ნორვეგიელმა მინისტრმა თანამდებობა დატოვა, რომ ცოლს კარიერაში დაეხმაროს

ნორვეგიის ტრანსპორტის მინისტრი კეტილ სოლვიკ-ოლსენი თანამდებობიდან გადადგა, რათა ცოლს კარიერულ წინსვლაში ხელი შეუწყოს. „ევრონიუსის“ ინფორმაციით, მინისტრის ცოლს სამედიცინო კარიერის გაგრძელება აშშ-ში შესთავაზეს.

სოლვიკ-ოლსენმა საკუთარი გადაწყვეტილების შესახებ „ფეისბუქზე“ დაწერა. მინისტრის თქმით, ძალიან ბედნიერია, რომ ჰქონდა კარგი სამსახური, ახლა კი დადგა დრო, ოცნებები მისმა ცოლმა აისრულოს.

მისივე განცხადებით, აშშ-ში საცხოვრებლად ერთი წლით გადავა, მისი ცოლი კი ალაბამას ბავშვთა საავადმყოფოში იმუშავებს.

სოციალური ქსელების მომხმარებლების დიდმა ნაწილმა მინისტრის გადაწყვეტილება გენდერული თანასწორობის გამარჯვებად შეაფასა.