ბიზნესისა და ტექნოლოგიების უნივერსიტეტში სტუდენტებისთვის ბლოკჩეინ ლაბორატორია გაიხსნა

ბიზნესისა და ტექნოლოგიების უნივერსიტეტში უახლესი ტექნოლოგიებით აღჭურვილი Bitfury-ის ლაბორატორია გაიხსნა. ლაბორატორია სტუდენტებს ბლოკჩეინ სისტემების დეველოპმენტის მიმართულებით სწავლებისა და გადამზადების შესაძლებლობას სთავაზობს. გარდა ამისა, ახლადგახსნილ სივრცეში გაიმართება სემინარები და ვორქშოპები. სტუდენტები საკუთარი მაღალტექნოლოგიური სტარტაპების განვითარებას უკეთესად შეძლებენ.

როგორც უნივერსტიტეტში განმარტავენ, ლაბორატორიის გახსნა არის ძალიან დიდი გეგმების დასაწყისი, რომლის განხორციელებაც უახლოეს პერიოდში დაიწყება. ბლოკჩეინ სისტემას დღეს მსოფლიოს მოწინავე ორგანიზაციები იყენებენ და ამიერიდან ის ბიზნესისა და ტექნოლოგიების უნივერსიტეტის სტუდენტებისთვისაც ხელმისაწვდომი იქნება.

უნივერსიტეტის რექტორის ანდრო რურუას განმარტებით, ლაბორატორიის გახნა სტუდენტებს ახალ, უნიკალურ შესაძლებლობებს სთავაზობს.

„Bitfury-ის ლაბორატორია სტუდენტებს ცოდნის გაღრმავების საშუალებას მისცემს. ბლოკჩეინ ტექნოლოგიები, რომლებიც დღეს მსოფლიოში ყველაზე ინოვაციური მიმართულებაა, ამიერიდან ჩვენთანაც ხელმოსაწვდომი იქნება. მას სტუდენტები საკუთარი სტარტაპების შესაქმნელად და გასავითარებად გამოიყენებენ. მეორე მხრივ კი, მსოფლიოში არსებულ უახლეს ტექნოლოგიურ მიმართულებებსა და სიახლეებს სისტემატიურად გაეცნობიან,“ - განაცხადა ანდრო რურუამ.

ლაბორატორიის გახსნით კმაყოფილები არიან სტუდენტებიც. გეგა თათულიშვილის თქმით, სიახლე მათ ახალი პროექტების განხორციელებაში მნიშვნელოვნად დაეხმარება.

„მოხარული ვარ, რომ გაიხსნა ლაბორატორია, რომელიც მთელი რეგიონის მასშტაბით ყველაზე ინოვაციური და მაღალი ტექნოლოგიებით აღჭურვილია. ეს მნიშვნელოვანია როგორც ჩვენთვის, სტუდენტებისთვის, ისე მთელი ქვეყნისთვის,“ - აღნიშნა გეგა თათულიშვილმა.

Bitfury-ის და ბიზნესისა და ტექნოლოგიების უნივერსიტეტს შორის თანამშრომლობა მიმდინარე წლის დასაწყისში დაიწყო. ლაბორატორიის გახსნა კი ამ თანამშრომლობის მეორე ეტაპია. Bitfury-ის საქართველოში წარმომადგენლის ეფრემ ურუმაშვილის განმარტებით, ამ დროისთვის Bitfury-ში 200-მდე ქართველია დასაქმებული და ლაბორატორიის გახსნა ამ პროცესს დიდად შეუწყობს ხელს.

„ბიზნესისა და ტექნოლოგიების უნივერსიტეტი რეგიონში ყველაზე მოწინავე და მაღალტექნოლოგიური უნივერსიტეტია და სწორედ ამიტომ გადავწყვიტეთ მასთან თანამშრომლობა. თანამშრომლობა მოხდება როგორც კადრების გადამზადების კუთხით, ისე ინოვაციების გაზიარების მიმართულებით. დარწმუნებული ვარ, რომ ეს ყველაფერი ქართულ საგანმანათლებლო სფეროში ინოვაციური ტექნოლოგიების შემოტანის კუთხით ძალიან მნიშვნელოვანი იქნება. ბიზნესისა და ტექნოლოგიენის უნივერსიტეტს კი ვუყურებთ, როგორც ჩვენი სამომავლო პროექტების პარტნიორს,“ - განაცხადა ეფრემ ურუმაშვილმა.

Bitfury-ისა და ბიზნესისა და ტექნოლოგიების უნივერსიტეტს შორის არსებული თანამშრომლობის შედეგია ისიც, რომ უნივერსიტეტის კურსდამთავრებულების დიპლომების შენახვა ბოლქჩეინ სისტემაში მოხდება. ლაბორატორიის გახნა კი მათი თანამშრომლობის მეორე ეტაპია.