"გამტაცებლებმა ვიდეო გადაუღეს, რომელიც მამისთვის უნდა გაეგზავნათ..." - რას ყვება პროკურორი ბიზნესმენის შვილის გატაცების საქმეზე

ბიზნესმენ ამირან დეკანოიძის შვილის, გიორგი დეკანოიძის გატაცებაში ბრალდებულებს აღკვეთის ღონისძიების სახით პატიმრობა შეეფარდათ. მოსამართლემ სრულად დააკმაყოფილა ბრალდების მხარის შუამდგომლობა და კალისტრატე ერქვაიას, მამუკა მარგველაშვილს, გოჩა ჩეჩელაშვილს, თემურ კენჭაძეს, მამუკა ესაძეს აღკვეთის ღონისძიების სახით პატიმრობა შეუფარდა.

დაცვის მხარე ბრალდებულების მიმართ ნაკლებად მკაცრი აღკვეთის ღონისძიების გამოყენებას ითხოვდა, თუმცა მოსამართლემ დაცვის არგუმენტები არ გაიზიარა.

1995 წელს დაბადებული გიორგი დეკანოიძის გატაცების საქმის მასალების მიხედვით ირკვევა, რომ გამტაცებლების თანამზრახველები ოკუპირებულ აფხაზეთში არიან გადასულები. აღნიშნულ დეტალებზე საქმის პროკურორმა ბექა ხუნაშვილმა სასამართლოზე ისაუბრა.

პროკურორის ინფორმაციით, წყალტუბოში გადაყვანამდე გიორგი დეკანოიძე მოტყუებით მუხიანში, ნაქირავებ ბინაში აიყვანეს და სიცოცხლისთვის საშიში ძალადობის განხორციელების გზით თავისუფლება აღუკვეთეს.

პროკურორის ინფორმაციით, დეკანოიძე მუხიანში ორი დღე ჰყავდათ დატყვევებული, რის შემდეგაც ის წყალტუბოში გადაიყვანეს. ამასთან, ბექა ხუნაშვილის ინფორმაციით, მძევალს ვიდეოც გადაუღეს, რომელიც სავარაუდოდ მამისთვის უნდა გაეგზავნათ.

რაც შეეხება ოკუპირებულ აფხაზეთში გადასულ დანაშაულის მონაწილე სავარაუდო სხვა პირებს, პროკურორმა ამ საკითხზე მიმალვის საფრთხის დასაბუთებისას ისაუბრა. ბექა ხუნაშვილის თქმით, ფაქტია, რომ ბრალდებულებს ჰყავდათ თანამზრახველები და დასადგენია როგორც გატაცების ორგანიზატორი, ასევე იმ ქალის იდენტიფიცირებაა მოსახდენი, რომელიც ვერონიკა პაპინას სახელით მოქმედებდა.

პროკურორმა ასევე აღნიშნა, რომ გამოძიება მუშაობს იმის დასადგენად თუ ვინ ახორციელებდა ზარებს გამოძიებისთვის კვალის ასარევად საქართველოს არაკონტროლირებადი ტერიტორიიდან და ვინ გადაუღო გატაცებულს ვიდეო.

პროკურორმა აღნიშნა, რომ თავისუფლებაზე ყოფნის შემთხვევაში შესაძლოა ბრალდებულები ასევე გადავიდნენ საქართველოს არაკონტროლირებად ტერიტორიაზე და მიემალონ მართლმსაჯულებას, ასევე დაუკავშირდნენ სავარაუდო თანამზრახველებს და გააფრთხილონ ისინი საგამოძიებო მოქმედებების მიმდინარეობის შესახებ. გარდა ამისა, პროკურორის თქმით, არსებობს ასევე ახალი დანაშაულის ჩადენის საფრთხეები და აქედან გამომდინარე, სახელმწიფო ბრალდებამ ბრალდებულებისთვის აღკვეთის ღონისძიების სახით პატიმრობის შეფარდება მოითხოვა.

23 წლის გიორგი დეკანოსიძის გატაცების საქმე შინაგან საქმეთა სამინისტრომ რამდენიმე დღის წინ გახსნა. გავრცელებული ცნობით, პოლიციის მთავარ სამმართველოში გუშინ გვიან ღამემდე მიმდინარეობდა გიორგი დეკანოიძის გამოკითხვა.