ამერიკული განათლება საქართველოში - როგორ აფასებს ვებსტერის უნივერსიტეტის ქართველი კურსდამთავრებული ამერიკული განათლების საქართველოში დანერგვას

ამერიკული განათლების სისტემა მსოფლიოში ერთ-ერთი მოწინავეა და უამრავი საერთაშორისო სტუდენტი სწორედ ამერიკულ უნივერსიტეტებს ანიჭებს უპირატესობას. სწორედ ამიტომ წამყვანი ამერიკული უნივერსიტეტების უმრავლესობამ კამპუსები სხვადასხვა კონტინენტსა და ქვეყნაში გახსნა, რაც მათ პროგრამებზე ხელმისაწვდომობას ზრდის.

ზოგადად, ამერიკული განათლების სისტემის ძირითადი უპირატესობა არის სწავლების ტრადიციულად მაღალი ხარისხი და სპორტული აქტივობებისთვის დათმობილი დიდი დრო. აღსანიშნავია ისიც, რომ ამერიკული განათლება განსაკუთრებულად ძლიერია ჟურნალისტიკის, მარკეტინგის, მენეჯმენტის და ბიზნეს ადმინისტრირების პროგრამებში.

საქართველოშიც არიან სტუდენტები, რომლებიც ამერიკულ განათლებას ანიჭებენ უპირატესობას და თვლიან, რომ მათი კარიერული წარმატების საწინდარი სწორედ ესაა. ერთ-ერთი მათგანია ირინა მირიანაშვილი, რომელმაც ვებსტერის უნივერსიტეტის ვენის კამპუსში ბიზნეს ადმინისტრირების საბაკალავრო პროგრამა დაამთავრა და ახლა საქართველოში Silk Road Group-ში სხვადასხვა პროექტებზე მუშაობს. ამჟამად ირინა წინანდლის „რადისონის“ პროექტზე მუშაობს.

„ვებსტერის უნივერსიტეტში სწავლა გადავწყვიტე, რადგან ამერიკული სკოლაა. ვენის კამპუსზე კი არჩევანი იმიტომ შევაჩერე, რომ ეს იყო შუაგული ევროპა, სადაც უამრავი ქვეყნის წარმომადგენელი იკრიბება. მისი უპირატესობა ისიც არის, რომ პატარა კლასებია და უფრო მყარი კონტაქტებისა და ურთიერთობების დამყარების საშუალებას იძლევა როგორც სტუდენტებთან, ისე ლექტორებთან. პროფესროები იყვნენ ისეთი ადამიანები, რომლებიც საკუთარ საქმეში უკვე წარმატებულები არიან. მათი გამოცდილების გაზიარება კი სტუდენტებისთვის ძალიან მნიშვნელოვანია,“ - განმარტავს ირინა მირიანაშვილი.

ვებსტერის უნივერსიტეტის დამთავრების მერე ირინამ სამშობლოში დაბრუნება და აქ დასაქმება გადაწყვიტა. მისივე თქმით, ვებსტერის უნივერსიტეტში მიღებული განათლება ძალიან დაეხმარა წარმატებით დასაქმებაში.

„ვებსტერის უნივერსიტეტში გატარებული 4 წლის განმავლობაში დიდ თეორიულ ცოდნასთან ერთად, უამრავი ისეთი უნარ-ჩვევა გამომიმუშავდა, რაც კარიერის განვითარებაში ძალიან მნიშვნელოვანია. იქ სწავლა სტუდენტებს აჩვევს დისციპლინას, უვითარებს პასუხისმგებლობის გრძნობას, ასწავლის დროის სწორად გადანაწილებას, ახალი დავალებების შესრულების შესაძლებლობას. თეორიულ ცოდნასთან ერთად ეს ყველაფერი გეხმარება, რომ ახალ სამსახურში ახალ გამოწვევებს თამამად შეხვდე. ვებსტერის უნივერსიტეტი ცხოვრებაში ყველაფრისთვის გამზადებს,“ - აღნიშნავს ირინა მირიანაშვილი.

საინტერესოა ისიც, რომ ამერიკული განათლების სისტემის საქართველოში შემოღებას მოწინავე ქართული უნივერსიტეტებიც ცდილობენ. სულ ახლახანს ბიზნესისა და ტექნოლოგიების უნივერსიტეტმა თანამშრომლობის მემორანდუმი გააფორმა სწორედ ვებსტერის უნივერსიტეტთან. ღონისძიებას ირინაც ესწრებოდა და ძალიან კმაყოფილია, რომ ქართული უნივერსიტეტები ამერიკული განათლების დანერგვით ინტერესდებიან.

