სან დიეგოს სახელმწიფო უნივერსიტეტმა ახალი სასწავლო წლის დაწყების საზეიმო ცერემონიას უმასპინძლა

სან დიეგოს სახელმწიფო უნივერსიტეტმა ახალი სასწავლო წლის დაწყების საზეიმო ცერემონიას უმასპინძლა. სპეციალურად ამ ცერემონიისთვის საქართველოს სან დიეგოს სახელმწიფო უნივერსიტეტის მეცხრე, მუდმივი პრეზიდენტი, ადელა დე ლა ტორე და ამერიკელი პროფესორების დელეგაცია ეწვია.

წელს, სან დიეგოს სახელმწიფო უნივერსიტეტმა მეოთხე ნაკადი მიიღო. ამერიკულ საბაკალავრო პროგრამებზე საქართველოში 230 სტუდენტი ჩაირიცხა. მათ შორის არიან საერთაშორისო და ადგილობრივი სამეცნიერო ოლიმპიადების გამარჯვებულები და სტუდენტები უმაღლესი ქულებით ეროვნულ გამოცდებზე. აღსანიშნავია, რომ სტუდენტთა დაახლოებით 40% გოგონაა.

როგორც უნივერსიტეტში აცხადებენ, აკადემიური წლის დაწყების ოფიციალური ცერემონია საუნივერსიტეტო კარიერის დასაწყისის აღსანიშნავი დღეა. ეს ცერემონია ასევე ამყარებს ისეთ ინსტიტუციურ ღირებულებებს, როგორიცაა განსწავლულობა, მოქალაქეობა და ლიდერობა.

სან დიეგოს სახელმწიფო უნივერსიტეტის მეცხრე, მუდმივმა პრეზიდენტმა, ადელა დე ლა ტორემ პირველკურსელებს მიმართა და მათ საუნივერსიტეტო ცხოვრების დაწყება მიულოცა:

„კიდევ ერთი მიზეზი იმისა, თუ რატომ არიან დაინტერესებულნი თქვენი სტუდენტები იმით, რომ აითვისონ საინჟინრო და ტექნოლოგიური დარგები და იყვნენ სან-დიეგოს უნივერსიტეტის ნაწილი, არის ის, რომ ჩვენ გვაქვს განსაკუთრებული ფაკულტეტი და ჩვენ შევქმენით მოდელი, რომლის ფარგლებშიც ფაკულტეტი და ადგილობრივი ინსტიტუტი თანამშრომლობენ ერთმანეთთან, ეს კი დინამიურ გარემოს ქმნის სწავლებისთვის. გარდა ამისა, საინჟინრო და ტექნოლოგიური დარგები მსოფლიოს მასშტაბით მნიშვნელოვანია ეკონომიკური განვითარებისთვის და სამუშაოს მიღების შესაძლებლობებისთვის. კიდევ ერთი მომენტი, რომელსაც ხაზი მინდა გავუსვა, არის საერთაშორისო აკრედიტაცია, რომელიც საქართველოს მთავრობის მხარდაჭერითაა მიღებული. მათ, ვინც საქართველოში სან-დიეგოს უნივერსიტეტს დაამთავრებენ, ექნებათ დიპლომი, რომლის გამოყენება მსოფლიოს მასშტაბით იქნება შესაძლებელი. ჩვენს სტუდენტებს ესმით, თუ რა შესაძლებლობები ექნებათ მომავალში სან-დიეგოს უნივერსიტეტში მიღებულ ხარისხთან ერთად. საქართველოდან 14 სტუდენტი იყო მიღებული ამ პროგრამაში. ვიმედოვნებთ, რომ ეს შესანიშნავი თანამშრომლობა გაგრძელდება“, - განაცხადა ჟურნალისტებთან საუბრისას ადელა დე ლა ტორემ.

ღონისძიებას ასევე ესწრებოდნენ საქართველოს ვიცე-პრემიერი, რეგიონული განვითარებისა და ინფრასტრუქტურის მინისტრი მაია ცქიტიშვილი; განათლების, მეცნიერების, კულტურისა და სპორტის მინისტრი მიხეილ ბატიაშვილი; აშშ-ის ელჩის მოვალეობის შემსრულებელი საქართველოში ელიზაბეთ რუდი; ათასწლეულის გამოწვევის კორპორაციის ოპერაციების აღმასრულებელი დირექტორი ჯონათან ნეში და ათასწლეულის გამოწვევის ფონდის აღმასრულებელი დირექტორი მაგდა მაღრაძე.

სან დიეგოს სახელმწიფო უნივერსიტეტი (SDSU) ასწლიანი ისტორიის მქონე ამერიკული უნივერსიტეტია. ის ერთ-ერთი ყველაზე მოთხოვნადი უმაღლესი სასწავლებელია კალიფორნიაში. SDSU, აშშ-ის ათასწლეულის გამოწვევის კორპორაციის (MCC) მეორე კომპაქტის ფინანსური მხარდაჭერით, საქართველოში 2015 წლიდან სთავაზობს მაღალი ხარისხის, საერთაშორისო აკრედიტაციის მქონე საბაკალავრო პროგრამებს საინჟინრო და ტექნოლოგიურ (STEM) დარგებში.

აღსანიშნავია, რომ სან დიეგოს სახელმწიფო უნივერსიტეტი საქართველოს კურსდამთავრებულები მიიღებენ ამერიკულ დიპლომს. აღნიშნული პროგრამები ხელს შეუწყობს საქართველოში სამშენებლო, საბუნებისმეტყველო და ტექნოლოგიური დარგების განვითარებასა და ქვეყანაში მაღალკვალიფიციური სამუშაო ძალის მომზადებას.