"დიახ, ბატონო არჩილ, ჩვენ ერთი წელია გვაწამებენ და ყოველ დღე გვკლავენ...“

პროდუსერ თეო ჯორბენაძის ღია წერილი არჩილ თალაკვაძეს

მოგესალმებით ბატონო არჩილ, მე გახლავართ თეო ჯორბენაძე, სცენარისტი და პროდუსერი, „ArtistsUnion“-ის და ფონდ „იავნანას“ სამხატვრო ხელმძღვანელი, რომელიც ამ ქვეყანაში მრავალ მნიშვნელოვან კულტურულ პროექტს ახორციელებს. თქვენ ალბათ, ჩვენი შემოქმედებითი გუნდის საქმიანობის შესახებ ნაკლებად გსმენიათ, რადგან Postv-ის ერთგულ მაყურებელს უბრალოდ შეუძლებელია აინტერესებდეს ის, რასაც ჩვენ ვემსახურებით.

მოგახსენებთ, რომ ჩვენთვის საამაყოა ფონდ „იავნანას“ ყოველი აქცია, რომელსაც 14 წლის მანძილზე დაუღალავი შრომით ვქმნიდით. დიახ, ფონდი 14 წელი ვზარდეთ შვილივით და უკვე ერთი წელია ვუყურებთ ამდენი ადამიანის მიერ შექმნილ სიკეთის დღესასწაულს, როგორ ვანდალურად არბევენ და აოხრებენ. ჩემთვის ეს განზრახ მკვლელობაა ბატონო არჩილ, თუმცა თქვენ ალბათ, არ მოგინდებათ ამის მოსმენა, რადგან ვფიქრობ, რომ ბოროტმოქმედების „გაპრავება“ გაქვთ დავალებული.

9 ოქტომბერს გადაცემა „არჩევანში“ გამოსვლით თქვენ საბოლოოდ დაადასტურეთ, მართლაც რომ მწარე სიმართლე, Postv-ის და თქვენ ყველას, საერთო გემოვნება და ღირებულებები გაქვთ და საერთოდაც ერთი გუნდი ხართ. თქვენ პირდაპირი რეკლამა გაუკეთეთ საინფორმაციო ძალადობაზე, სიძულვილის ენაზე, სიცრუეზე დაფუძნებულ საბჭოთა პროპაგანდას. ეს არ არის ფილმი ბატონო არჩილ, თუ ჩემი არ გჯერათ ბატონ გოგი გვახარიას ჰკითხეთ.

ეს ქვეყანაში გაჩენილი დიდი უბედურებაა, ეს ადამიანების დისკრედიტაციის მანქანააა, სადამსჯელო რაზმია, რომელიც “ციხის უფროსის“ დავალებებს ასრულებს.

ნანახი გექნებათ წინა ხელისუფლების დროს გადაღებული კადრები, სადაც „ცალფეხა“ დაბმულ პატიმრებზე ძალადობს. ეს ჩემთვის სატელევიზიო „ცალფეხების“ დაჯგუფებაა იდენტური ფუნქციით.

აქვე შეგატყობინებთ, რომ თქვენს მიერ რეკლამირებულ „მიუკერძოებელ“ საგამოძიებო ფილმში მოყვანილი ბრალდებები დიდი მონდომების მიუხედავად, ვერ აღმოაჩინა საქართველოს მთავარმა პროკურატურამ, მათ პაატა ბურჭულაძის შვილებისთვის “იავნანას“ თანხებით შეძენილი ბინები ვერ იპოვნეს, ვერც პარტიაში გადარიცხული მილიონები, ვერც ყულაბებიდან მოპარული ხურდები, ვერც ტაძრის მშენებლობიდან მითვისებული ლარები. უკანასკნელ იმედად ავიაბილეთები დარჩათ, ორიოდე დღის წინ, პროკურორმა ბრძანა ბურჭულაძემ ვერც ერთი მტკიცებულება ვერ წარმოადგინა იმის დასტურად, რომ მისი „იავნანას“ კონცერტებზე ჩამოსვლა საჭიროებას წარმოადგენდაო. ნუ აქ უკვე ძნელია იდავო და ახსნა, მაგრამ მაინც შევეცდები:

განმარტება#1 -იმისთვის, რომ არტისტი უცხოეთიდან მოხვდეს საქართველოს რომელიმე საკონცერტო დარბაზის სცენაზე, ორგანიზაციამ უნდა შეუძინოს ავია-ბილეთი, შემდეგ არტისტი უნდა წავიდეს აეროპორტში და ჩაჯდეს თვითმფრინავში. ადამიანები ერთი ქვეყნიდან მეორეში ძირითადად ამ გზით ხვდებიან, მათ შორის საოპერო მომღერლებიც.

განმარტება #2 ტექნოლოგიების განვითარების მიუხედავად, ჯერჯერობით სოლისტები სკაიპით ან კომუნიკაციის რომელიმე სხვა გზით ორკესტრთან ერთად ვერ მღერიან, ამიტომ მათთვის აუცილებელია ავიაბილეთის შეძენა.

