რა ხდება იუსტიციის სახლთან, სადაც ტაქსის მძღოლების გრძელი რიგი დგას

იუსტიციის სახლში ტაქსის მძღოლების გრძელი რიგი დგას. მძღოლებს ტაქსის საქმიანობის ლიცენზიის მისაღებად რეგისტრაციის გავლა სურთ.

როგორც „ინტერპრესნიუსს“ ტაქსის მძღოლების ნაწილმა განუცხადა, გრძელ რიგში დილიდან დგანან.

ამასთან, სააგენტოს კორესპონდენტის ინფორმაციით, გართულებულია გადაადგილება იუსტიციის სახლის მიმდებარე ტერიტორიაზეც.

ცნობისთვის, 1-ელი ოქტომბრიდან ტაქსების მძღოლებს შესაბამისი ლიცენზიის გარეშე მომსახურების გაწევა ეკრძალებათ. ლიცენზიის გარეშე გადაადგილება კი 200 ლარით დაჯარიმდება.

შეგახსენებთ, რომ ტაქსით მომსახურების ნებართვის აღება მსურველებს მერიის სპეციალურ საიტზე - „თბილისის ტაქსი“, ასევე იუსტიციის სახლსა და 10-ვე რაიონულ გამგეობაში აგვისტოდან შეეძლოთ. რეგისტრაციის ვადა უკვე იწურება. მათ შესაბამისი ნებართვის მისაღებად მხოლოდ 2 დღე დარჩათ.

იხილეთ ვიდეო: "პასუხს არავინ გვცემს, მთელი დღეა ვდგავართ, კატასტროფაა" - ქაოსი და ლიცენზიის აღების მსურველი ტაქსის მძღოლების გრძელი რიგი იუსტიციის სახლში