ანგელა მერკელი - ევროპული მხრიდან ძალიან სწრაფ, ნაჩქარევ დაპირებებს ვერ მოგცემთ

ევროპული მხრიდან ძალიან სწრაფ, ნაჩქარევ დაპირებებს ვერ მოგცემთ, - ამის შესახებ გერმანიის ფედერალურმა კანცლერმა ანგელა მერკელმა თბილისის სახელმწიფო უნივერისტეტში სტუდენტებთან შეხვედრაზე საქართველოს ევროკავშირში გაწევრიანების პერსპექტივის შესახებ დასმული შეკითხვის საპასუხოდ განაცხადა.

მერკელის თქმით, ჯერჯერობით, საქართველოს ევროკავშირში გაწევრიანებაზე საუბარი არ არის და ნელ-ნელა სწორედ ამ თემაზე საუბრამდე მისვლა უნდა მოხდეს. ანგელა მერკელმა აღნიშნა, რომ ეს პროცესი 5 წელიწადში ვერ დასრულდება.

“ძალიან გახსნილად მინდა გითხრათ, რომ მე მიხარია და მხარს ვუჭერ საქართველოს ევროპულ ამბიციებს, ამიტომ არსებობს ასოცირების შეთანხმება, ამიტომ არსებობს თავისუფალი ვაჭრობის შეთანხმება, მაგრამ ასევე ევროპული მხრიდან ძალიან სწრაფ, ნაჩქარევ დაპირებებს ვერ მოგცემთ. ეს ნიშნავს, რომ ერთი მხრივ ქვეყანა, რომელიც არის გაწევრიანების კანდიდატი, უნდა ასრულებდეს გარკვეულ წინაპირობებს და ევროკავშირს უნდა შესწევდეს უნარი ახალი ქვეყნების მიღების. დღესდღეობით, თქვენ იცით, რომ ევროკავშირის გაწევრიანების პროცესში დასავლეთ ბალკანეთის ქვეყნები გვყავს პერსპექტივაში. დიდი ბრიტანეთი სულ მალე დატოვებს ევროკავშირს, დარჩება 27 ქვეყანა, ბალკანეთის ქვეყნების ჩათვლით, ალბათ, 35 გახდება. ძალიან მოქნილი სტრუქტურა უნდა არსებობდეს, როგორ შეიძლება პოლიტიკის უფრო ძლიერად და კოორდინირებულად აწყობა, განსაკუთრებით, ევროპული უსაფრთხოების სივრცე, რადგან ძალიან რთულია, საშუალოდ, გრძელვადიანი პერსპექტივით რაღაც გადაწყვეტილების მიღება. საქართველო და უკრაინა იქნება შემდეგი რგოლი მათი გამოკვეთილი ევროპული პერსპექტივიდან გამომდინარე. ჯერჯერობით არ არის საუბარი გაწევრიანებაზე. ნელ- ნელა, ეტაპობრივად უნდა მივიდეთ საუბარზე, უბრალოდ საუბარზე, რომ გაწევრიანებაზე ვისაუბროთ. მე ვერ ვიტყვი, რომ 5 წელიწადში ეს პროცესი დასრულდება, თუმცა ჩემი ვიზიტის მიზანია, მათ შორის ამაზე გახსნილად საუბარი. საერთო ფასეულობები, თავისუფალი ვაჭრობის შეთანხმება, ბევრად უფრო მჭიდრო ეკონომიკური თანამშრომლობის პერსპექტივები ჩნდება - ეს უნდა გაგრძელდეს. ასევე ის ეკონომიკური ზრდა, რომელიც საქართველოს აქვს, ეს ინკლუზიური ზრდა, რომელშიც ყველა ადამიანმა უნდა მიიღოს მონაწილეობა, ასევე უთანასწორობა, ასევე სიღარიბესთან ბრძოლა და სოციალური უსაფრთხოების ქსელები და მრავალი სხვა ფაქტორი, რომელიც ამაში უნდა იყოს ჩართული, ძალიან მნიშვნელოვანია ამ ყველაფრის კარგად გააზრება, გაზიარება და ამის ერთმანეთთან ჰარმონიზაციაში მოყვანა”, - განაცხადა გერმანიის კანცლერმა.

გერმანიის კანცლერს სტუდენტებმა გერმანია-რუსეთის გაზსადენის მშენებლობასთან დაკავაშირებითაც დაუსვეს შეკითხვა. კერძოდ, შეკითხვა შეეხებოდა იმას, ანგელა მერკელმა რუსეთის პრეზიდენტთან შეხვედრაზე მიიღო თუ არა გარანტიები, რომ პუტინი ამ მილსადენს პოლიტიკური მიზნებისთვის არ გამოიყენებს.

ანგელა მერკელის თქმით, ათწლეულებია აქვს ეკონომიკური ურთიერთობა რუსეთთან, მათ შორის CO2–ის შემცირების მხრივ. აღნიშნულის შედეგად, ნაკლებ ნახშირს გამოიყენებენ და CO2–ის შესამცირებლად იდეალური დონე ასე სწრაფად ვერ მიიღწევა, ამიტომ, გაზი აუცილებელია.

„გაზი მიწის ქვეშ გადის ბელორუსში, უკრაინაში, პოლონეთში, ასევე „ჩრდილოეთ დინება“ ერთი და ორი, ასევე სამხრეთ კორიდორი. პარალელურად, ჩვენ ასევე აზერბაიჯანთან გვაქვს თანამშრომლობა. ყველაზე მნიშვნელოვანია, პოლიტიკური ზემოქმედება მაქსიმალურად შემცირდეს. ვიმსჯელოთ იმაზე, რომ უკრაინას ჰქონდეს სამართლებრივი და სამართლიანი პრეტენზია ტრანზიტზე. საერთო ჯამში, ეს „ნორდსტრიმის“ პროექტი დამოკიდებულია მათ შორის იმაზე, რომ გარკვეული ნაწილი განთავსდება რუსეთში და ყველაფერი მთლიანობაში გამარტივდება. პარალელურად, გერმანიაში ჩვენ ვემზადებით ე.წ. ენერგი ტერმინალის ასაშენებლად. რუსეთზე მაქსიმალურად დამოკიდებულების შესამცირებლად. გაზი მოდის დიდი ბრიტანეთიდან, ჰოლანდიიდან, ნორვეგიიდან, რუსეთიდან. ეს ყველაფერი „ნორდსტრიმ“ ერთი და ორით რადიკალურად არ შეიცვლება. რა თქმა უნდა, უკრაინა დარჩება ტრანზიტული ქვეყანა ამ თვალსაზრისით. შეიძლება სხვაგვარად შევხედოთ, რომ პუტინს აქვს ინტერესი გაყიდოს გაზი ევროპაში. ეს ნიშნავს, რომ ჩვენ ვუთხრათ, კეთილი ინებოს და პოლიტიკურად მინიმალური სტანდარტები დააკმაყოფილოს, ანდა დავაკმაყოფილოთ პუტინის თითოეული სურვილი. ამას არ გავაკეთებთ. ჩვენ გავაკეთებთ იმას, რაც შედის საერთო ევროპპულ ინტერესში“, – განაცხადა მერკელმა.