"ქორწინებაში ყოველთვის სამნი ვიყავით..." - პრინცესა დაიანა კამილასთან დაპირისპირების შესახებ ღიად საუბრობდა

მთელი ცხოვრების განმავლობაში კორნვოლის ჰერცოგინია განიხილებოდა, როგორც პრინცესა დაიანასა და პრინცი ჩარლზის ქორწინებაში მესამე ადამიანი. თუმცა, მისი ურთიერთობა ჩარლზთან, რომელიც ოთხი ათწლეულია გრძელდება, უფრო მეტია, ვიდრე სკანდალური რომანი. ახლა ისინი დაქორწინებულები არიან, თუმცა წლების განმავლობაში უამრავი დრამის და სკანდალის გადატანა მოუხდათ, რომ სიყვარული შეენარჩუნებინათ.

პრინცმა ჩარლზმა და კამილა შანდმა ერთმანეთი 1970 წელს გაიცნეს, ცხენბურთის მატჩზე. ისინი პირველივე დღეს მოიხიბლნენ ერთმანეთით და შეხვედრები მალევე დაიწყეს. 1971 წელს ჩარლზს სამხედრო სამსახურში მოუხდა წასვლა, რამაც მათი განშორება გამოიწვია.

1973 წლის ივლისში კამილა ენდრიუ პარკერ ბოულზზე დაქორწინდა, მისი ქმარი ბრიტანეთის არმიის ოფიცერი იყო, რომელიც კამილამდე პრინც ჩარლზის დას, პრინცესა ანას ხვდებოდა. კამილას მეგობარმა, მსახიობმა ლინ რედგრეივმა ერთ-ერთ ინტერვიუში განაცხადა, რომ კორნვოლის ჰერცოგინიას ახალგაზრდობისას სურდა ჰყოლოდა მდიდარი ქმარი და მისი მიზანი სწორედ ეს იყო.

1977 წელს პრინცმა ჩარლზმა 16 წლის ლედი დაიანა სპენსერი გაიცნო. ამ დროს ის დაიანას უფროს დას, ლედი სარა მაკორქუოდეილს ხვდებოდა. ჩარლზმა სარასთან ურთიერთობა შეწყვიტა და 1980 წელს რომანი დაიანასთან გააბა. როგორც ლედი დის ბიოგრაფი ენდრიუ მორტონი წერს, ჩარლზის გამო დებს შორის ურთიერთობა არ შეცვლილა. სარა ამბობდა, რომ მან გააცნო დაიანა და ჩარლზი ერთმანეთს და ურთიერთობაში კუპიდონის როლი ითამაშა.

1981 წლის 6 თებერვალს ჩარლზმა დაიანას ხელი სთხოვა, წყვილი 29 ივლისს დაქორწინდა. ქორწილი ზღაპრული იყო, დაიანას საქორწინო კაბა დღემდე საკულტოდ რჩება. იმის მიუხედავად, რომ პატარძალს არ სურდა, ქორწილს კამილაც დასწრებოდა, ღონისძიებაზე პარკერ-ბოულზი მაინც იმყოფებოდა. ერთი წლის შემდეგ, 1982 წლის 21 ივნისს დაიანას და ჩარლზს შვილი შეეძინა, პრინცი უილიამი. 2 წლის შემდეგ, 1984 წლის 15 სექტემბერს კი პრინცი ჰარი დაიბადა.

იმის მიუხედავად, რომ ორივეს ოჯახი ჰყავდა, კამილასა და ჩარლზის რომანი კვლავ გრძელდებოდა.

1989 წელს დაიანა კამილას დაუპირისპირდა. ის დარწმუნდა, რომ ჩარლზი და კამილა კვლავ ერთად იყვნენ, გადაწყვიტა, წასულიყო პარკერ-ბოულზის დის დაბადების დღეზე და ქმრის საყვარელს პირისპირ დალაპარაკებოდა.

არავინ იცოდა, რომ წვეულებაზე პრინცესა გამოჩნდებოდა, ის არც არავის დაუპატიჟია. დაიანა ღონისძიებაზე მოულოდნელად მივიდა და ჩარლზს, კამილას და მათ კიდევ ერთ თანამოსაუბრეს საუბარი შეაწყვეტინა. წვეულებაზე მომხდარის შესახებ თავად დაიანამ ისაუბრა.

„ბიჭებო, რამდენიმე სიტყვა მაქვს კამილასთვის სათქმელი და ერთ წუთში დავბრუნდები,“ - უთხრა პრინცესამ ჩარლზსა და მასთან ერთად მყოფ მამაკაცს.

დაიანა ამბობს, რომ კამილასთან საუბრისას მაქსიმალურად შეეცადა, სრული სიმშვიდე შეენარჩუნებინა. მან პარკერ-ბოულზს უთხრა, რომ ყველაფერი იცოდა ქმართან მისი რომანის შესახებ.

