რუსეთში 22 წლის კანიბალი და მისი თანამზრახველი 12 წლის გოგონა დააკავეს - "კითხვაზე, რატომ ჩაიდინეს ეს, გვიპასუხეს: საჭმელი არ გვქონდა"

რუსეთში, ლენინგრადის ოლქში, სამართალდამცავებმა კანიბალიზმში ეჭვმიტანილები დააკავეს. 22 წლის არკადი ზვერევი ძირითადად, მამაკაცებს ხოცავდა. ბოლო შემთხვევისას, მას 12 წლის სოჭელი გოგონაც ჰყავდა თანამონაწილედ. არსებული ინფორმაციით, გოგონა მშობლების სახლიდან 23 სექტემბერს გაიპარა, მას შემდეგ პოლიცია ეძებდა და მთელი ამ დროის განმავლობაში უგზო-უკვლოდ დაკარგულად ითვლებოდა.

ზვერევის არასრულწლოვანი თანამონაწილეც კანიბალიზმშია ეჭვმიტანილი. მას ბრალის დამტკიცების შემთხვევაში, თავისუფლების 14-წლით აღკვეთა ემუქრება.

ნახეთ ვიდეო : რუსეთში 22 წლის კანიბალი და მისი თანამზრახველი 12 წლის გოგონა დააკავეს - კადრები მკვლელის სახლიდან

კანიბალიზმში ბრალდებულმა სამართალდამცავებს უთხრა, რომ ძირითადად მამაკაცებს კლავდა და აღიარა, რომ თითქმის ყველა მსხვერპლს იყენებდა საკვებად.

რაც შეეხება გოგონას, მისი თქმით, სოჭში დედასთან ერთად ცხოვრობდა, რომელიც სექსმუშაკად მუშაობდა. თავად გოგონა კი უმეტესად “თავისით, უმეთვალყურეოდ იზრდებოდა”. არასრულწლოვანს მამა არ ახსოვს, სკოლაშიც იშვიათად დადიოდა, რადგან სწავლა არ აინტერესებდა.

გოგონა გამომძიებელთან საუბარში იხსენებს, რომ ის 10 წლის ასაკში გააუპატიურეს, რის შემდეგაც ძალიან დიდხანს ცუდად იყო. მოძალადე მასთან სექსუალურ კავშირს შემდეგაც ამყარებდა და არასრულწოლოვანმაც პირველი მკვლელობა ჩაიდინა - მოძალადე ქვით მოკლა... ამ ფაქტის მერე გოგონამ სახლიდან გაქცევა რამდენჯერმე სცადა, თუმცა, არ გამოუვიდა. დედამ კი მას არც მოუსმინა და მკაცრად დასაჯა.

“23 სექტემბერს კიდევ ერთხელ ვცადე გაქცევა და გამომივიდა," - ყვება გოგონა.

საქმის გამომძიებლის თქმით, სექტემბრის ბოლოს გოგონა სანკტ-პეტერბურგში, 22 წლის ალტაელ ბიჭთან ერთად ჩავიდა. რამდენიმე დღის განმავლობაში ისინი ხან პირდაპირ ქალაქის ქუჩებში, ხანაც ღია ცის ქვეშ იძინებდნენ. ხან კი სხვადასხვა სასტუმროებში ათენებდნენ, ვიდრე ერთ-ერთი კაფეში ადგილობრივი მამაკაცი არ გაიცნეს, რომელმაც მათ ლენინგრადის ოლქში, კიროვის რაიონში თავის საცხოვრებელ სახლში დარჩენა შესთავაზა. სწორედ იქ აიყვანეს ისინი.

“რამდენიმე დღის შემდეგ, სახლის პატრონი გარდაცვლილი, უფრო სწორად, ნაკუწებად დაჭრილი ვიპოვეთ. კანიბალიზმში ეჭვმიტანილი ზვერევის ძმის თქმით, მოკლული ხშირად ეპატიჟებოდა სახლში ახალგაცნობილებს, თუმცა, ჩხუბი არასდროს მოსვლიათ... 3 ოქტომბერს ბინის 21 წლის მეპატრონესა და სტუმრებს შორის კამათი მოხდა, რა დროსაც ეჭვმიტანილმა მამაკაცმა მას კისრისა და მკერდის არეში რამდენჯერმე ჩაარტყა დანა, რის შედეგადაც ის ადგილზე გარდაიცვალა.

თუმცა, ყველაფერი ამით არ დასრულებულა, ზვერევმა გარდაცვლილს სხეულის რამდენიმე ნაწილი მოაჭრა და საკვებად გამოიყენა. კითხვაზე, თუ რატომ ჩაიდინეს ეს, მათ გვიპასუხეს, რომ საჭმელი არაფერი ჰქონდათ”, - აცხადებს გამომძიებელი.

შემთხვევის შესახებ მეორე დილით გახდა ცნობილი, როდესაც მეზობლებმა სახლის ფანჯრიდან გამოსული კვამლი შენიშნეს - ეჭვმიტანილებმა სახლში ხანძარი გააჩინეს და შემდეგ ფანჯრიდან გაიქცნენ. ადგილზე მისულ სამართალდამცველებს მსხვერპლი დანაწევრებული დახვდათ.

“სახლში ნივთების დიდი ნაწილი დამწვარი იყო, თუმცა, სისხლის კვალი მაინც ჩანდა. ახალგაზრდა ადამიანის სხეული დანაწევრებული იყო - თავი ღუმელში იდო...” - აცხადებენ სამართალდამცველები.

წყვილი მალე დააკავეს. ეჭვმიტანილმა ზვერევმა განაცხადა, რომ ის და მისი თანამონაწილე მოზარდი გოგონა ესპანელი რეჟისორის მანუელ მარტინ კუენკას ფილმის - “კანიბალის” სცენარის გამეორებას ცდილობდნენ...

თავად გოგონამ სამართალდამცავებს უთხრა, რომ მისთვის მიუღებელი იყო ზვერევის ქმედებები და ხშირად მას "მხეცს" უწოდებდა, თუმცა შეწინააღდეგებას ვერ ბედავდა. არასრულწლოვანის თქმით, ზვერევი მასზე სექსუალურად ძალადობდა. რის გამოც, ბრალდებულს სასჯელი დაუმძიმდა.

რუსული მედიის ცნობით, ექიმები ამბობენ, რომ 12 წლის გოგონას მკვეთრად გამოხატული შიზოფრენიის ნიშნები აქვს. სპეციალისტები მიიჩნევენ, რომ მისი ქუჩაში თავისუფლად გაშვება სახიფათოა.