"შენი ტურისტი რომ არ უნდა გაძარცვო, ეს ქართველმა უნდა გვასწავლოს?" - რას პასუხობენ რუსები და აფხაზები სერგეი შამბას განცხადებას

აფხაზეთის ე.წ. ყოფილი პრემიერ-მინისტრი, ყოფილი საგარეო საქმეთა მინისტრი, თავდაცვის მინისტრის ყოფილი მოადგილე და ახლა უბრალოდ, ოპოზიციონერი სერგეი შამბა, "მეზობელ საქართველოსთან" საუბრისა და ურთიერთობების მოგვარების აუცილებლობაზე საუბრობს და ამბობს, რომ ეს იყო ეთნიკური კონფლიქტი, რომელიც ოდესღაც ევროპის სხვა ქვეყნებშიც ხდებოდა.

"ქართველები მტრად არ მიმაჩნია. საქართველოში მეგობრები მყავს. კი, გვქონდა ეთნიკური კონფლიქტიც, მაგრამ დიდწილად ეს პოლიტიკური კონფლიქტი იყო. პირველმა დავიწყე საუბარი იმასთან დაკავშირებით, რომ დროა, რამენაირად დავიწყოთ დიალოგი და ერთობლივ მომავალზე ვიფიქროთ იმ გაგებით, რომ მეზობელი ერები ვართ და ჩვენი მეზობლობა ბედისწერით არის განპირობებული..." - თქვა შამბამ Эхо Москвы-სთვის მიცემულ ინტერვიუში.

რუსულ გამოცემასთან ინტერვიუში ის აცხადებს, რომ თავის დროზე, ფედერაციულ ურთიერთობებზე იყვნენ მზად, მოლაპარაკებების პროცესში კონფედერაციის ვარიანტიც განიხილებოდა და "ერთობლივი სახელმწიფოს" მოდელიც, თუმცა, ქართველები ყველა პროექტზე უარს ამბობდნენ.

შამბას ინტერვიუს მაშინვე მოჰყვა გამოხმაურება ოკუპირებულ აფხაზეთსა და რუსეთში. აფხაზების ერთი ნაწილის შეფასებით - "ეს არის გამოუვალ მდგომარეობაში ჩავარდნილი ქვეყნის წარმომადგენლის ირიბი თხოვნა, ან რუსეთმა უფრო მეტად მოგვხედოს ან ქართველები წამოვიდნენ დათმობაზეო."

ირინა წვიჟბა, სოხუმი: "მართალია შამბა. მე პოლიტიკოსი არ ვარ და არც ვიცი, საქართველო რამდენად წამოვა მეზობლურ ურთიერთობაზე, მაგრამ რაღაც გზები უნდა მოინახოს, კედლის აღმართვა არაფერს მოგვიტანს... მე ჩემი ქვეყნის პატრიოტი ვარ, მის სიყვარულს ვერავინ მასწავლის, მაგრამ ასე გაგრძელება არ შეიძლება. ომზე მეტი ახალგაზრდა ნარკოტიკით და ავტოავარიით დაგვეხოცა. როდემდე ვუყუროთ საკუთარ სიკვდილს?"

მერაბ სუხუმსკი: "რა უნდა შამბას, მეტი ყურადღება გვჭირდებაო, ეუბნება რუსეთს? თქვენ არ ვარგიხართო - გვეუბნებიან ისინი... კვირიდან კვირამდე სანაპიროდან ნაგავი არ გააქვთ, რუსეთია ამაში დამნაშავე? შენივე ტურისტი რომ არ უნდა გაძარცვო, ეს ქართველმა უნდა გასწავლოს? ბათუმზე ლაპარაკობს შამბა - ბათუმი ევროპაა, შუაგული ევროპა, იქ პოლიციაა, მაშველები სანაპიროებს არ სცილდებიან, ხალხზე ზრუნავენ, რატომ ვედრებით?"

