"პატივს ვცემ ივანიშვილების ოჯახს, მაგრამ წლებია დაკარგული გვყავს ერთმანეთი" - თამრიკო ჭოხონელიძე ნათლულის ქორწილში არ დაპატიჟეს

11 ნოემბერს ბიძინა ივანიშვილის ოჯახში განსაკუთრებული დღეა - ბერა ივანიშვილი კოჯორში მდებარე კურორტ "ბიოლის" ტერიტორიაზე ქორწილს გადაიხდის. რეპერის რჩეული ყოფილი მოდელი ნანუკა გუდავაძეა.

წყვილი სექტემბერში დაინიშნა და მას შემდეგ საქორწინო მოგზაურობაში გამგზავრებაც მოასწრო. ბერა და ნანუკა ახლა კალიფორნიაში იმყოფებიან, საიდანაც თბილისში დაბრუნდებიან. ქორწილი 120 ადამიანზე იქნება გათვლილი, სადაც მიწვეული იქნებიან წყვილის ოჯახის უახლოესი ადამიანები. თუმცა, როგორც გაირკვა ქორწილში არ დაპატიჟეს ბერა ივანიშვილის ნათლია, მომღერალი თამრიკო ჭოხონელიძე.

AMBEBI.GE დეტალების გასარკვევად მომღერალს დაუკავშირდა.

- ქალბატონო თამრიკო, რატომ არ დაგპატიჟათ ბერამ ქორწილში?

- ბერას მხოლოდ "ოცნების" აქციებზე ვნახულობდი. ჩვენ ისედაც არ გვაქვს ურთიერთობა... სამწუხაროდ, პირველი ადამიანი არ ვარ, ვინც დაკარგული ყავს ამ ოჯახს. მე იმ კატეგორიას არ ვეკუთვნი, ვინმეს ძალით შევახსენო თავი. არც მქონია ილუზია, რომ ბერა ქორწილში დამპატიჟებდა.

- რის შემდეგ შეწყდა თქვენი და ბიძინა ივანიშვილის ოჯახების ახლობლობა? თქვენი მეუღლის - გია როინიშვილის „ნაციონალურ მოძრაობაში“ ყოფნას ხომ არ უკავშირდება ეს?

- არა სხვათაშორის, დიდი ხანია ჩვენ ერთმანეთთან ურთიერთობა აღარ გვაქვს, თუმცა მიკვირს ეს ასე რატომ ხდება. ალბათ მისმა გარემოცვამ ითამაშა ასეთი როლი ჩვენს ურთიერთობაში და არანაირი კონტაქტი აღარ გვაქვს. ბავშვებსაც კი არ აქვთ ერთმანეთთან ურთიერთობა. მე ძალიან დიდ პატივს ვცემ ივანიშვილების ოჯახს, მათგან მხოლოდ კარგი ვიცი, მაგრამ წლებია დაკარგული გვყავს ერთმანეთი.

- ქალბატონო თამრიკო, ცნობილი გახდა, რომ თქვენ და გია როინიშვილი შერიგდით, მართალია?

- ძალიან ბევრს უნდოდა ჩვენი შერიგება, დრომ თავისი გაიტანა. ის ბრაზი, რომელმაც გადამაწყვეტინა ოჯახისთვის წერტილი დამესვა, უფრო დალაგდა, გადავაფასეთ ღირებულებები, ახლა უკვე შვილები და შვილიშვილები გვყავს საზრუნავი და ერთად ვჩნდებით საზოგადოებაში.

- ერთად ცხოვრობთ?

- ერთ ჭერქვეშ ცხოვრება კიდევ სხვა რამეა. ახლა ასე ჯობია, ჩათვალეთ რომ შევრიგდით.