როგორ შევინარჩუნოთ ჯანსაღი კბილები და რა ჯდება "ჰოლივუდის" ღიმილი საქართველოში

ჯანსაღი კბილები რომ ადამიანის ჯანმრთელობას განსაზღვრავს, ახალი არ არის. ზოგიერთი ჯანსაღ კბილებს ხანდაზმულობამდე ინარჩუნებს, ზოგი კი ახალგაზრდობაშივე კარგავს მათ.

რა უნდა გავაკეთოთ იმისთვის, რომ ჯანსაღი კბილები დიდხანს შევინარჩუნოთ, როგორ ვუმკურნალოთ დაზიანებულ კბილებს და როგორ მივაღწიოთ იმას, რომ გვქოდეს "ჰოლივუდის ღიმილი" - ამ საკითხებზე კლინიკა "დენტექსი 95"-ის ორთოპედი, ინპლანტოლოგი ავთანდილ მაჭავარიანი გვესაუბრება:

- ჯანმრთელობის ერთ-ერთი საწინდარი ჯანსაღი კბილებია. გვყავს 80 წელს გადაცილებული პაციენტები, მხოლოდ ერთი-ორი კბილი რომ აკლიათ. ერთ-ერთმა მათგანმა პირველი კბილი რომ ამოიღო, საოცრად განიცადა და ჩასმას ჩქარობდა, რადგანაც მისთვის ეს ტრაგედია იყო. თუმცა გვყავს პაციენტები, რომლებსაც 30-35 წლის ასაკში არც ერთი კბილი არ აქვთ.

- რაზეა ეს დამოკიდებული?

- როგორც ყველა დაავადებაში აქაც ასეა, ამას ბევრი რამ განსაზღვრავს, მათ შორის, გენეტიკაც, თუმცა, ყურადღებას მაინც მოვლაზე გავამახვილებდი. მოვლა სჭირდება ყველაფერს და მათ შორის, პირის ღრუსაც. თუმცა ასეც ხდება, ვიღაცამ შეიძლება არ მოუაროს სათანადოდ და მაინც კარგი კბილები ჰქონდეს, ასეთი გამონაკლისები არსებობს, მაგრამ უყურადღებობის შემთხვევაში, პროცესი სწრაფად მიდის. ასეა - ჯანმრთელი კბილების შესანარჩუნებლად ზოგს დიდი ძალისხმევა სჭირდება, ზოგს საერთოდ არა. ამიტომ, აქცენტი ჰიგიენურ წმენდაზე წელიწადში ორჯერ მაინც უნდა გავაკეთოთ. არიან პაციენტები, ვისაც რაღაც ზოგადი დაავადებები აქვთ, მაგალითად, პრობლემური ღრძილები და მათ 4 თვეში ერთხელ უნდა გაიწმინდონ, შეიძლება წელიწადში სამჯერაც დასჭირდეთ.

- მკითხველისთვის გასაგები რომ იყოს - რა არის ჰიგიენური წმენდა?

- ეს არის ღრმა წმენდა, იმ ადგილების, სადაც რთულია მიდგომა. რა თქმა უნდა, აქ დილა-საღამოს კბილების გახეხვა არ იგულისხმება. თუმცა, კბილების ხეხვაზე საუბრისას იმას ვიტყოდი, რომ ჯაგრისი ხშირად უნდა ვცვალოთ, მოძველებული და დაზიანებული არ უნდა იყოს. წინააღმდეგ შემთხვევაში, შეიძლება კბილების გახეხვა ფუჭი აღმოჩნდეს. კბილების ხეხვის პროცესი 2 წუთი უნდა გაგრძელდეს. მერწმუნეთ, კბილებს ვერანაირი ჰიგიენური წმენდა ვერ უშველის, თუ ხეხვის პროცედურას პაციენტი სრულყოფილად არ იცავს. სრულყოფილი ხეხვის შემდეგ მიუდგომელი ადგილები რჩება, რაც უკვე სტომატოლოგმა, პროფესიონალმა უნდა გაწმინდოს.

