მნიშვნელოვანი ინფორმაცია
18
ივნისიდღის ზოგადი ასტროლოგიური პროგნოზი
მნიშვნელოვანი ინფორმაცია
მკითხველის რჩევით
კვირის კითხვადი სტატიები
თვის კითხვადი სტატიები
ასევე დაგაინტერესებთ
"მოსწავლეები ტანსაცმლის ბრენდებში არ ეჯიბრებიან..." - რატომ შეჰყავთ მშობლებს შვილები კერძო სკოლაში
10:16 / 21-09-2018
სასკოლო ასაკის დადგომისთანავე ოჯახის მთავარი საზრუნავი ისეთი სკოლის შერჩევაა, სადაც ბავშვი კარგ და ხარისხიან განათლებას მიიღებს. ბოლო წლებში სულ უფრო იზრდება მოთხოვნა კერძო სკოლებისადმი, 2017-2018 სასწავლო წელს კერძო სკოლებში მოსწავლეთა რაოდენობამ მნიშვნელოვნად მოიმატა - ამდენი მოსწავლე კერძო სკოლებს 2000 წლიდან მოყოლებული, არც ერთ წელს არ ჰყოლიათ.
კვლევებით დასტურდება, რომ კერძო სკოლის მოსწავლეების განათლების დონე ძირითად შემთხვევაში უფრო მაღალია, თუმცა ისიც არ უნდა დაგვავიწყდეს, რომ კერძო სკოლაში სწავლის საფასურის გადახდა, საშუალო შემოსავლების მქონე ოჯახისთვისაც კი ძალიან რთულია.
AMBEBI.GE შეეცადა გაერკვია, რა კრიტერიუმებით ირჩევენ მშობლები სკოლას და რეალურად, რით განსხვავდება კერძო და საჯარო სკოლები.
„პირველ რიგში, რა თქმა უნდა, მნიშვნელოვანია სწავლის დონე. კერძო სკოლაში მასწავლებელს ბევრად მეტი დრო აქვს თითოეული ბავშვისთვის. მოსწავლეს პირველივე კლასიდან უტარდება უცხო ენების გაკვეთილები. სკოლაში შესვლა ისედაც ერთგვარი სტრესია პატარებისთვის, კერძო სკოლებში კი მაქსიმალურად ცდილობენ ბავშვებს ნებისმიერი უარყოფითი ემოცია თავიდან ააცილონ.
რა თქმა უნდა, ინფრასტრუქტურასაც დიდი მნიშვნელობა აქვს. კერძო სკოლა მეტად დაცულია, არ არის ქაოსური სიტუაცია და მშობლის აზრს მაქსიმალურად ითვალისწინებენ" - აღნიშნავს თამარ გაბისონია, რომელმაც შვილი წელს „ქართულ-ამერიკულ უმაღლეს სკოლაში“ შეიყვანა.
კერძო სკოლების უპირატესობებზე საუბრობს სალომე მახარაძეც, რომელსაც უკვე სამი წელია შვილი „წმინდა გიორგის სახელობის საერთაშორისო სკოლაში“ დაჰყავს. მშობელი აღნიშნავს, რომ განათლების დონესთან ერთად, სკოლაში დიდი ყურადღება ეთმობა მოსწავლის კულტურულ და ფიზიკურ განვითარებას.
"სკოლაში არის დამატებითი წრეები. არჩევანი დიდია: ცურვა, ცეკვა, ხატვა, მუსიკა და რაც ასევე ძალიან მნიშვნელოვანია ჩემთვის, სკოლას აქვს ფორმა. მშობელს ყოველდღე არ უწევს იმაზე ფიქრი, რა ჩააცვას ბავშვს. მოსწავლეები ერთმანეთს ჩაცმის სტილსა და ტანსაცმლის ბრენდებში არ ეჯიბრებიან, რაც საჯარო სკოლის ერთ-ერთი მწვავე პრობლემაა", - ამბობს სალომე მახარაძე.
AMBEBI.GE-ს მიერ გამოკითხული საჯარო სკოლის მოსწავლეების მშობლების ნაწილი სკოლაში სწავლის დონით კმაყოფილია და აცხადებს, რომ პირველივე კლასიდან განათლებაში ფულის გადახდის საჭიროება არ არის. მათი განმარტებით, ბევრი საჯარო სკოლაა, სადაც სწავლის ხარისხი და მასწავლებლების კვალიფიკაცია სრულიად დამაკმაყოფილებელია. ნაწილი კი ამბობს, რომ შესაძლებლობა რომ ჰქონდეს, საჯარო სკოლაში ბავშვს არ ატარებდა.
