სამჯერ გაზრდილი ხელფასები და სწავლის ახალი მოდელი - რას ითვალისწინებს განათლების რეფორმის 5 მიმართულება

2019 წლიდან 50, ხოლო 2023 წლიდან 2000-ზე მეტ საჯარო სკოლაში სწავლის ახალი მოდელი დაინერგება. როგორც პრემიერ-მინისტრმა მამუკა ბახტაძემ იყალთოს სამონასტრო კომპლექსში განათლების სისტემის რეფორმის პრეზენტაციაზე განაცხადა, ყველა სკოლა საქართველოში უნდა იყოს უმაღლესი სტანდარტის.

„დღეს სამწუხაროდ, სკოლამდელი განათლება არ არის საერთო განათლების სისტემის ნაწილი, რაც არის ძალიან დიდი შეცდომა და ამ შეცდომას აუცილებლად გამოვასწორებთ. რეფორმირებული სკოლა ორიენტირებული იქნება მოსწავლის პიროვნულ განვითარებაზე, ინოვაციურობაზე, ინკლუზიურობაზე, ეროვნულ და კულტურულ ფასეულობებზე. 2019 წელს დავიწყებთ 50 სკოლით და ეტაპობრივად მოვახდენთ ჩვენს სკოლებში სწავლის ახალი მოდელის დანერგვას, ხოლო 2023 წლისთვის 2000-ზე მეტ სკოლაში სრულად იქნება დანერგილი ეს მოდელი. ჩვენ საქართველოში არ გვსურს ვიხილოთ რამდენიმე ან რამდენიმე ათეული პრესტიჟული სკოლა. ყველა სკოლა საქართველოში უნდა იყოს უმაღლესი სტანდარტის. რეფორმის შედეგად მივიღებთ სკოლის ახალ მოდელს, რომელიც იქნება საუკეთესო საერთაშორისო გამოცდილების შერწყმა ქართულ რეალობასთან და ქართულ სამეცნიერო თუ პედაგოგიურ გამოცდილებასთან“, - განაცხადა ბახტაძემ.

მისი თქმით, გადაიხედება მასწავლებლების სახელფასო პოლიტიკა.

„პირველ ეტაპზე, 2018-2019 წლის სასწავლო წლის განმავლობაში გაზრდილ ხელფასს მიიღებს დაახლოებით 10 000-მდე მასწავლებელი. 2022 წლისთვის ჩვენი ამოცანაა, რომ დასაქმებული მასწავლებლის საშუალო ხელფასი გაიზარდოს სამჯერ“, - აღნიშნა პრემიერმა.

როგორც ბახტაძე განმარტავს, ძლიერ თანამედროვე სკოლაში აუცილებლად იქნება უსაფრთხო და ჯანსაღი გარემო. ამასთან, მისივე თქმით, ახალი სკოლის დირექტორი უნდა იყოს ლიდერი, რომელიც მართავს სკოლას მართვის ახალი მოდელით.

„სკოლაში დაინერგება სწავლების ახალი მეთოდოლოგია, რომლის საფუძველზე ასწავლიან გადამზადებული მასწავლებლები. ამასთან ერთად, სკოლებს მიეცემა თავისუფლება გარკვეული საგნების მეთოდოლოგიის სწავლების ნაწილში. სკოლის ინფრასტრუქტურა უნდა განახლდეს და უნდა პასუხობდეს ახალ მიზნებსა და ამოცანებს. დღეს გარემო იცვლება სწრაფად. ასეთი დინამიკის პირობებში იმისთვის, რომ მოზარდმა წარმატებას მიაღწიოს, მისი განვითარება უნდა იყოს ამ ცვლილებების ადეკვატური. შესაბამისად, აუცილებელია სკოლა მოსწავლეს აძლევდეს სისტემურ განათლებას, ასწავლიდეს შემოქმედებით და კრიტიკულ აზროვნებას, ინოვაციურ მიდგომებს. რა თქმა უნდა, თანამედროვე ძლიერი სკოლა უნდა უყალიბებდეს მოსწავლეს ეროვნულ და კულტურულ ფასეულობებს, დემოკრატიულ და ტოლერანტულ ღირებულებებს, უვითარებდეს საკვანძო და პერსონალურ უნარ-ჩვევებს. ძლიერი და თანამედროვე ახალი სკოლა უნდა ეფუძნებოდეს ტექნოლოგიებს. შესაბამისად, სკოლა უნდა ვითარდებოდეს ტექნოლოგიების განვითარების კვალდაკვალ“, - აღნიშნა ბახტაძემ.

მისივე განცხადებით, განათლების რეფორმა განხორციელდება 5 მიმართულებით: ადრეული და სკოლამდელი განათლება, ზოგადი განათლება, პროფესიული განათლება, უმაღლესი განათლება და მეცნიერება.

რაც შეეხება სკოლამდელ განათლებას, მისი თქმით, უმნიშვნელოვანესია ბავშვის განვითარება ნებისმიერ ასაკში და შესაბამისად, სკოლამდელ განათლებას დაეთმობა განსაკუთრებული ყურადღება, რადგან განათლება ადრეული ასაკიდან აისახება განვითარების შემდგომ საფეხურებზე.

