"ცეკვებში ძალიან უცხო კაცი ვიყავი..." - რას ამბობს ირაკლი კაკაბაძე "ცეკვავენ ვარსკვლავების" დატოვების შემდეგ

"ცეკვავენ ვარსკვლავების" პროექტი პუბლიცისტმა, მწერალმა ირაკლი კაკაბაძემ დატოვა. ამბობს, რომ ოდესმე ხომ უნდა დამეტოვებინა შოუ და აი, ეს დღეც დადგაო.

"ჩემთვის ძალიან კარგი გამოცდილება იყო, კარგი მეგობრები შევიძინე, უმაგრესები და ულამაზესები, რითაც ძალიან ბედნიერი ვარ" - გვეუბნება ირაკლი და დასძენს, რომ ამ შოუში მონაწილეობა მისთვის სწორედ რომ კარგი გამოცდილება იყო.

"გარდა იმისა, რომ ჩვენ შორის შესანიშნავი ურთიერთობები ჩამოყალიბდა, კონკურსანტების საოცარი ერთსულოვნება ვნახე. ერთმანეთს მხარს უჭერდნენ და ამხნევებდნენ. თვითონ სამეჯლისო ცეკვები ძალიან მომწონს, მაგრამ მასში ძალიან უცხო კაცი ვიყავი. მანამდე არასდროს მიცეკვია, თუმცა ჩემი პარტნიორები ძალიან ცდილობდნენ, ნომრები დამედგა და მათი მადლობელი ვარ, რომ ცოტა მაინც ამათვისებინეს. გარდა ამისა, მადლიერებით ვარ გაჟღენთილი საერთოდ ყველას მიმართ, პროდიუსერების, შემოქმედებითი ჯგუფის... სერიოზული ხელშეწყობა გვქონდა. პირველ რიგში, ჩემთვის ეს პროექტი სიყვარულის დღესასწაული იყო... ასე პირდაღებული ვუყურებდი იმ ყველა ნიჭიერ ადამიანს და მათი საოცარი ხელოვნებით უდიდეს ბედნიერებას განვიცდიდი. ხელოვნება არის ის, რაც გადაარჩენს ჩვენს ქვეყანას, რადგან ის განასახიერებს სულიერებას ყველაზე უშუალო ფორმით. ძალიან ბედნიერი და გამდიდრებული ვტოვებ ამ შოუს ჩემი ახალი მეგობრებით და უნიჭიერესი ახალგაზრდებით".

- ხომ არ გაგიჩნდათ სურვილი, მომავალში ცეკვას უკეთ დაეუფლოთ?

- ეგ არ ვიცი, თუმცა ამ პროექტმა, როგორც დრამატურგს, გარკვეული იდეები გამიჩინა. იმაზე ვფიქრობ, როგორ მოვახდინო კრეატიული გზით მოცეკვავეების ინტეგრაცია კონფლიქტის მოგვარების საკითხებში...

- რა საინტერესოა, კონფლიქტის მოგვარებში რა როლი შეიძლება შეიტანოს მაგალითად "ჩა-ჩა-ჩამ"?

- ძალიან სერიოზული და ძალიან პოზიტიური, რაც მნიშვნელოვანია. ასე რომ, პროექტმა ამ კუთხით საინტერესო იდეები გააჩინა. ამაზე შოუს პროდიუსერებთან და ხელმძღვანელებთან მოლაპარაკებები მექნება... ნამდვილად საინტერესო რაღაცების მოფიქრება შეიძლება.

- როგორ შეეწყვეთ გოჩა ჩერტკოევს? მისი შეფასებები ბევრისთვის მტკივნეულია ხოლმე...

- მისი საუბრიდან გამომდინარე, შეიძლება ქართულ კულტურაში რაღაცეები ვერ ჯდება დიდად, მაგრამ 20 წელი ამერიკაში მაქვს გატარებული, კარგად ვიცი იქაური ურთიერთობების, თუნდაც, სლენგის შესახებ, ამ ყველაფერს პატივი უნდა ვცეთ. კი, ვიმეორებ, არსებობს ტაბუები არა მარტო ქართულში, ზოგადად კავკასიურ კულტურაში, რომელსაც არ ეხებიან ხოლმე, მაგრამ ეს ტაბუები ამერიკაში არ არის... ჩერტკოევი იქიდან გამომდინარე საუბრობს და მოქმედებს. მე გოჩასთან ურთიერთობა არ გამჭირვებია იმ გაგებით, რომ პროფესიონალია, საქმე იცის და თან მისი ენა ჩემთვის უცხო არაა. მისი სტილი, სლენგი და მიმართვის ფორმები, მე კონკრეტულად არ შემხებია. განსაკუთრებული ფრაზებით არ მომმართავდა. ყველა ცეკვაში, რაც წარმოვადგინე, როგორც შემეძლო, ჩემი თავი გამოვხატე. ამასთან, ჩემს ასაკს და ფიზიკურ მონაცემებს თუ გავითვალისწინებთ, ცხადია, გარკვეული პრობლემები ილეთების შესწავლასთან და დამახსოვრებასთან დაკავშირებით იყო, ამ საქმეში ემოციურად ნამდვილად ვიყავი გადაშვებული. მადლობა კიდევ ერთხელ ჩემს პარტნიორებს...

- "ცეკვავენ ვარსკვლავებში" ჩართვა იყო თუ არა თქვენი ეპატაჟურობის ნაწილი, რომელიც ზოგადად გახასიათებთ?

- ერთი მხრივ კი და მეორე მხრივ არა. ცეკვა გამომხატველობითი ჟანრია. მისი საშუალებით შეიძლება იმის თქმა, რომ რაღაც შეიძლება ან - არა. მოკლედ, ეს ყველაფერი იყო ძალიან საინტერესო.

- ისე ლაპარაკობთ, მგონია, რომ ამ პროექტის გარეშე მოიწყენთ...

- ის მეგობრები, რომლებიც შოუში გავიცანი, ძალიან შემიყვარდა და მართლაც მოვიწყენ მათ გარეშე, მაგრამ სხვათა შორის, ჩვენ ბარებშიც კარგად ვცეკვავთ, მშვენიერ დროს ვატარებთ. ხომ ვამბობ, ნიჭიერი და საყვარელი ხალხია და ძალიან ვაფასებ თითოეულს. ხანდახან დასვენებაც უნდა იცოდეს ადამიანმა და მინდა, რომ ახლა დავისვენო.