"მუნიციპალური საპარკინგე ადგილები, ე.წ. სტაიანშჩიკებს აქვთ ჩაკეტილი..." - რა სიახლეებს გეგმავს მერია 2019 წლიდან

ხშირია შემთხვევები, როდესაც კომერციული ფართის ფლობელებს ან „სტაიანშჩიკებს“ მუნიციპალური საპარკინგე ადგილები, რომლითაც უნდა ისარგებლოს თითოეულმა ჩვენგანმა, მიზანმიმართულად აქვთ ჩაკეტილი და იყენებენ სათავისოდ, - ამის შესახებ დედაქალაქის მერმა კახა კალაძემ თბილისის მთავრობის სხდომაზე განაცხადა.

კალაძის თქმით, მისთვის ეს მიდგომა კატეგორიულად მიუღებელია. თბილისის მერმა ზედამხედველობის საქალაქო სამსახურს აღნიშნული პრობლემის მოგვარება დაავალა.

„მინდა, ზედამხედველობის საქალაქო სამსახურს დავავალო, რაც შეიძლება მალე მოწესრიგდეს ეს ყველაფერი. ადამიანებს, ვინც მართლაც პატიოსნად იღებს პარკირების წლიურ აბონიმენტს, ელემენტარულად იმის საშუალება არ აქვთ, რომ მანქანა გააჩერონ სპეციალურად ჩახერგილი, ჩაკეტილი ადგილების გამო. ეს მიდგომა კატეგორიულად მიუღებელია და ჩვენ ამას არავითარ შემთხვევაში არ დავუშვებთ. ამიტომ ვიქონიოთ მყისიერი რეაგირება, თუ მოსაშლელია, მოშალეთ ეს სპეციალურად დაყენებული ბარიერები. ეს არის ჩვეულებრივი სამართალდარღვევა და იმოქმედეთ კანონის ფარგლებში.

რაც შეეხება ე.წ. სტაიანშჩიკებს, ხშირია შემთხვევა, რომ ეს ადამიანები, თუ მათ მძღოლი ფულს არ გადაუხდის, არ აძლევენ პარკირების საშუალებას. ესეც კატეგორიულად მიუღებელია და ყველაფერი გააკეთეთ იმისთვის, რომ ეს ყველაფერი მოწესრიგდეს. არავის აქვს უფლება მინიციპალურ საპარკინგე ადგილებზე, რომლისთვისაც ადამიანები საფასურს იხდიან, შეზღუდოს მანქანის გაჩერების უფლება. დროული რეაგირება მოახდინეთ ამასთან დაკავშირებით,“ - განაცხადა კახა კალაძემ.

მერის თქმით, 2019 წლიდან ამოქმედდება პარკირების ახალი მოდელი, რომელიც ზონალურ პარკირებას ითვალისწინებს. პარკირების ახალი მოდელი სატრანსპორტო პოლიტიკის ფარგლებში შემუშავდა.

„ახალი მოდელი ითვალისწინებს ზონალურ პარკირებას, რაც კანონპროექტის სახით უკვე მომზადებული გვაქვს და გადავუგზავნით პარლამენტს. მგონია, რომ ამ რეფორმის განხორციელება ძალიან მნიშვნელოვანია და ეს არის ნაწილი იმ სატრანსპორტო პოლიტიკის, რომელიც ჩვენ რამდენიმე ხნის წინ წარმოვადგინეთ“,- აღნიშნა კალაძემ.

ამასთან, დედაქალაქის მერმა პარკირების პროცესში არსებულ ხარვეზებზეც ისაუბრა, მათ შორის შეეხო პარკინგის ადგილებზე ეკონომიკური საქმიანობის წარმოებას, რაც კალაძის შეფასებით, კანონდარღვევაა.

კახა კალაძემ მერიის შესაბამის სამსახურებს აღნიშნულ საკითხზე რეაგირება დაავალა.

„ეკონომიკურად აქტიურ ზონებში, განსაკუთრებით, ტურისტულ ზონებში ძალიან ხშირია მუნიციპალურ პარკინგზე ისეთი სატრანსპორტო თუ სხვა მოძრავი საშუალებების განთავსების შემთხვევები, რომლებიც გამოყენებულია ეკონომიკური საქმიანობისთვის. ალბათ, ყველას შეგიმჩნევიათ მისაბმელიანი მანქანები უყენიათ საპარკინგე ადგილებზე და იქ აქვთ მოწყობილი ხშირ შემთხვევაში ტურისტული კომპანიები, ვიზების გაცემაც ხდება ხშირ შემთხვევაში. ეს არის ჩვეულებრივი ეკონომიკური საქმიანობა. პარკინგი თავისი შინაარსით არის იმისთვის, რომ მოქალაქემ ისარგებლოს და პარკირება განახორციელოს. ესეც, კანონით თუ მივუდგებით შეზღუდულია, შესაბამისად, აქაც რეაგირება განახორციელეთ, იმოქმედეთ, რომ ადამიანებს მიეცეთ იმის შესაძლებლობა ისარგებლონ მუნიციპალური პარკინგით. ჩვენ ძალიან ბევრი ადგილი გვაქვს ქალაქში, სადაც შესაძლებელია ეკონომიკური საქმიანობა. თუ ვინმე ფიქრობს, რომ რაიმე ხარვეზი გამონახა კანონში ამ ამ თვალსაზრისით და შეუძლია მისაბმელიანი ავტომობილით დადგეს და იქ ეკონომიკური საქმიანობა გასწიოს, ეს ასე არ არის. თქვენ კანონი გავალდებულებთ, რომ გამოწეროთ ჯარიმები და განახორციელეთ ეს დაჯარიმებები“,- განაცხადა კალაძემ.