მთავარი ის არის, რომ არ უნდა გაგვექცეს პროცესი, შეიძლება თვეში ერთხელ პატარა კარიესიც კი გაჩნდეს, რომელსაც პაციენტი ძალიან მარტივად დაიბჟენს. ეს პაციენტისთვის არანაირ სირთულეს არ წარმოადგენს. ასეთ დროს მას ნემსიც არ სჭირდება. თუ ადამიანი ჰიგიენურ წმენდაზე არ დადის, აქვს ქვები, ნადები, ღრძილქვეშა ქვები, იწყება ღრძილების გაღიზიანება, ანთებაც და კარიესიც ისე გამოგვეპარება, ვერ გავიგებთ, რადგანაც კბილებს შორის, საკონტაქტო ნაპირებზე მიდგომა არ არის ადვილი.

თუმცა, სანამ არ ჩატყდება, არ მოტყდება, ან ტკივილი არ დაიწყება, ექიმთან არ მიდიან, პროცესი კი სამწუხაროდ, უკვე შორს არის წასული. თუ დროზე მივხედავთ, ნაკლებს ვიწვალებთ, დროსაც დავზოგავთ და ფინანსებსაც.

- იმისთვის, რომ კბილები შევინარჩუნოთ მოზარდობიდან გარკვეულ ასაკამდე, ე.ი. ყურადღება ჰიგიენურ წმენდას მეტად უნდა მივაქციოთ?

- კი, ასეა. არ ვიცი, რამდენად სწორია, მაგრამ ევროპის კლინიკებში სადაზღვევო კომპანიები ადამიანებს ავალდებულებენ, შეიძლება დაზღვევა მოუხსნან კიდეც, თუ პაციენტი წელიწადში ორჯერ არ მივა და არ გაიწმენდს კბილებს. ის სადაზღვევო კომპანიები ფიქრობენ, რომ ადამიანს პროცესი არ გაურთულდეს. ასეთი რამ ჩვენთააც რომ იყოს, არ იქნებოდა ურიგო, მაგრამ ასე არ არის.

- როგორ შევინარჩუნოთ ე.წ "ჰოლივუდის ღიმილი" ანუ ჯანმრთელი კბილები?

- უპირველესად ჯერ უნდა გქონდეს, რომ შეინარჩუნოთ. ამ ყველაფრისთვის ისევ და ისევ პირველი მტერი ამოღებული კბილებია. როდესაც კბილის ექსტრაქცია ხდება, მაშინვე იწყება თანკბილვის დარღვევა. ქვედა კბილს რომ ვიღებთ, ზედა ჩამოდის ქვემოთ, გვერდითას შემთხვევაში, გვერდითა გადაიწევს. თუ რამდენიმე კბილს ვიღებთ, მთლად უარესი. ყოველი ამოღებული კბილი დროულად უნდა ჩაისვას და დღეისთვის ეს არანაირ სირთულეს არ წარმოადგენს.

დენტალური იმტპლანტაცია პრობლემა მართლაც აღარ არის. ისეთი ტექნიკური საშუალებები გვაქვს, რომელიც ყოველ ამოღებულ კბილში დენტალურ ინპლანტს ანაცვლებს. თუ რაიმე სერიოზული ხელისშემშლელი ფაქტორი არ გვაქვს, ეს ერთ დღეშია შესაძლებელი. ინპლანტი ჩაისმება და ზემოდან გვირგვინი გაკეთდება. თუ ფინანსებს არ მივაქცევთ ყურადღებას, შეუძლებელი როგორც ვთქვი, სტომატოლოგიაში უკვე არაფერი აღარ არის. საკუთარ ჯანმრთელობას ცოტა მეტი დრო უნდა დავუთმოთ.

