"თუ ის ვერ დაასაბუთებს თავის ქონებას, ვიქნები პირველი, ვინც მოითხოვს, რომ მთელი სიმკაცრით აგოს პასუხი" - ივანიშვილი ფარცხალაძეზე

თუ გამოძიების შემდეგადაც დარჩება კითხვის ნიშნები, მე ვიქნები პირველი, ვინც მოითხოვს, რომ კანონის მთელი სიმკაცრით აგებს ფარცხალაძე პასუხს, - ამის შესახებ საქართველოს ყოფილმა პრემიერ-მინისტრმა, პარტია „ქართული ოცნება - დემოკრატიული საქართველოს“ თავმჯდომარემ, ბიძინა ივანიშვილმა ჟურნალისტებთან შეხვედრისას განაცხადა.

ყოფილი გენერალური პროკურორის შემოსავლებთან დაკავშირებით არსებულ კითხვებზე ივანიშვილის პოზიციით „პალიტრანიუსის“ ჟურნალისტი ემა ტუხიაშვილი დაინტერესდა. მან ბიძინა ივანიშვილს ჰკითხა, აქვს თუ არა თავადაც კითხვები ოთარ ფარცხალაძის შემოსავლებთან დაკავშირებით.

„წინა ხელისუფლების პერიოდში დავით კეზერაშვილი იქცა „ნაციონალური მოძრაობის“ ხელისუფლების ელიტური კორუფციის სიმბოლოდ. ეს იყო ადამიანი, რომელიც დაინიშნა ფინანსური პოლიციის ხელმძღვანელად, შემდეგ იყო თავდაცვის მინისტრი და თანამდებობიდან წასვლის შემდეგ მოულოდნელად გახდა მულტიმილიონერი. იგივე მოხდა ფარცხალაძის შემთხვევაში. ეს ადამიანი იყო ფინანსური პოლიციის ხელმძღვანელი, შემდეგ 2 თვის განმავლობაში მთავარი პროკურორი და მთავარი პროკურორობიდან როდესაც წამოვიდა, დღეს ვხედავთ, რომ საკმაოდ დიდი ქონების ადამიანია. მიუხედავად ამისა, თქვენ ახსენეთ, რომ მისმა ადვოკატმა ყველა შეკითხვას გასცა პასუხი, თუმცა, მისი ადვოკატი ვერ ასახელებს ოთარ ფარცხალაძის შემოსავლებს. მან დაასახელა თვითმფრინავების ნაწილების მწარმოებელი ქარხანა, რომელიც საპარტნიორო ფონდთან ერთად შეიქმნა და ეს ქარხანა ჯერ პროდუქციას არ უშვებს. შესაბამისად, ისმის კითქვა - ქარხანა, რომელიც არ ფუნქციონირებს, როგორ აძლევს ფარცხალაძეს შემოსავლებს. თქვენ ფარცხალაძის შემოსავლებთან დაკავშირებით შეკითხვები არ გიჩნდებათ?", - იკითხა ტუხიაშვილმა, რაზეც ბიძინა ივანიშვილმა უპასუხა:

„პირდაპირი პარალელის გავლება კეზერაშვილსა და ფარცხალაძეს შორის რთულია. ფარცხალაძე 5 წელია, რაც ხელისუფლებიდან წავიდა და გადადგა საკუთარი სურვილით, როცა ეჭვები გაჩნდა მის წარსულთან დაკავშირებით. 5 წელია ცდილობს ბიზნესი აკეთოს. რა თქმა უნდა, არის კითხვები, რომ ის ოდესღაც თანამდებობის პირი იყო და ახლა ბიზნესს აკეთებს, ამიტომ ჟურნალისტებს უნდა გქონდეთ მახვილი მზერა, რომ არაფერი გამოგეპაროთ - ან ძველი პერიოდის შემთხვევაში ხომ არ დააგროვა მან ქონება, ან ახლა ხომ არ იყენებს თავის სამეგობროსთან კავშირებს, რამეთუ პროკურატურაში მუშაობდა?! კითხვები არის აბსოლუტურად ლოგიკური და გეთანხმებით რომ ამ კითხვებს პასუხები უნდა გაეცეს. მათ რიცხვში, მე მაქვს ვალდებულება, რომ გიპასუხოთ. დამახინჯებული, გაზვიადებული ბრალდებები ამ ფარცხალაძესთან, რასაც ცდილობს ოპოზიცია, რომ ფარცხალაძე ჩემთან კოორდინირდება, სარდაფში ხალხი დაყავს და გაუპატიურებით ცდილობს, რაც ეცადნენ ჩანაწერებში, რაც სიმართლეს არ შეეფერება, ამით ნუ დავამძიმებთ“, - განაცხადა ივანიშვილმა.