ლია ბარციცი: "ბატონო შამბა, ჩვენც ვიცით ეს ყველაფერი, მაგრამ თავის დროზე რა გააკეთეთ? რატომ არ დაამყარეთ თურქეთთან უფრო ახლო ეკონომიკური ურთიერთობა, რატომ არ გახვედით ევროპაში, თუნდაც რუსული კარით? რატომ ვერ მიაღწიეთ იმას, კანონს ძალა ჰქონდეს?.. მე არ მინდა ამ ჭაობში სიკვდილი, ამიტომაც ვყიდი სახლს და მივდივარ..."

მადინა ბგანბა: "წლევანდელი სეზონიც შარშანდელივით მკვდარი იყო. ჯერ იყო და ივნისში ლამის მოთოვა, თან, რუსეთის რამდენიმე ქალაქში ფეხბურთის მსოფლიო ჩემპიონატი გაიმართა და ვინც კი ჩვენთან ჩამოსვლას აპირებდა, ლამის ყველამ გააუქმა ვიზიტი. ამას დაემატა ტურისტული კომპანიების ონლაინ თაღლითობა, რუსები ჩამოვიდნენ, მაგრამ მოტყუებული დარჩნენ და ზოგი აქ სასტუმროში გადაანაწილეს, ზოგიც უკან გაუშვეს... ივლისში სულ რაღაც ათი დღე ცხელოდა, მაგრამ დამსვენებლებს მაწანწალა ძაღლებმა არ მისცეს სანაპიროზე გასვლის საშუალება... ამას დაემატა, ე.წ. დრესკოდი - ზღვისპირა ქალაქებში საცურაო კოსტიუმებით გადაადგილების აკრძალვა... ერთმა რუსმა მითხრა - რა გინდათ აფხაზებს, რით ვერ ჩამოყალიბდით ეს 26 წელი, ბარემ თქვით - გვაცადეთ, რომ ჩვენთვის ჩუმად დავიხოცოთ და აღარ შეგაწუხოთო..."

ინტერნეტგამოცემა eadaily.com-ს ცნობით, აფხაზეთი მერამდენე წელია კრასნოდარის მხარესთან აგებს. რუსი ექსპერტების თქმით, აფხაზეთში რუსი ტურისტების შემცირებამ კატასტროფულად იმოქმედა ადგილობრივ ეკონომიკაზე, თუმცა, ამის მიუხედავად ადგილობრივმა მოსახლეობამ რუს დამსვენებელთან ურთიერთობისთვის "ოქროს შუალედი" ვერ იპოვა.

"ომის დასრულების პირველ წლებში მართლაც მიაწყდნენ რუსი დამსვენებლები აფხაზეთს, შემდეგ, დროთა განმავლობაში მათი გემოვნებაც შეიცვალა და მოთხოვნებიც. იმავე ფასში, 100%-იანი უსაფრთხოების გარანტიით ისვენებენ თურქეთში, ერთობიან, მათზე ზრუნავენ, უფრთხილდებიან, აქვთ მაღალი დონის ინფრასტრუქტურა, სამედიცინო, თუნდაც სასწრაფო დახმარების სერვისი...

აფხაზეთში უფრო ის კატეგორია ჩადიოდა, ვისაც საბჭოთა წლების ნოსტალგია ჰქონდა. სხვები უფრო მაღალბიუჯეტიან დასვენებას ამჯობინებდა... ეს ყველაფერი აფხაზეთში ვერა და ვერ გათვალეს და გააცნობიერეს. ასე წააგო აფხაზეთმა კონკურენტთან", - აცხადებს ტურისტული კომპანია Роза ветров-ის დირექტორი ირინა გლაზკოვა. სხვა ტურისტული კომპანიების ხელმძღვანელობის თქმით, აფხაზეთი ამ დრომდე რჩება მხოლოდ ბუნების, მთებისა და ზღვის "იმედად", ამიტომაც მის მიმართ ინტერესი თანდათან შემცირდა.