განათლების ექსპერტი სიმონ ჯანაშია AMBEBI.GE-სთან საუბრისას ამბობს, რომ საჯარო სკოლების უმრავლესობის მთავარი პრობლემა ინფრასტრუქტურა, მოუწესრიგებელი საპირფარეშოები და არაკვალიფიციური კადრებია.
"უამრავი პრობლემაა საჯარო სკოლებში: უმრავლეს შემთხვევაში, სკოლის ბაზაზე არ არსებობს ლაბორატორიები, სპორტული დარბაზები, მოედნები. იქაც კი, სადაც სკოლას გარე სივრცის გამოყენების შესაძლებლობა აქვს, აუთვისებელია და სპორტული მეცადინეობები თითქმის ამოღებულია სასწავლო პროცესიდან. საჯარო სკოლებს განვითარებაში ზედმეტი ბარიერები უშლის ხელს.
ძალიან ჭირს სკოლაში კადრების შეცვლა. სამინისტრო დირექტორებს არაფორმალურად მიუთითებს, რომ მასწავლებელი არ გაათავისუფლოს. თუმცა მიუხედავად ამისა, ვერ ვიტყვით რომ კერძო სკოლა კარგი განათლების მიღების ერთადერთი გზაა. საბედნიეროდ, არსებობს ისეთი საჯარო სკოლებიც, სადაც მასწავლებლების უმრავლესობა ძალიან კვალიფიციურია და ხშირად ეს პედაგოგები კერძო სკოლებშიც ასწავლიან, გადიან გადამზადებას და ვითარდებიან" - აცხადებს სიმონ ჯანაშია.
ექსპერტის თქმით, ISET-ის მიერ ჩატარებული ბოლო კვლევით, კერძო და საჯარო სკოლის მოსწავლეებს შორის განათლების დონეში მნიშვნელოვანი განსხვავება არ გამოვლინდა.
"ჩვენ ბევრი საჯარო სკოლის მოსწავლის ძალიან წარმატებული მაგალითი გვინახავს და მათი მიღწევები ხშირად არაფრით ჩამოუვარდება კერძო სკოლის მოსწავლეების მიღწევებს. თუმცა, მიუხედავად ამისა, კერძო სკოლებში საჯაროსთან შედარებით, უფრო მრავალფეროვანი პროგრამებია, შემეცნებითი გარემოა, უფრო მეტი კლუბია. კერძო სკოლაში, როგორც წესი ბავშვები უფრო მოტივირებულები არიან, საჯაროში კი, ხშირად კარგი მოსწავლე იჩაგრება მხოლოდ იმიტომ, რომ კლასში ბავშვების მიერ ცუდი სწავლა უფრო წახალისებულია.
კერძო სკოლის არჩევისას მშობლები ხშირად ყურადღებას აქცევენ სოციალურ გარემოს, მნიშვნელოვანია ბავშვი როგორ წრეში ვითარდება. უნდა ითქვას, რომ სოციალური კავშირები არანაკლებ მნიშვნელოვანია ვიდრე ცოდნა, ეს ასეა არამხოლოდ საქართველოში და განსაკუთრებით საქართველოში.
თუმცა, აღსანიშნავია ისიც, რომ კერძო სკოლების ნაწილში შვილის შესახებ ზუსტი სურათის დანახვა ჭირს. მიზეზი კი ისაა, რომ სკოლას, რა თქმა უნდა, არ სურს მოსწავლის დაკარგვა. რის გამოც ხშირად ხდება მათი ნიშნებით წახალისება. თუმცა მსგავსი შემთხვევებისგან დაზღვეული არც საჯარო სკოლაში ვართ. ამიტომ მშობლის ჩართულობა ნებისმიერ შემთხვევაში ძალიან მნიშვნელოვანია, იმისთვის რომ შვილის მიღწევების და პრობლემების შესახებ საქმის კურსში ვიყოთ", - აღნიშნავს განათლების ექსპერტი.
საქართველოს სტატისტიკის ეროვნული სამსახურის მონაცემებით, ქვეყანაში 223 კერძო და 2085 საჯარო სკოლაა. 518 038 მოსწავლე - საჯარო, 57 143 კი კერძო სკოლაში სწავლობს.
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
რა მიზეზით იბარებენ ხელმეორედ საგამოძიებო კომისიაზე ოპოზიციონერ პოლიტიკოსებს და როგორია მხარეთა პოზიციები
კვირის კითხვადი სტატიები
მნიშვნელოვანი ინფორმაცია
მკითხველის რჩევით