- სტომატოლოგთან არმისვლის მიზეზი უპირველესად შიშია და მიუსვლელობის მიზეზი - ფინანსებიც... რა ჯდება "ჰოლივუდის ღიმილი" თქვენთან?

- აბსოლუტურად გეთანხმებით, შიში და ფინანსური მხარე ამ ყველაფერში მნიშვნელოვანია, რაც ექიმთან მისვლას აბრკოლებს. თუმცა ჯობია, შენარჩუნებით დავიწყოთ: მნიშვნელოვანი პროცედურაა ჰიგიენური წმენდა, შემდეგ ზედაპირული კარიესის დაბჟენა, რასაც ნემსიც კი არ სჭირდება, ამასთან, აბსოლუტურად უმტკივნეულოა. როცა უკვე წინ წასული პროცესებია - დაჩირქება, ანთება, კისტა, აქ უკვე ოპერაცია და ინპლანტის გადანერგვაა საჭირო. ხოლო თუ ინპლანტის გადანერგვა დაგვიანდა, შემდეგ ხელოვნური ძვალია გადასანერგი (დამატებითი ოპერაციებია გასაკეთებელი). ამიტომ, მერწმუნეთ კიდევ უფრო საშიშ სიტუაციაში აღმოვჩნდებით.

ჰიგიენურ წმენდაზე უარი არ უნდა ვთქვათ, რადგანაც გაცილებით მარტივია, ვიდრე რთული მანიპულაციები. ეს პროცედურა ჩვენს კლინიკაში "დენტექსი 95"-ში 55 ლარიდან 140 ლარამდე ჯდება. არის კომბინირებული, სხვადასხვა აპარატი, საკმაოდ თანამედროვე. ასევეა, სხვადასხვა დაავადების შემთხვევაშიც. თუ დროულად არ მივედით, უარეს დღეში ჩავვარდებით. ხანდახან შეუქცევადი პროცესებიც არის და სამწუხაროდ, ისიც ძალიან ხშირია, რომ სავალალო დაავადებებს გვიან ვიგებთ.

სტომატოლოგია, ნაკლებად საშიშია, მაგრამ დაუდევრობით შეიძლება სიტუაცია გართულდეს. გაწმენდა, გასუფთავება, ქვიშისგან გათავისუფლება, რაც ზედაპირული კარიესის წმენდის შემდეგ აღმოჩნდება ხოლმე, დაახლოებით იგივე თანხები ჯდება - 50-დან 100 ლარამდე.

- ზედა და ქვედა კბილების ჩასმა რა ჯდება?

- წმენდაზე იმიტომ ვამახვილებ ყურადღებას, რომ ეს პროცედურა იშვიათად მიგვიყვანს დენტალურ ინპლანტამდე. თუ ლოგიკურად მივყვებით ამ ყველაფერს, სავალალო შედეგებს არ უნდა ველოდეთ. მაგრამ თუ მაინც არ მივაქციეთ ყურადღებას, ფინანსები უფრო და უფრო ძვირდება.

დღესდღეობით დიდი არჩევანია დენტალური ინპლანტების, საშუალოდ, 500-ლარიდან 2-3 000 ლარამდე ჯდება. წარმოგიდგენიათ, როგორ დიდ თანხებზე ავდივართ? ამიტომ ჩემი მთავარი რეკომენდაცია ისევ და ისევ იქნება - გულთან მივიტანონ ეს საკითხი, რათა ერთ მშვენიერ დღეს უარესი პრობლემის წინაშე არ აღმოვჩნდეთ.

ასე რომ, როგორც ყველაფერს სჭირდება მოვლა, ასევე საკუთარ პირის ღრუს. უცხოეთში ამ მიმართულებით სერიოზულად ფიქრობენ, აქ კი მანქანაში რა ზეთი უნდა ჩაასხან, ამაზე ფიქრს მეტი დრო ეთმობა. მივხედოთ კბილებს!