პარიზში რუს ტურისტებს მილიონი ევროს ღირებულების ძვირფასეულობა გასტაცეს

პარიზის გარეუბანში უცნობმა პირებმა სამ რუს ტურისტს მილიონი ევროს ღირებულების ძვირფასეულობა გასტაცეს. ამის შესახებ რადიო Europe1 იუწყება.

მისი ინფორმაციით, რუსი ტურისტები ლე ბურჟეს აეროპორტში ნიციდან ჩაფრინდნენ, რომელიც კერძო თვითმფრინავებისა და მდიდარ ტურისტებთან მომუშავე ავიაკომპანიების რეისებს ემსახურება.

„აეროპორტიდან რუსი ტურისტები დაქირავებული ავტომობილით პარიზში მიემართებოდნენ, როდესაც მათ გზა გადაუკეტა ავტომობილმა, რომლიდანაც 4 ნიღბიანი პირი გადმოვიდა. ბოროტმოქმედებმა ტურისტებს 3 ჩემოდანი, 1 ჩანთა და მობილური ტელეფონები წაართვეს. დაზარალებულთა განცხადებით, წართმეული ქონების, მათ შორის ძვირფასეულობის ღირებულება 1 მილიონ ევროს შეადგენს“, - იუწყება რადიო Europe1.