ყოფილმა პრემიერმა ოთარ ფარცხალაძისა და ყოფილი გენერალური აუდიტორის, ლაშა თორდიას ჩხუბის ფაქტიც გაიხსენა და აღნიშნა, რომ ამ საქმეს პროკურატურა საზღვარგარეთიდან მოწვეულ პროკურორებთან ერთად განიხილავს და ყველა კითხვას პასუხი გაეცემა.

„ასევე მახსენებენ სამოქალაქო ორგანიზაციების წარმომადგენლები რესტორანში მომხდარ ინცინდენტს, აუდიტის სამსახურის თავმჯდომარეს, თორდიასა და ფარცხალაძეს შორის. იქ მე კითხვას ვუსმავ, რაზეც მათ პასუხი არ აქვთ. თორდია მაშინ მოვალეობას ასრულებდა, სამსახურის უფროსი იყო, იყო მთვრალ მდგომარეობაში და არანაკლებ აგრესიულად იქცეოდა, ვიდრე ფარცხალაძე და ეს საქმე დღემდე გარჩეული არ არის. ფხიზელმა ფარცხალაძემ მთვრალ თორდიას თუ როგორ აუტეხა დებოში, ამაშიც მე არ ვეთანხმები.

ჩვენ დავაწესეთ პრაქტიკა, როდესაც ხელისუფლებაში მოვედით, პროკურატურა იყო ძალიან მძიმე დასალაგებელი, მოვიწვიეთ საღვარგარეთიდან რამდენიმე გამოცდილი პროკურორი. საზღვარგარეთიდან მოწვეული ცნობილი პროკურორები მონაწილეობენ გახმაურებულ საქმეებში. ერთ-ერთი ასეთი პროკურორი იყო ისრაელიდან, რომელმაც თავისი პრინციპულობით მოახერხა და ისრაელის პრემიერ-მინისტრი და პრეზიდენტი მისცა პასუხისგებაში. ასეთი პროკურორები განიხილავენ თორდიას ჩხუბის ფაქტს და ფინანსურ დარღვევებზე საქმეებს, რაზეც აღძრულია საქმე. თუ ასეთი პროკურორების ჩართვის შემდეგაც მაინც დარჩებით კრიტიკულები, მეც თქვენთან ერთად ვიქნები. თუ დადგება იქ რაიმე კითხვის ნიშნები, მე ვიქნები პირველი ვინც მოითხოვს, რომ კანონის მთელი სიმკაცრით აგებს ფარცხალაძემ პასუხს. თუ ის ვერ დაასაბუთეს თავის ქონებას, გარწმუნებთ, რომ მე ვიქნები ლიდერებში, ვინც მოითხოვს და გაამაგრებს თავისი გამოსვლებით სახელმწიფო სტრუქტურებს, რომ მან ისევე აგოს პასუხი თავის ქმედებებზე, როგორც ნებისმიერმა მოქალაქემ. და თუ ეს ასე არ არის, მაშინ გამოვიყენოთ უდანაშაულობის პრეზუმპცია“, - განაცხადა ივანიშვილმა.

ბიძინა ივანიშვილი ფარცხალაძე-ყიფიანის დაპირისპირების თემასაც შეეხო და აღნიშნა, რომ "მე არ ვიცი, რეალურად რა მოხდა, დავიფიცებ ვისთანაც გინდათ და როგორც გინდათ; არც საქმე გამირჩევია და რატომ დავუჭერდი ფარცხალაძეს მხარს, როდესაც ყიფიანი იყო ჩემი კუმირი, დათო ყიფიანი".

ივანიშვილის მტკიცებით, მან არ იცის რეალურად რა მოხდა ყოფილ მთავარ პროკურორს, ოთარ ფარცხალაძესა და სპორტის ყოფილ მინისტრს, ლევან ყიფიანს შორის.

