურსი არასოდეს გაუვლია, უმკლავდებოდა უდიდეს პრობლემას - ყოველდღიურად უწევდა შვილის დაცვა. მისი ფილოსოფია იყო „ეს საშინელებაა, ახლა უნდა გააკეთო არჩევანი - უნდა ჩაიძირო, თუ უნდა გაცურო“ - იხსენებს ტერონი.