„მერკელის კავკასიური ტურნე პუტინისთვის სიგნალია“ - ასეთი სათაურით ეხმაურება გერმანული გამოცემა Die Welt ქვეყნის კანცლერის ანგელა მერკელის საქართველოში, სომხეთსა და აზერბაიჯანში დაგეგმილ ვიზიტს.
„მიუხედავად იმისა, რომ „ჩრდილოეთი ნაკადი-2“ გაზსადენის მშენებლობის გამო, გერმანია რუსეთზე ხდება დამოკიდებული, მერკელის ვიზიტმა, შესაძლოა, ეს შეცვალოს“, - წერს Die Welt.
გამოცემის მტკიცებით, საქართველოს რეგიონების ოკუპაციისა და მთიან ყარაბაღში არსებული დაძაბულობის ფონზე, მერკელს სურს აჩვენოს, რომ ევროპა არ დატოვებს უპასუხოდ რუსეთის ქმედებებს მის ძველ უკანა ეზოში.
„მერკელის პირველი გაჩერება თბილისი იქნება. საქართველო რეგიონის ქვეყნებს შორის ყველაზე მეტად მიისწრაფვის დასავლეთისკენ და ეს პროცესი უკვე 20 წელიწადზე მეტი გრძელდება. ევროკავშირი საქართველოს ყველაზე მნიშვნელოვანი სავაჭრო პარტნიორია, საქართველო უვიზო რეჟიმითა და ასოცირების შეთანხმებით სარგებლობს. თუმცა, ბევრმა ქართველმა გერმანიაში დაუსაბუთებლად მოითხოვა თავშესაფარი, კრიმინალურ საქმიანობაში ქართველების ჩართულობის მაჩვენებელიც საშუალოზე მაღალია. სავარაუდოდ, მერკელი ამ საკითხზეც ისაუბრებს“, - წერს გამოცემა.