ამასთან, როგორც ბახტაძე აცხადებს, პროფესიული განათლება იქნება ერთ-ერთი ყველაზე მნიშვნელოვანი მიმართულება რეფორმაში.

„ის ორიენტირებული იქნება რეგიონული განვითარების საჭიროებებზე და სწრაფ დასაქმებაზე. ჩვენი ამოცანა იქნება, უმოკლეს პერიოდში გავზარდოთ სტუდენტების რაოდენობა რეგიონებში და განვავითაროთ პროფესიული განათლების ცენტრები.

უმაღლესი განათლების მიმართულებით გვექნება დაფინანსების ახალი მოდელი; მოხდება ინტეგრაცია ევროპულ უმაღლესი განათლების სივრცეში. როდესაც ჩვენ ვსაუბრობთ საქართველოს, როგორც რეგიონული განვითარების ცენტრის შესახებ, ერთ-ერთი მთავარი მიმართულებაა საქართველოს ისტორიული როლი - იყოს რეგიონის ცენტრი და ამავდროულად, განათლების ცენტრი ჩვენი ფართო რეგიონისთვის“, - აღნიშნა პრემიერმა.

საქართველოს მთავრობა განათლების რეფორმის ფარგლებში განსაზღვრული პროექტების განსახორციელებლად რესურსების მობილიზებას იწყებს. როგორც პრემიერ-მინისტრმა მამუკა ბახტაძემ განაცხადა, ამ რესურსებს მიწოდებას განახორციელებს როგორც სამთავრობო ისე კერძო სექტორი.

„ჩვენ ასევე ვიწყებთ რესურსების მობილიზაციას ამ დიდი პროექტების განსახორციელებლად. ამ რესურსების მოწოდებას მოახდენს როგორც სამთავრობო, ისე კერძო სექტორი, რომელიც უკვე გამოხატავს თავის მზაობას განათლების რეფორმაში მონაწილეობისთვის. უნდა ვახსენოთ ისიც, რომ ამ მიმართულებით გვაქვს საერთაშორისო ორგანიზაციების სრული მხარდაჭერა“, - განაცხადა ბახტაძემ.

მისივე თქმით, 2018-2023 წლებში მოხდება იმ ძირითადი ბირთვის დანერგვა, რომელიც ჩვენს საგანმათლებლო სისტემას სინქრონიზაციაში მოიყვანს ევროპული განათლების სისტემასთან.

განათლების, მეცნიერების, კულტურისა და სპორტის მინისტრის, მიხეილ ბატიაშვილის განცხადებით, განათლების რეფორმა მასწავლებლების, სპეციალური მასწავლებლების, სკოლის დირექტორებისა და ადმინისტრაციის სახელფასო პოლიტიკის ცვლილებას ითვალისწინებს.

როგორც მინისტრმა განათლების რეფორმის პრეზენტაციაზე აღნიშნა, 2018-2019 სასწავლო წელს გაზრდილ ხელფასს მიიღებს 10 000-მდე მასწავლებელი, მათ შორის, სპეც. მასწავლებელი.

მისივე თქმით, 2019-2021 წლებში ხელფასები გაეზრდებათ სკოლის დირექტორებს, ადმინისტრაციულ პერსონალს და გაგრძელდება ხელფასების ზრდა მასწავლებლებისთვის. როგორც ბატიაშვილმა აღნიშნა, 2022 წლისთვის კი მასწავლებლის საშუალო ხელფასი მიაღწევს 1500 ლარს, ხოლო უმაღლესი საფეხურის მასწავლებლების ხელფასი - 2000 ლარს და მეტს.

ამასთან, 2020 წლისთვის ერთიანი ეროვნული გამოცდების ახალი სისტემის დანერგვა იქნება შესაძლებელი.

მისივე თქმით, მოხდება არსებული ეროვნული გამოცდების სისტემის შეფასება საერთაშორისო პარტნიორებთან ერთად.

„შესაბამისად, სისტემის ახალი მოდელის დანერგვა 2020 წლისთვის იქნება შესაძლებელი“, - განაცხადა მინისტრმა.

ამასთან, როგორც ბატიაშვილმა აღნიშნა, განათლების რეფორმა ზოგადი განათლების მიმართულებით სკოლების ახალ მოდელს ითვალისწინებს.

„პირველ რიგში, მნიშვნელოვანია, მოსწავლეზე ორიენტირებული, ცვლილებებზე სწრაფად ადაპტირებადი სკოლა სისტემურად, ერთიანად ვითარდებოდეს მისი ყველა კომპონენტის გათვალისწინებით. სკოლის ახალი მოდელი ითვალისწინებს სკოლის დირექტორს, როგორც ლიდერს, მართვისა და სწავლების ახალ მოდელებს, გადამზადებულ პედაგოგებსა და განახლებულ ინფრასტრუქტურას, ერთიან სასწავლო და ლაბორატორიულ პლატფორმას და უმნიშვნელოვანეს კომპონენტებს - სკოლაში ჯანსაღი ცხოვრების წესის დამკვიდრებას და უსაფრთხო გარემოს შექმნას, რისთვისაც არაერთი პროექტი განხორციელდება“, - განაცხადა მიხეილ ბატიაშვილმა.