საქართველოში აცივდება, ზღვაზე შტორმს, მდინარეებზე - წყლის დონის მატებას ელოდებიან

25 ოქტომბრიდან 27 ოქტომბრის დილამდე საქართველოში მოსალოდნელია ცივი და ნოტიო ჰაერის მასების გავრცელება, წვიმა ელჭექით, ზოგან ძლიერი. გარემოს ეროვნული სააგენტოს ინფორმაციით, 26-27 ოქტომბერს ჰაერის ტემპერატურა მნიშვნელოვნად დაიკლებს, მაღალ მთაში - თოვლი, ზოგან კი ძლიერი ქარია მოსალოდნელი. ზღვაზე შესაძლებელია 4-5 ბალიანი შტორმი.

მოსალოდნელმა ძლიერმა ნალექებმა, შესაძლებელია, საქართველოს მდინარეებზე წყლის დონის მნიშვნელოვანი მატება, პატარა მდინარეებზე წყალმოვარდნები, ხოლო ქვეყნის მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს.