თინა ბოკუჩავა თეა წულუკიანის შესახებ - მას მხოლოდ პირადი ღვარძლით მოქმედება შეუძლია...

თეა წულუკიანს უწყებათაშორისი კომისია სადამსჯელო ორგანოდ აქვს ქცეული, წულუკიანი ვერ ახორციელებს იმ უფლებამოსილებას, რაც კანონით აქვს მინიჭებული, - ამის შესახებ „ინტერპრესნიუსს“ „ნაციონალური მოძრაობის“ წევრმა თინა ბოკუჩავამ განუცხადა.

მისი თქმით, კანონის მიხედვით, კომისიის თავმჯდომარე უნდა იყოს აპოლიტიკური და მიუკერძოებელი და არ უნდა იცავდეს რომელიმე კონკრეტული პარტიის ინტერესებს, თუმცა თეა წულუკიანი მხოლოდ „ქართული ოცნების“ ინტერესებიდან გამომდინარე მოქმედებს.

„წულუკიანი ვერ ახორციელებს იმ უფლებამოსილებას, რაც კანონით აქვს მინიჭებული. სწორედ ამიტომ, „ნაციონალური მოძრაობა“ დიდი ხანია საუბრობს, რომ უწყებათაშორისი კომისია უნდა გადავიდეს სხვა ხელმძღვანელის ხელში, რადგან წულუკიანს არ შეუძლია მიუკერძოებლად, ქვეყნის ინტერესებიდან გამომდინარე მოქმედებდეს. მას მხოლოდ პირადი ღვარძლის, ბოღმის და ვიწრო პოლიტიკური ხედვიდან მოქმედება შეუძლია. ეს კომისია წარსულში იყო უშიშროების საბჭოს ქვეშ“, - განაცხადა ბოკუჩავამ.

მისივე თქმით, უწყებათაშორის კომისიას წულუკიანი არ უნდა ხელმძღვანელობდეს.

„ქართულმა ოცნებამ“ როდესაც დაიწყო პრეზიდენტის ინსტიტუტის გამოშიგვნა, ერთ-ერთი ნაბიჯი იყო, რომ უშიშროების საბჭოსთვის წაერთმიათ ეს კომისია. კომისია ისეთი ტიპის უწყებაში უნდა გადასულიყო, რომელსაც დამოუკიდებლობის მეტი ხარისხი ექნებოდა. თუ სახელმწიფო ინსტიტუტები ვერ ასრულებენ ჯეროვნად თავის საქმეს, მაშინ შესაძლებელია საერთაშორისო ორგანიზაციებმა გადაიბარონ ამ კომისიის ხელმძღანელობა დროებით მაინც, სანამ „ოცნების“ მთავრობა მოტივირებულია არა სამართლიანი არჩევნების ჩატარებაზე, არამედ იმისკენ, რომ რაც შეიძლება მეტი ხრიკი მოიფიქრონ არჩევნების გასაყალბებლად. „ქართულ ოცნებას“ თეა წულუკიანის სახით ჰყავს პერსონა, რომელიც ყველაფერზე თვალებს დახუჭავს და გაამართლებს ყოველგვარ უკანონობას და უმსგავსობას“, - განაცხადა ბოკუჩავამ.