1
ივნისიდღის ზოგადი ასტროლოგიური პროგნოზი
ერაყის დედაქალაქ ბაღდადში 2015 წლის "მის ერაყის" გამარჯვებული 22 წლის ტარა ფარესი მოკლეს. ტელეარხ Kurdistan24-თან საუბარში, ქვეყნის შს მინისტრი აცხადებს, რომ გოგონა ქალაქის ცენტრალურ რაიონში საკუთარი სპორტული მანქანით მოძრაობდა, რა დროსაც მას უცნობი პირები დახვდნენ და სამი ტყვია ესროლეს.
თვითმხილველებმა ის სასწრაფოდ საავადმყოფოში გადაიყვანეს, თუმცა მისი გადარჩენა ვერ მოხერხდა. ექიმების თქმით, გოგონას სამედიცინო დაწესებულებაში შეყვანის დროს სიცოცხლის ნიშანწყალი არ ეტყობოდა.
ერთ-ერთი ვერსიით, "მის ერაყის" ტიტულის აღების შემდეგ ტარა ფარესს დევნიდნენ და ემუქრებოდნენ, რის გამოც ის ქუჩაში პრაქტიკულად არ გამოდიოდა. არსებული ცნობით, მკვლელობამდე რამდენიმე საათით ადრე, ის მძევლად ჰყავდათ აყვანილი და აწამეს.
1972 წლის შემდეგ ერაყში სილამაზის კონკურსი პირველად 2015 წელს ჩატარდა. როგორც ზემოთ აღვნიშნეთ, კონკურსში ტარა ფარესმა გაიმარჯვა. მაშინ ის 19 წლის იყო. კონკურსში მონაწილეობის გამო გოგონას ოჯახს მუდმივად ემუქრებოდნენ, რომ თუ ამ გადაწყვეტილებას მიიღებდა, აუცილებლად მოკლავდნენ, რადგან მისი ქმედება შარიათის კანონებს ეწინააღმდეგებოდა.
ასეთი წნეხის მიუხედავად, მან გარისკა და გაიმარჯვა კიდეც. თუმცა ტარას ფართო საზოგადოების წინაშე გამოჩენას ერაყელი რადიკალებისგან ისეთი მწვავე რეაქციები მოჰყვა, რომ მალე მოდელი იძულებული გახდა, საცხოვრებლად ევროპაში გადასულიყო. მისი გარემოცვა ამბობდა, რომ გოგონას იქ ცხოვრება ძალიან უმძიმდა და რამდენიმე წლის შემდეგ ისევ სამშობლოში დაბრუნდა.
ტარა ფარესი ზოგჯერ უცხოეთში გამართულ მოდის ჩვენებებშიც მონაწილეობდა და ამავდროულად სილამაზესა და ქალის უფლებებზე ინტერნეტბლოგს უძღვებოდა... მას "ინსტაგრამის" გვერდზე 3 მილიონამდე გამომწერი ყავდა. ადგილობრივი მედია წერს, რომ ის თავდამსხმელების სამიზნე სწორედ ინტერნეტში განთავსებული თამამი ფოტოების გამო გახდა.
ტარა ფარესის ოჯახი ქურთისტანის დედაქალაქ ერბილიდან იყო. გოგონა სამშობლოში დაბრუნების შემდეგ სწორედ თავის ქალაქში ცხოვრობდა, სადაც რამდენიმე ბრენდის სახე იყო. ამის გამო ბაღდადში ჩასვლა ხშირად უწევდა... სწორედ ერთ-ერთი შეხვედრაზე მიმავალს დახვდნენ და სამი ტყვია ესროლეს - თავისა და მკერდის არეში.
