რით ჰგავს ბელა მირიანაშვილს შვილიშვილი - "სადაც უნდა მივიდეს, პოზიტივს ასხივებს..."

ცოტა ხნის წინ ირინკა კავსაძე გაგაცანით - მსახიობ კახი კავსაძის შვილიშვილი, რომელიც ამერიკიდან დროებით დაბრუნდა. მაგრამ მაშინ არაფერი გვითქვამს იმის შესახებ, რომ ამერიკიდან მეგაპროექტმა "ცეკვავენ ვარსკვლავები" ჩამოიყვანა - ირინკა შოუს ერთ-ერთი კონკურსანტი გახლავთ. კონკურსში მის მონაწილეობას ოჯახის წევრებიდან, თურმე, ყველაზე მეტად ბაბუა განიცდის.

როგორც ირინკამ ჩვენთან ინტერვიუში აღნიშნა, მისი მსახიობობა ყველაზე მატად მისმა მამიდამ, ნანუკა ხუსკივაძემ განსაზღვრა. ძმისშვილზე სასაუბროდ მსახიობ ნანუკა ხუსკივაძეს ვესტუმრეთ:

"ირინკა მსახიობების ოჯახში დაიბადა, ხშირად ხდება, რომ ასეთ ოჯახში დაბადებულები მსახიობის პროფესიას ირჩევენ. მართლაც განსხვავებულ ატმოსფეროში გაიზარდა. გარდა ამისა, მის შემთხვევაში, არის გენეტიკური ფაქტორიც, რაც ძალიან მნიშვნელოვანია და რაც რეალურად მართლაც არსებობს. ამ ბავშვში სახელოვნებო ფესვები შორიდან მოდის. მისი პაპის მამა, გენიალური ქართველი ლოტბარი სანდრო კავსაძე გახლდათ. დათაშკა კავსაძე (ასევე ლოტბარი) კი - პაპის მამა. კახოზე (კახი კავსაძე, - ავტ.) არაფერს ვამბობ, ბებიის, ბელა მირიანაშვილის მხრიდან ფესვებზე - ბელას მამა ქუთაისის ლადო მესხიშვილის თეატრის მსახიობი იყო. ძალიან ახალგაზრდა გარდაიცვალა...

მოკლედ, ირინკას გენეტიკა არტისტული ბუნებით დახუნძულია, მაგრამ მას არა მხოლოდ გენეტიკურად აქვს ეს ყველაფერი, თვითონ პიროვნულად არის საოცრად მოსიყვარულე, მშრომელი და ნიჭიერი გოგონა. ხანდახან გვაოცებს იმით, როგორი ადამიანების მოსიყვარულეა. არანორმალურად უყვარს თავისი არჩეული გზა, რაც ძალიან მნიშვნელოვანია. კარგია, რომ ასე გამოსდის ეს, ამასთან, საშინლად შრომისმოყვარეა.

მოკლედ, ყველანაირი მონაცემი აქვს, რომ პროფესიაში მყარად განვითარდეს. იცის, რომ რთულია, - ეს მისთვისაც მითქვამს, თუმცა უკვე დიდი გზა გაიარა. ვაშინგტონში თეატრში დილიდან დილამდე შრომობენ. ძალიან მნიშვნელოვან და კარგ პროდუქციას ქმნიან. ირინკა იქ მოვლენების ეპიცენტრშია... აქედან 9 წლის იყო, იქ რომ წავიდა, სადაც გაიზარდა. რაც ყველაზე მეტად მაოცებს, ის არის, რომ უცხო ქვეყანაში ქართული ენა სულ არ დავიწყებია და გამართული ქართულით ლაპარაკობს.

- თითქმის თქვენ გარეშე გაიზარდა, როგორია ემოციურად ეს თქვენთვის?

- არა იმიტომ, რომ ახლა მასზე ვსაუბრობთ, ირინკა ჩვენს ოჯახში გამორჩეული ადამიანია თავისი პოზიტივით... მასთან საურთიერთოდ თანამედროვე კომუნიკაციები (ინტერნეტი, ტელეფონი) გვეხმარება. თუმცა, რა თქმა უნდა, არის დიდი მონატრება, რასაც ვუმკლავდებით. მათ ჩვენზე მეტად უჭირთ, ისინი ხომ აქედან ოჯახით წავიდნენ.

- ირინკას ბებია მსახიობი ბელა მირიანაშვილი, დედათქვენი ვახსენეთ. როგორ ფიქრობთ, ჰგავს თუ არა ბებიას შვილიშვილი?

- გარეგნულად არა, უფრო ბაბუას ჰგავს. მას დედამისისგან ბევრი კარგი რამ აქვს აღებული და ამასთან, ჰგავს კიდეც... ბელას ბუნებით და ხასიათით ვამსგავსებთ. ყველგან, სადაც უნდა მივიდეს, პოზიტივს ასხივებს და ვფიქრობ, სწორედ ამ მთავარში ბებიას ნამდვილად ჰგავს.

- ირინკას მაყურებელი ცოტა ხანში მასობრივად პროექტით "ცეკვავენ ვარსკვლავები" გაიცნობს. თქვენ მხარი დაუჭირეთ მის შოუში მონაწილეობას?

- რასაკვირველია. დამირეკა და მკითხა, - როგორ მოვიქცეო. მიუხედავად იმისა, რომ დიდად არ ვარ შოუების მოყვარული, ყველა შოუს და ნამუშევარს რასაკვირველია ვაფასებ, პატივს ვცემ. თანხმობა თითქმის პაუზის გარეშე ვუთხარი. ვფიქრობ, რომ აქაც უნდა იყოს, იმიტომ, რომ აქაურობისადმი განსაკუთრებული დამოკიდებულება აქვს. უცხოეთში ცხოვრების შემდეგ მის გონებასა და გულში ერთი წამითაც არ შეცვლილა არაფერი. მიმაჩნია, რომ სწორი გადაწყვეტილება მივიღე, რომ ვუთხარი, ჩამოდი-მეთქი.

- ე.ი. მისი მონაცემებიდან გამომდინარე, ფიქრობთ, რომ შეძლებს პროექტში მონაწილეობას?

- ვფიქრობ, რომ აუცილებლად დაძლევს, შეძლებს. მისი მოწინავე პოზიციებზე ყოფნა ძალიან გაგვიხარდება, მაგრამ მაინცდამაინც გამარჯვებაზე ორიენტირებულები არ ვართ. მთავარია, რომ ღირსეულად წარსდგეს მაყურებლის წინაშე და ზუსტად ვიცი, რომ ამას აუცილებლად მოახერხებს! დანარჩენი მაყურებლის გადასაწყვეტია, ასევე ფორტუნაზეა დამოკიდებლი, მაგრამ მაქსიმუმს რომ გააკეთებს და ღირსეული მონაწილე იქნება, ამაში დარწმუნებული ვარ.

- რას ამბობს ბაბუა, კახი კავსაძე?

- რა თქმა უნდა, ძალიან ღელავს. ახლა იმაზე წუხს, ძალიან იღლებაო... რაღაც მიზეზებს ეძებს, რომ კიდევ უფრო მეტი ინერვიულოს. მე კი ირინკას სულ ვეუბნები, რომ ფსიქოლოგიურად ყველაფრისთვის მომზადებული უნდა იყოს, მაგრამ იმდენად გულუბრყვილო და სუფთა ადამიანია, რომ თავში არ მოსდის რაიმე მზაკვრობა და ბოროტება.

- თქვენ არ გგავთ?

- მე? არ ვიცი, ალბათ კი... წარმატებები მინდა, ვუსურვო...