აშშ-ში დაბადებით უცხოელები და არალეგალი მიგრანტები ქვეყნის მოქალაქეობას ვეღარ მიიღებენ? - რას გეგმავს ტრამპი

აშშ-ს პრეზიდენტი დონალდ ტრამპი აპირებს, გააუქმოს კანონი, რომლის მიხედვითაც უცხოელებისა და არალეგალი მიგრანტების შვილები, რომლებიც აშშ-ის ტერიტორიაზე იბადებიან, ავტომატურად აშშ-ის მოქალაქეები ხდებიან. გამოცემა Axios-ის ინფორმაციით, ამის შესახებ ტრამპმა გადაცემა „Axios on HBO“-ში განაცხადა.

„მე სულ მეუბნებოდნენ, რომ ამისთვის საჭიროა კონსტიტუციის შეცვლა. გამოიცანით, რა? - ეს არ არის საჭირო. საკმარისია მხოლოდ პრეზიდენტის ბრძანებაც“, - განაცხადა ტრამპმა.

აშშ-ის პრეზიდენტის განცხადებით, ის ამ საკითხზე ფიქრობს და ეს აუცილებლად მოხდება.

„ჩვენ ვართ მსოფლიოში ერთადერთი ქვეყანა, სადაც შეიძლება ადამიანი ჩავიდეს, ბავშვი გააჩინოს და შემდეგ ეს ბავშვი ავტომატურად იღებს მოქალაქეობას და 85 წლის მანძილზე სარგებლობს ყველა უპირატესობით. ეს უბრალოდ სასაცილოა და უნდა დასრულდეს“, - აღნიშნა ტრამპმა.