კამილას პასუხს კი დაიანა „საინტერესოს“ უწოდებს.

„მან მითხრა, რომ ყველაფერი მქონდა, რაც კი მინდოდა. მსოფლიოს ყველა მამაკაცი ჩემზე იყო შეყვარებული, მყავდა ორი არაჩვეულებრივი შვილი და რა მინდოდა მეტი?! მე ვუპასუხე, რომ ჩემი ქმარი მსურდა,“ - ამბობს დაიანა მორტონთან.

1992 წლის ნოემბერში ჟურნალისტებმა გაავრცელეს ჩარლზისა და კამილას ინტიმური სატელეფონო საუბრის ჩანაწერები. ტაბლოიდებმა მასალას მოგვიანებით „კამილაგეითი“ უწოდეს. ერთი თვის შემდეგ პრემიერ-მინისტრმა ჯონ მეიჯორმა დაიანასა და ჩარლზის დაშორების შესახებ განაცხადა.

განქორწინებიდან 2 წლის შემდეგ ჩარლზმა დაადასტურა, რომ ის კამილას ხვდებოდა, თუმცა, აქვე აღნიშნა, რომ ცდილობდა დაიანას ერთგული დარჩენილიყო, ვიდრე ქორწინების შენარჩუნება შეუძლებელი გახდა.

1995 წელს კამილამ და მისმა ქმარმა ენდრიუმ განქორწინების შესახებ ოფიციალურად განაცხადეს, ისინი ბოლო 2 წლის განმავლობაში ცალ-ცალკე ცხოვრობდნენ.

ქორწინების ბოლო წლებში სასიყვარულო რომანები ჰქონდა დაიანასაც. ის ხვდებოდა ცნობილ ცხენბურთელს ჯეიმს ჰიუიტს.

ცნობილ ინტერვიუში მარტინ ბაშირთან დაიანამ განაცხადა, რომ ჩარლზს კამილას ფოტოები ჯერ კიდევ თაფლობის თვეში უპოვა, მათი ოჯახი კი „სამი ადამიანისგან შედგებოდა“.

1997 წელს დაიანა ტრაგიკულად გარდაიცვალა პარიზში, ავარიის შედეგად. ლონდონში სახალხო გლოვა გაიმართა, ქუჩები ყვავილებით აივსო. დაკრძალვაზე პრინცი ჩარლზი ოჯახის წევრებთან ერთად იმყოფებოდა.

პრინცესას გარდაცვალებიდან ერთი წლის შემდეგ ჩარლზმა კამილა შვილებს ოფიციალურად გააცნო. 1999 წელს კი წყვილი ოფიციალურად გამოჩნდა კამილას დის დაბადების დღეზე ლონდონში. წვეულებაზე ისინი ცალცალკე მივიდნენ, თუმცა სასტუმრო ერთად დატოვეს.

იმის მიუხედავად, რომ კამილას ურთიერთობა ჩარლზის შვილებთან ნელ-ნელა ყალიბდებოდა, მას დედოფალ ელისაბედთან გაცნობა ჯერ კიდევ წინ ჰქონდა. დედოფალმა უარი თქვა დასწრებოდა ჩარლზის დაბადების დღეს, როდესაც ის 50 წლის გახდა, რადგან კამილასთან შეხვედრა არ სურდა.

2000 წელს ელისაბედი და მისი შვილის საყვარელი ქალი ერთმანეთს შეხვდნენ. პრინცისა და კამილას ურთიერთობა სულ უფრო სერიოზულ სახეს იღებდა, 2005 წელს ისინი დაინიშნენ, ამავე წლის 9 აპრილს კი დაქორწინდნენ. ჩარლზის მეჯვარე მისი შვილი, უილიამი იყო. ქორწილს კამილას ყოფილი ქმარი და მისი ახალი ცოლიც ესწრებოდნენ. ცერემონიალზე არ იმყოფებოდნენ დედოფალი ელისაბედი და მისი ქმარი, პრინცი ფილიპი.

კამილასა და ჩარლზის შვილების ურთიერთობა თავდაპირველად საკმაოდ დაძაბული იყო. უილიამმა და ჰარიმ მამის საყვარელი ქალი არც ისე თბილად მიიღეს, თუმცა პარკერ-ბოულზმა შეძლო, ბიჭებთან ურთიერთობა დაელაგებინა.

ჩარლზისა და კამილას დაქორწინების შემდეგ ჰარიმ ინტერვიუში აღნიშნა, რომ მისი დედინაცვალი შესანიშნავი ქალია, რომელმაც მათი მამა ძალიან გააბედნიერა და ეს „ყველაზე მნიშვნელოვანია“.

კამილას საკმაოდ თბილი ურთიერთობა აქვს უილიამის ცოლთან, ქეით მიდლტონთანაც.