1
ივნისიდღის ზოგადი ასტროლოგიური პროგნოზი
სამედიცინო საქმიანობის რეგულირების სააგენტოს ყოფილი უფროსის გია თვალავაძის მხარდასაჭერად თბილისში, კიკვიძის პარკში აქცია გაიმართა.
როგორც ჟურნალისტებს გია თვალავაძის შვილმა, თამთა თვალავაძემ განუცხადა, მამამისი უდანაშაულოა და მის წინააღმდეგ გამოძიებას საკმარისი მტკიცებულებები არ აქვს. თამთა თვალავაძის განცხადებით, არსებობს მხოლოდ ერთი პირის ჩვენება, რაც საკმარისი არ არის.
"მთელი ლანჩხუთი, მთელი გურია, მთელი საქართველო ფეხზეა, რადგან უდანაშაულო ადამიანი ამ წამებში ციხეშია. მინდა მჯეროდეს, რომ სააპელაციო სასამართლო მიიღებს გადაწყვეტილებას და მამას გაათავისუფლებენ და გააუქმებენ აღკვეთის ღონისძიებას პატიმრობასთან დაკავშირებით, იმიტომ, რომ მთელი ცხოვრების განმავლობაში გარდა სიკეთისა, მამას არაფერი უკეთებია. თუ ამ ქვეყანაში სიკეთე დანაშაულია, წინ ვერასდროს წავალთ. მინდა გამოვეხმაურო მინისტრის ძალიან ღირსეულ განცხადებას, რომელმაც აღნიშნა, რომ გია პატიოსანი ადამიანია. მან იცის, რომ გია არასდროს უღალატებდა ჯანდაცვის სამინისტროს და ხალხს. რომელ ნარკოტიკულ დანაშაულთან არის საქმე, როცა ამბობენ, რომ მან უფლებამოსილებას გადააჭარბა, მაგრამ სარგებელი არ მიუღია?! ეს არის სირცხვილი! მჯერა, რომ გია რამდენიმე საათში გარეთ გამოვა, რადგან მისი ჯანმრთელობის მდგომარეობა ძალიან მძიმეა. არ მინდა პოლიტიკური განცხადების გაკეთება. მესმის ჭორები, რომ ეს შეიძლება კლანებს შორის დაპირისპირება იყოს და გია ამას ემსხვერპლა, მაგრამ ვიმეორებ, ერთადერთი, რაც გიას უკეთებია, სიკეთეა. ძალიან ცუდი სპექტაკლი დაიდგა. ყველა დაკავებული პირი ამბობს, რომ გია თვალავაძეს არ იცნობს.
რაც შეეხება აუდიო-ვიდეო ჩანაწერებს, ასეთი მტკიცებულებები ჩვენ არ გვინახავს. მესმოდა ჰაერზე ნათქვამი სიტყვები, თითქოს გია დააკავეს თავისი წამლის სააგენტოს ინსპექტირების სამსახურის უფროსის ჩვენების გამო. მისცა ჩვენება ქალმა, რომლის ვალდებულებაც იყო გასულიყო და შეემოწმებინა, თუმცა, მისი პასუხოსმგებლობის საკითხი არ დგება. თუ რამე აუდიო-ვიდეო ჩანაწერები არსებობდა, რატომ არ აჩვენეს?! ახლა რომ რამე აჩვენონ, მგონია, რომ დამონტაჟებული იქნება",- განაცხადა თამთა თვალავაძემ.
ე.წ. სააფთიაქო ნარკომანიის საქმეზე, სამსახურებრივი უფლებამოსილების ბოროტად გამოყენებაში ბრალდებულ სამედიცინო საქმიანობის რეგულირების სახელმწიფო სააგენტოს ყოფილ ხელმძღვანელს გია თვალავაძეს და ამავე საქმეზე, უკანონო სამეწარმეო საქმიანობის ბრალდებით დაკავებულ კიდევ 5 პირს, თბილისის საქალაქო სასამართლომ აღკვეთის ღონისძიების სახით პატიმრობა შეუფარდა. გია თვალავაძე ციხიდან ჩაფიძის გულის ცენტრში 26 სექტემბერს გულის შეტევით გადაიყვანეს.
