ხალხმრავლობა თბილისის მეტროში  - რატომ დააგვიანა მატარებელმა 17 წუთით

პიკის საათებში თბილისში გადაადგილება დღითიდღე შეუძლებელი ხდება - ქუჩაში საცობებია, ავტობუსებსა და სამარშრუტო ტაქსებში ჭყლეტა, მეტროშიც ხალხმრავლობაა. თბილისის მერი თბილისელებს დაპირდა, რომ 15 სექტემბრიდან მეტროში, პიკის საათებისას მოცდის დრო 4-5 წუთიდან 3 წუთამდე შემცირდება და ეს ასეც არის, თუმცა კალაძის დაპირების მიუხედავად, არის შემთხვევები, როდესაც მეტროს მატარებელი პიკის საათის დროსაც იგვიანებს.

თბილისის მეტროს სადგურში ამას ერთჯერადი ტექნიკური მიზეზით ხსნიან და ირწმუნებიან, რომ მუნიციპალური ტრანსპორტი მგზავრებს შეუფერხებლად ემსახურება.

დღეს დილით, მაშინ როცა ყველას სამსახურსა თუ სასწავლებელში მიეჩქარებოდა, მატარებელი 3 წუთის ნაცვლად ბაქანზე 17 წუთის დაგვიანებით მივიდა. "ვაგზლის მოედანზე" არსებული ხალხმრავლობის ამსახველი ფოტოები სოციალურ ქსელში გავრცელდა და აქვე გაირკვა კომენტარებში, რომ მატარებელმა 17 წუთი დააგვიანა.

"10 წუთზე მეტი ველოდე მეორე ხაზის მატარებელს, არადა სამსახურში მაგვიანდებოდა. 5 წუთის დაგვიანება გასაგებია, მაგრამ ამდენი ხანი?! თან დილით და პიკის საათებში "მარშუტკაში" ვერ ახვალ, ტაქსების ლიცენზირების შემდეგ, ქალაქში ტაქსის პოვნაც გაჭირდა, ამას ემატება ბენზინის გაძვირება - ამ ყველაფერის ფონზე კი მეტრო ყველაზე კომფორტული საშუალება იყო, თუმცა მე მგონი ამასაც ანადგურებენ" - გვითხრა ერთ-ერთმა მგზავრმა.

"თბილისის სატრანსპორტო კომპანიის" მარკეტინგის მენეჯერის თამაზ რობაქიძის თქმით, მეტროს დაგვიანება მხოლოდ ერთჯერადად მოხდა მგზავრების უსაფრთხოებიდან გამომდინარე.

„დელისის მეტროში მძღოლმა დაცალა ვაგონი და მისი ტექნიკური შემოწმება გადაწვიტა. ამიტომ მოხდა 8 წუთიანი დაგვიანება. ეს ჩვეულებრივი სამუშაო პროცესია. ჩვენ გვყავს სარეზერვო მატარებლები და ეგრევე ჩავანაცვლეთ, ახლა უკვე ჩვეულებრივად 3-წუთიანი ინტერვალით მოძრაობენ.

მძღოლს უფლება აქვს აღნიშნოს, რომ მოხდეს მატარებლის შემოწმება ნებისმიერ დროს, როცა თავად გადაწყვეტს მგზავრების უსაფრთხოებიდან გამომდინარე“, - უთხრა AMBEBI.GE-ს თამაზ რობაქიძემ.

მისივე თქმით, როგორც მეტროში ისე ავტობუსების ხაზზე, თბილისის სატრანსპორტო კომპანიას აქვს რესურსი, საჭიროების შემთხვევაში ჩაანაცვლოს ავტობუსი თუ შემადგენლობა.

ფოტო: ელზა ელბაქიძე