5
ივნისიდღის ზოგადი ასტროლოგიური პროგნოზი
ინგუშეთის დედაქალაქ მაგასში საპროტესტო აქციის მონაწილეები ისევ იკრიბებიან. ინგუშეთის ლიდერმა იუნუს ბეკ ევკუროვმა განაცხადა, რომ ჩეჩნეთსა და ინგუშეთს შორის საზღვართან დაკავშირებით გადაწყვეტილება მიღებულია და ის არ შეიცვლება. თავის მხრივ, საკონსტიტუციო სასამართლომ გამოაქვეყნა ინფორმაცია, სადაც აღნიშნულია, რომ ასეთი გადაწყვეტილების მიღება რეფერენდუმის გარეშე "ცვლის ინგუშეთის რესპუბლიკის ტერიტორიას" და ეს ადგილობრივი მოსახლეობისთვის მიუღებელია.
"უამინდობის მიუხედავად, მაგასის ცენტრში უამრავი ადამიანი შეიკრიბა... დილიდან ვრცელდებოდა ინფორმაცია, რომ შსს-ს თანამშრომლები აქციის დაშლას გეგმავდნენ, რადგან აქციები 17 ოქტომბრამდე იყო სანქცირებული... შემდეგ გაირკვა, რომ ნოემბრის დასაწყისამდე გააგრძელეს.
რამდენიმე დღის განმავლობაში, მთელ ინგუშეთში ინტერნეტი გათიშული იყო, თუმცა, ამას ხელი არ შეუშლია აქციაზე მობილიზებული ყოფილიყვნენ" - წერს სოციალურ ქსელში ადგილობრივი ამირ აუშევი, რომელიც დასძენს, რომ ნისლის მიუხედავად, მაგასის ცენტრში მაინც ზღვა ხალხი გროვდება.
Кавказский Узел-ს ცნობით, აქციის ადგილი შემოღობილია და განთავსებულია ტრაფარეტები წარწერებით, - "უფლებას არ მოგცემთ!", "უკანონო გადაწყვეტილებას - არა!"; "დეპუტატებო, გააკეთეთ სწორი არჩევანი!", "სხვისი არაფერი გვინდა და არც ჩვენსას დავთმობთ!"...
აქციაზე არიან როგორც ახალგაზრდები, ასევე უფროსი თაობის წარმომადგენლები, რომლებიც კიდევ ერთი საქმის გამო გამოხატავენ პროტესტს - რამდენიმე დღის წინ, ჩეჩნეთის ლიდერმა, რამზან კადიროვმა ინგუში უხუცესები შეხვედრაზე უხეში ფორმით დაიბარა, რასაც მათი მხრიდან აღშფოთება მოჰყვა... ამის შემდეგ, კადიროვი ინგუშეთის სოფლებში თავად ჩავიდა იმ უხუცესებთან შესახვედრად, რომლებიც მაგასსში გამართულ აქციებზე ჩეჩნეთის ლიდერს მწვავედ აკრიტიკებდნენ. მათ შორის იყო ერთ-ერთი ყველაზე ავტორიტეტული უხუცესი, ნალგიევი... კადიროვის თქმით, მათ ერთმანეთს ბოდიში მოუხადეს და "ურთიერთობა დაალაგეს".
"ინგუშეთის შსს-მ აქციის მონაწილეები გააფრთხილა იარაღის გარეშე შეიკრიბონ. წინააღმდეგ შემთხვევაში, კანონის ფარგლებში იმოქმედებენ... ეს ერთგვარი გაფრთხილებაა - ისედაც მშვიდობიანი აქციის ჩატარებას ვგეგმავდით. აქციის ორგანიზატორების თქმით, მასშტაბური აქცია 1-2 ნოემბრისთვის იგეგმება, რადგან ოფიციალური ნებართვა გვექნება, - სხვა შემთხვევაში, შესაძლოა ხელისუფლება რაღაც პროვოკაციებზე წამოვიდეს," - წერს ადგილობრივი ჟურნალისტი იზაბელა ევლოევა, რომელსაც შეკრების ადგილიდან პირდაპირი ჩართვები ჰქონდა.
"რა იქნება ჩვენი ნაბიჯები? - მშვიდობიანი აქციები. საკონსტიტუცო სასამართლომ უკვე თქვა თავისი სიტყვა, ახლა ხალხის ჯერია, რომელიც დათმობას არ აპირებს. საჭიროა რეფერენდუმის ჩატარება, შემდეგ კი, ევკუროვის ხელისუფლება უნდა გადადგეს, შესაბამისად მის მიერ გაფორმებული მოღალატური შეთანხმებაც გაუქმდება," - აცხადებს აქციის ერთ-ერთი ორგანიზატორი ბარახ ჩემურზიევი.
"რა სურს კადიროვს, ჩეჩნეთ-ინგუშეთის გაერთიანება და გავლენების გაფართოება? ამას ვერ დავუშვებთ და ჯობია თავიდანვე შეეგუოს ამას. გასაგებია, რომ კადიროვი კრემლის მხარდამჭერით სარგებლობს, მაგრამ ერთხელ უკვე ვთქვით - არ დავთმობთ!.." - წერენ ინგუშები სოციალურ ქსელებში.
"სამოქალო მოძრაობის" წარმომადგენელის და უფლებადამცველის, სვეტლანა განიუშკინას თქმით, იგნუშეთი ჩეჩნეთთან აგებს, რადგან კადიროვი ყოველდღიურად აზიანებს ევკუროვის იმიჯს.
"კადიროვი ინგუშეთში ევკუროვთან კი არა, უხუცესებთან სასაუბროდ ჩავიდა, რამაც კიდევ უფრო დააზარალა ინგუშეთის ლიდერის იმიჯი. კადიროვი მას არც კი შეხვედრია, აბსოლუტურ ინგორირებას უკეთებს. არადა, ხალხს, პირველ რიგში ევკუროვთან აქვს პრობლემები...
კადიროვს არც არავის სტატუსი აინტერესებს და არც ხალხის მოსაზრება. ისე იქცევა, როგორც სურს... საერთოდ, ჩენჩეთის ლიდერი წინააღდეგი არ არის ეს ორი რესპუბლიკა მისი მმართველობის ქვეშ გაერთიანდეს... ეს ყველაფერი ამას ემსახურება. ამ ყველაფერში პუტინის ხელისუფლების როლიც მნიშველოვანია - რუსეთი შორიდან აკვირდება ვითარებას, რაც კადიროვის მიზნის ერთგვარი მხარდაჭერაა," - წერს განიუშკინა.
გამოცემა Кавказ Реалии-ის მოჰყავს ტვერელი ჟურნალისტის ალექსეი პოლუხინის ციტატა, რომლის თქმითაც, კადიროვს ისტორიაში შესვლა სურდა ჩეჩნეთის საზღვრების გაფართოების ხარჯზე. "მან შესაძლოა იფიქრა, რომ შევიდოდა რესპუბლიკის ისტორიაში, როგორც მმართველი, რომლის ქვეყანაშიც მშვიდობაა, არ არიან ჰომოსექსუალები და საზღვრები გაფართოვებულია", - ვკითხულობთ Кавказ Реалии-ის სტატიაში.