„ძალიან მნიშვნელოვანია ვებსტერის უნივერსიტეტისა და ბიზნესისა და ტექნოლოგიების უნივერსიტეტის თანამშრომლობა. ამერიკული პროგრამების საქართველოში განხორციელება განსაკუთრებით საინტერესოა იმ ადამიანებისთვის, რომლებიც გარკვეული მიზეზების გამო საზღვარგარეთ წასვლას ვერ ახერხებენ. კარგია, რომ ამ შესაძლებლობას BTU შესთავაზებს სტუდენტებს. მსგავსი თანამშრომლობა ქართულ უნივერსიტეტებს უკეთესი პროგრამების შექმნისა და სტუდენტებისთვის უკეთესი განათლების მიცემის შესაძლებლობას მისცემს. გვეყოლება უკეთესი კადრები, რომლებიც როგორც ადგილობრივ, ისე საერთაშორისო ბაზარზე დასაქმდებიან. მეორე მხრივ კი, ქართული განათლების სისტემა საერთაშორისო დონეზე გახდება ცნობილი და მისი საერთაშორისო აღიარება მოხდება. საერთაშორისო სტუდენტების მოზდივაც მოხდება. ზოგადად კი, რაც მეტი ქვეყნის წარმომადგენელთან გაქვს ურთიერთობა, მით უფრო ფართოა ადამიანის მსოფლმხედველობა. მათ კულტურას ეზიარები, ენას სწავლობ და საბოლოოდ ბევრ ქვეყანაზე გექმნება ზოგადი წარმოდგენები,“ - განმარტავს ირინა მირიანაშვილი.

ვებსტერის უნივერსიტეტისა და ბიზნესისა და ტექნოლოგიების უნვერსიტეტს შორის გაფორმებული მემორანდუმის ფარგლებში ორი უნივერსიტეტი ერთობლივ პროგრამას კომპიუტერულ მეცნიერებებსა და კიბერუსაფრთხოებაში შეიმუშავებს.

ვებსტერის უნივერსიტეტის ვიცე პრეზიდენტის ჯულიან ჩუსტერის შეფასებით, შეთანხმება ქართველი სტუდენტებისთვის ახალი შესაძლებლობაა.

„მოხარული ვარ, რომ ჩვენს შორის გაფორმდა თანამშრომლობის მემორანდუმი და ორი დიდი უნივერსიტეტი გავხდით აქტიური პარტნიორები. ეს არის ახალი შესაძლებლობა ქართველი სტუდენტებისთვის, რომ მათ უკეთ მოახდინონ საკუთარი თავის რეალიზება მსოფლიო ტექნოლოგიურ სამყაროში. რეგიონთან თანამშრომლობით, ჩვენ ბიზნესისა და ტექნოლოგიების უნივერსიტეტით დავინტერესდდით, როგორც სტრატეგიული პარტნიორი“, - აღნიშნავს Webster - ის ვიცე-პრეზიდენტი.

ერთობლოვი პროგრამის მნიშვნელობაზე ამახვილებს ყურადღებას ბიზნესისა და ტექნოლოგიების უნივერსიტეტის რექტორი. როგორც ანდრო რურუამ განაცხადა, აღნიშნული მემორანდუმი კიდევ ერთი დასტურია,რომ ბიზნესისა და ტექნოლოგიების უნივერსიტეტი ჩამოყალიბდა სანდო პარტნიორად არა მხოლოდ უცხოური კომპანიებისთვის,არამედ წამყვანი საერთაშორისო უნივერსიტეტებისთვის, რომლებიც ჩვენი რეგიონის მიმართ ინტერესს გამოხატავენ. ეს არის BTU-ს ინტერნაციონალიზაციის მიმზანმიმართული პოლიტიკის შედეგი და უნივერსიტეტის სტაბილური განვითარებისდიდი სტიმულია.

„ჩვენ გავაფორმეთ მემორანდუმი, რომელიც ჩვენს სტუდენტებს შესაძლებლობას მისცემს, ცოდნა და გამოცდილება მიიღონ ისეთი მაღალი დონის წამყვან უნივერსიტეტში, როგორიც Webster -ია. აღსანიშნავია პროგრამის მნიშვნელობაც, ვინაიდან დღეს საკმაოდ აქტუალურია კიბერსუსაფრთხოება და ბუნებრივია, რომ ამ შეთანხმების შედეგად, სტუდენტები უფრო მაღალი ხარისხის განათლების მიღებას შეძლებენ“, - აღნიშნა ანდრო რურუამ.

აღსანიშნავია, რომ ფორბსის უნივერსიტეტების 2018 წლის ტოპ რეიტინგში შესული ვებსტერის უნივერსიტეტი დაარსების დღიდან, 1915 წლიდან ლიდერობს და დღეს ფლობს კამპუსებს ჩრდილოეთ ამერიკის, ევროპის, აზიისა და აფრიკის კონტინენტებზე. 2017 წელს, საზღვარგარეთ განხორციელებული პროგრამებით, ვებსტერი აშშ-ს #4 სასწავლებელი გახდა "ამერიკის საუკეთესო უნივერსიტეტების’’ რეიტინგში, სადაც აშშ-ს 1500 სასწავლებლიდან მხოლოდ 44 მოხვდა. ვებსტერის რეპუტაციას განაპირობებს მრავალი გავლენიანი სარეიტინგო სისტემების მიერ, მისი როგორც აშშ-ს ერთ-ერთი საუკეთესო სასწავლების წარმოჩენა. ესენია: Washington Monthly, College NET, National Council for Accreditation of Teacher Education (NCATE), College Choice, AccreditedSchoolsOnline.org, Military Times და სხვა.