ბატონო არჩილ, ალბათ დამეთანხმებით, რომ სერიოზულ სადაოს ვერც ავიაბილეთებში აღმოაჩენენ, არადა „იავნანას“ საქმეზე 3 პროკურორი და 5 გამომძიებელია მიმაგრებული. ყველაზე დიდი მონდომებით კი თურმე დანაშაულის კვალი საკონცერტო ჩანაწერებში უძებნიათ. ხომ იცით, თბილისი რა პატრაა და ისიც კი მიამბეს, რომ შემოქმედებითი გუნდისთვის ზედმეტად კლასიკური კონცერტების გამო, ერთი ორჯერ შეუკურთხებიათ კიდეც. მაგრამ ჩვენ არ გვეწყინა, რადგან ხანგრძლივი ტელე-მარათონების ყურება, თუ გულით არ ერთვები და ოპერა არ გიყვარს, ადვილი ამბავი არ გახლავთ. თავის მხრივ, არტისტებიც შიშით ელოდნენ პროკურატურის ვერდიქტს, ხომ შეიძლება რომელიმეს უსუფთაო ბგერა წასცდა და აღარ გვახსოვს, მადლობა ღმერთს, აქაც გადავრჩით.

ამ სამარცხვინო სისასტიკეზე მართლა დასურულებლად შემიძლია წერა, ფონდში მწარედ ხუბრობენ უკვე, ამდენ ხანს ყველა რომ დავეჭირეთ სჯობდა, ამინისტია მაინც შეგვეხებოდაო. დიახ, ბატონო არჩილ, ჩვენ გვაწამებენ და ყოველ დღე გვკლავენ, გათელილია ქვეყნის იმიჯი უცხოელი არტისტების თვალში, ქვეყანაში აღარავინ მართავს საქველმოქმედო კონცერტებს, სოციალურად დაუცველი ფენა ვეღარ იღებს 630 000 ლარის დახმარებას, რომელსაც „იავნანა“ საშუალოდ ყოველწლიურად გასცემდა.

თქვენ შეგიძლიათ მშვიდად განაგრძოთ Postv-ის ყურება, არ არის პრობლემა, უბრალოდ, მინდა გირჩიოთ „იავნანას“ შესახებ იმ სერიასაც შეავლოთ თვალი, სადაც ჩვენს მიერ ორგანიზებულ 2018 წლის 3 მარტის საქველმოქმედო გალა-კონცერტს ჰიტლერის იუბილეს ადარებენ. დიახ, არასამთავრობო ორგანიზაციებამდე 8 თვით ადრე, ფაშიზმის პირველ მხარდამჭერებად ჩვენ გამოგვაცხადეს. გენერალური პროკურორის ყოფილი მოადგილის და თქვენი პარტიის პიარ კონსულტანტის ნაცვლიშვილის თქმით, „დამნაშავე ორგანიზაციის ზეიმში“ ვმონაწილეობდით, აქვე მინდა წარმოგიდგინოთ კონცერტის მონაწილეთა სია: ნანი ბრეგვაძე, ანიტა რაჭველიშვილი, თამარ ივერი, ნიკოლოზ რაჭველი, ვახტანგ მაჭავარიანი, გიორგი ონიანი, გოჩა დათუსანი, ვალერიან შიუკაშვილი, ნინო ქათამაძე, ნატო მეტონიძე, ეკა მამალაძე, ზვიად ბოლქვაძე, ანსამბლი "შვიდკაცა", ზაზა მარჯანიშვილი, გიგი გეგელაშვილი და ჯგუფი "სინათლის წელიწადი", თეა დარჩია და „თედასი“, ქართული ნაციონალური ბალეტი “სუხიშვილები“. ვიდეო-ჩართვები - ქეთი მელუა, ოთარ ჯორჯიკია, ნინო მაჩაიძე, გიორგი გაგნიძე, მიშელ კრაიდერი, ევგენი კისინი, მარკო ბერტი.

ბატონო არჩილ, თქვენს მიერ ხშირად განმეორებული „სისხლიანი 9 წლის“ დროს განსხვავებული აზრისთვის ყველაზე მეტად ნატო მეტონიძეს ერჩოდნენ, მიბარებდნენ და მთხოვდნენ ხოლმე ამომეღო კონცერტიდან, ამის გამო, ზოგჯერ ეთერსაც ვკარგავდით, მაგრამ არც ერთხელ არ დავთმეთ. თქვენი პარტიის მმართველობის პერიოდში კი არც იმას გვეუბნებიან რა დანაშაული ჩაიდინა ამ ფონდმა ქართველი ერის წინაშე და არც საქმეს ხურავენ. ჩვენ უკვე ერთი წელია ყოველ დღე გვკლავენ!!!

მოგმართავთ თხოვნით, იქნებ ცოტა ხნით გვერდით გადადოთ Postv-ით ტკბობა და შეაჩეროთ ეს სამარცხინო დევნა!!! ან დაასაბუთეთ, რომ „იავნანაში“ ვინმე რამეს ითვისებდა, ან კეთილი ინებეთ და ბოდიში მოიხადეთ!!!

და ვინც არასამთავრობობების „იავნანას“ გვერდით დანახვამ გააღიზიანა გადაეცით, რომ ეს შეხვედრები გრძელდება, მათ შორის საქართველოს ფარგლებს გარეთ, დიპლომატიური კორპუსისა და კიდევ უფრო გავლენიანი ორგანიზაციების მხარდაჭერით. და ბოლოს, 25 ოქტომბერს იქნებ ჩვენს კონცერტზე მობრძანდეთ, ხომ შეიძლება სტატუსიანი თაღლითების მიერ დამზადებულ სერიალზე მეტად დაგაინტერესოთ.

P.S. ამ წერილის შემდეგ იმედია, მმართველი პარტიის საყვარელ არხზე ჩემს შესახებ არ ვიხილავთ სერიალებს, თუმცა არც ეგ არის პრობლემა, უკვე ყოველი ახალი სერია და მაღალჩინოსნების კომენტარები, მხოლოდ სისტემური დანაშაულის გაშიშვლებას ემსახურება და მნიშვნელოვანი მტკიცებულებებია ევროპელი უფლებადამცველებისთვის.

R