„ერთია ჩანაწერები, რომლის ავთენტურობაც არ დასაბუთდა არც ლონდონში და არც, რა თქმა უნდა, ჩვენმა ბიურომ არ დაასაბუთა; მაგრამ მთავარია ის, რომ რაც ამ ჩანაწერებში იყო, იმასაც როგორ დამახინჯებულად გადმოსცემდნენ „რუსთავი 2“-ელები. ერთს ამბობს გაბუნია, სანამ ჩანაწერების ჩვენება დაიწყება, ჩანაწერებში კი, აბსოლუტურად განსხვავებული ხმები ისმის და განსხვავებული შედეგი იხატება. ჩანაწერებიდან იკვეთება, რომ ყიფიანი მივიდა ოფისში ფარცხალაძესთან, შეაგინა და ფარცხალაძემ დაარტყა თუ სცემა. იმასაც ცდილობენ, რომ ის ორი მონაწილე {ფარცხალაძე და ყიფიანი} როგორმე ჩემამდე მოეყვანათ მათი ინტერპრეტაციებით. ესეც არ იკვეთება, რომ ჩემამდე მოვიდა, მაგრამ თურმე ივანიშვილმა გადაწყვიტა და ყიფიანს უთხრა, რატომ შეაგინა. მე არ ვიცი, რეალურად რა მოხდა, დავიფიცებ ვისთანაც გინდათ და როგორც გინდათ. არც საქმე არ გამირჩევია და როგორ უნდა გამერჩია, თქვენ როგორ წარმოგიდგენიათ?! - მერე რატომ დავუჭერდი ფარცხალაძეს მხარს, თუ ასეთ თანაბარ სიტუაციაში წავიდოდა გარჩევა, როდესაც ყიფიანი იყო ჩემი კუმირი, დათო ყიფიანი. მე გავიზარდე და ჩემს ახალგაზრდობაში მთელი ჩემი თაობა თბილისის „დინამოზე“ იყო შეყვარებული და დათო ყიფიანზე. მეც არ ვიყავი გამორჩეული და ფარცხალაძეს მხარს რატომ დავუჭერდი, თუ ამის მსგავსი იყო?! მაგრამ თვითონ ის ფაქტი, რომ ჩემგან ორგანიზებული რეკეტი მიდის, რასაც გადმოსცემდნენ, მე ამ საქმეებს ვარჩევ, ეს არაფერი იქ არ ისმოდა. გაუპატიურება ახსენეს, სარდაფს ამბობდნენ, გაუპატიურებას ცდილობდნენო, არსად არ აისახება ეს. არ აისახება არც იმ ჩანაწერებში, არ აისახება ყიფიანის შემდგომ ჩვენებებში, რაც პროკურატურამ გამოაქვეყნა. აი, ასე ამახინჯებდნენ“, - განაცხადა ივანიშვილმა.

ჟურნალისტი ვახო ხუზმიაშვილი ბიძინა ივანიშვილისგან დაინტერესდა, სჯერა თუ არა მას ყიფიანის ნათქვამი, რომ „ზაზა ოქუაშვილი მას მხატვრულ კითხვაში ამეცადინებდა“.

„გამოდის, რომ სპორტის ყოფილი მინისტრი არ არის ჯანმრთელი ადამიანი“, - მიმართა ივანიშვილს ხუზმიაშვილმა.

ამასთან დაკავშირებით ბიძინა ივანიშვილმა განაცხადა, რომ მისთვის ყიფიანის განმარტება არ არის სანდო.

„ეს არის ყველაზე მძიმე კითხვა. ამ კაცზე მე ვარ ძალიან გაბრაზებული და მაქვს მსგავსი პრეტენზიები, როგორ იყო ეს კაცი საერთოდ მინისტრი?! ჩემ დროს იყო ეგ მინისტრი. ის განცხადებები, რასაც ის აკეთებს, თუნდაც პროკურატურაში, ისეთივე ნდობას იწვევს ჩემში, როგორც ეს ჩანაწერები. უარღესად გაღიზიანებული და გაბრაზებული ვარ. რას აკეთებს, რას ყვება, ან ინტერვიუში, აბსოლუტურად არ არის შესატყვისობაში სიმართლესთან. ყიფიანს აბსოლუტურად არ ჰქონდა საშუალება ევლო ჩემთან, ან ფარცხალაძეს ევლო და მაგათი ჩხუბები მერჩია. როგორ წარმოგიდგენიათ თქვენ, რომ რაღაც ბიზნესში ვიღაცეები წაეკიდნენ, მორბიან ჩემთან და მე ვარჩევ მაგათ საქმეებს? მე ამის ფუფუნება არ მაქვს. ეს მხოლოდ „რუსთავი 2“- ს სჯერა. როგორ ახსენებს ეს კაცი ჩემს სახელს საერთოდ? მართალია პირდაპირ არ ამბობს, მაგრამ მინიშნებით შეიძლება ამის ამოცნობა. ყიფიანთან დაკავშირებით ბოლომდე თუ წაიკითხავვთ მის ნათქვამს, იკვეთება, რომ ყიფიანი ოქუაშვილის ნაცვლად მივიდა ფარცხალაძესთან, შეამოწმეს, რაიმე ჩამწერი ხომ არ აქვსო, არავითარი გაუპატიურება და სარდაფი არ ყოფილა. ყიფიანმა შეაგინა, რასაც თავადვე ამბობს და ქართველი კაცისთვის შეგინებაზე რეაქცია როგორია იცით. ეს ჩანს ჩანაწერებიდან“, - განაცხადა ბიძინა ივანიშვილმა.