7
ივნისიდღის ზოგადი ასტროლოგიური პროგნოზი
რუსეთის დელეგაციის სამი წევრი საქართველოში „ოკუპირებული ტერიტორიების“ შესახებ კანონის დარღვევის გამო არ შემოუშვეს.
შინაგან საქმეთა სამინისტროს ინფორმაციით, საქართველოში შემოსვლაზე უარი რუსეთის სახელმწიფო საინფორმაციო სააგენტო "იტარტასის" სამხედრო კორესპონდენტ ვიქტორ ლიტოვკინს, საზოგადოების მკვლევართა ასოციაციის საერთაშორისო საბჭოს პრეზიდენტ გენადი ბორდიუგოვსა და НТВ-ს ჟურნალისტ ალექსანდრ ტოკარევს ეთქვათ.
როგორც ცნობილია, თბილისში რუსეთის პრეზიდენტის ფონდის მიერ დაფინანსებული მედიაკონფერენცია მიმდინარეობს, რომელზე დასასწრებადაც მოდიოდნენ რუსეთის დელეგაციის წევრები. “რადიო თავისუფლების” ცნობით, მედიაკონფერენციაზე მოწვეული სტუმრები, ძირითადად, რუსეთის სახელმწიფო მედიასაშუალებების წარმომადგენლები არიან, რომელთა მთავარი ფუნქციაა ანტიდასავლური პროპაგანდა.
ერთ-ერთი ყველაზე ცნობილი ფიგურა, ТАСС-ის სამხედრო მიმომხილველი, რუსეთის შეიარაღებული ძალების გადადგმარი პოლკოვნიკი, ვიქტორ ლიტოვკინი, რომელიც საქართველოში არ შემოუშვეს, არც ისე დიდი ხნის წინ, საქართველოს ნატო-ში გაწევრებასთან დაკავშირებით, აცხადებდა, რომ "ეს მხოლოდ იმ შემთხვევაში მოხდება, თუ საქართველო აფხაზეთსა და ოსეთზე იტყოდა უარს, სხვა შემთხვევაში, ქართველი პოლიტიკოსებისა და ნატოს მაღალჩინოსნების განცხადებები მხოლოდ რიტორიკაა..."
antimaidan.ru-სთან საუბარში ლიტოვკინი საქართველოს "სტაფილოს გამოკიდებულ ვირს ადარებს" და ამბობს, რომ ნატო-ს ალიანსი ჩვეულებრივი ბიუროკრატიული ორგანიზაციაა და მხოლოდ ამერიკის პრობლემების მოგვარებას ემსახურება.
კიდევ ერთი სტუმარი, პროფესორი და ისტორიკოსი, გენადი ბორდიუგოვი, რომელიც თბილისში უნდა ჩამოსულიყო, სომხურ მედიასთან საუბარში იმედს გამოთქვამდა, რომ თბილისი აფხაზეთისა და ე.წ. სამხრეთ ოსეთის დაკარგვას ოდესმე შეეგუება.
“მე ვიცი რა ვითარებაც არის აფხაზეთსა და სამხრეთ ოსეთში, - ამ ქვეყნებისთვის მთავარია დამოუკიდებლობის შენარჩუნება... რუსეთმა ამის შანსი მისცა. შესაძლოა, ოდესმე რამე შეიცვალოს, თუმცა, მგონია, რომ ქართველი პოლიტიკური ლიდერები ამას ოდესმე შეეგუებიან და გაიგებენ, რომ უკვე არაფრის შეცვლა არ შეიძლება და ამ რეალობით ჩვენ ევრაზიულ ინტეგრაციას დავუბრუნდებით. დარწმუნებული ვარ, ამ კავშირის დახმარებით, საქართველო უამრავი პრობლემის მოგვარებას შეძლებს” - აცხადებდა airo-xxi.ru-სთან საუბარში ბორდიუგოვი.
რაც შეეხება ტოკარევს, ის AMBEBI.GE-ს ინფორმაციით, არა НТВ-ს ჟურნალისტი ალექსანდრ ტოკარევი, არამედ ექსპერტი ალექსანდრ ტოკარევია. ის აპროტესტებს ქართული მხარის გადაწყვეტილებას საქართველოში არშეშვებაზე და ამბობს, რომ შეცდომა მოხდა. თუმცა, მისი ფეისბუქის გვერდიდან ირკვევა, რომ ტოკარევი არაერთხელ არის ნამყოფი აფხაზეთში, რისი დამადასტურებელი ფოტოები სოციალურ ქსელშიც აქვს განთავსებული.
