ნათია მეზვრიშვილი 8 წლის გოგონას მკვლელობაზე - "შეშფოთებულები ვართ იმ მითქმა-მოთქმით, რაც ამ საქმის გარშემო მიმდინარეობს"

შეშფოთებულები ვართ იმ მითქმა-მოთქმით, რაც ამ საქმის გარშემო საზოგადოების სხვადასხვა წევრების მხრიდან მიმდინარეობს“, – ამის შესახებ შს მინისტრის მოადგილემ ნათია მეზვრიშვილმა განაცხადა.

მინისტრის მოადგილე ნათია მეზვრიშვილმა ჟურნალისტებთან, გორში დატრიალებულ ტრაგედიაზე კომენტარი გააკეთა. მისი თქმით, შემაშფოთებელია ამ საქმის გარშემო მიმდინარე საუბრებით. მინისტრის მოადგილემ საზოგადოებას მოუწოდა, პირველ რიგში ოჯახის ინტერესები გაითვალისწინონ.

"მიუხედავად იმისა, რომ ამ საქმის მიმართ მაღალი საზოგადოებრივი ინტერესი არსებობს, შინაგან საქმეთა სამინისტრო შეგნებულად ამ საქმეზე იმაზე მეტ დეტალს, ვიდრე გავასაჯაროეთ, არ ვასაჯაროებთ. გულწრფელად მინდა გითხრათ, რომ შეშფოთებული ვართ იმ მითქმა-მოთქმით, რაც ამ საქმის გარშემო რეალურად ახლაც, ამ წუთებშიც მიმდინარეობს საზოგადოების სხვადასხვა წევრების მხრიდან. უმორჩილესად გთხოვთ, მოვუწოდებთ საზოგადოებას, რომ პირველ რიგში გამოვიდეთ ოჯახის ინტერესებიდან და იმ ადამიანებს, ვინც ამ ფაქტებს აშუქებენ და იმ ადამიანებს, ვინც რაიმე ტიპის ინფორმაცის ფლობს ამ საქმესთან დაკავშირებით, თავი შევიკავოთ ისეთი ინფორმაციის გავრცელებისგან, რამაც შეიძლება ოჯახი დააზიანოს" – განაცხადა მეზვრიშვილმა.

შეგახსენებთ, გორში 25 ოქტომბერს, შუადღისას გაუჩინარებული 8 წლის გოგონა გარდაცვლილი იპოვეს. ბავშვის ცხედარი სამართალდამცავებმა წმინდა წყლის დასახლების ტერიტორიაზე ნახეს, მდინარე ლიახვის ნაპირას.

შინაგან საქმეთა სამინისტრომ გოგონას სასტიკ მკვლელობაში ბრალდებული გორში, ცხელ კვალზე დააკავა. უწყებამ დაკავების კადრებიც გაავრცელა. 1984 წელს დაბადებული მამაკაცი, წარსულში ნასამართლევია.