"სუს-ში თავის აფეთქებასთან დაკავშირებით განცხადება ემოციურ ფონზე გავაკეთე" - მაჩალიკაშვილი "მოდულში" მივიდა

მალხაზ მაჩალიკაშვილი მიიჩნევს, რომ იმ განცხადებაში, რომელიც მან 31 მაისს აქციაზე გააკეთა, არავითარი დანაშაულის ნიშნები არ იკვეთება. როგორც მაჩალიკაშვილმა ჟურნალისტებს, სუს-ში, დაკითხვაზე შესვლამდე განუცხადა, განცხადება ემოციურ ფონზე გააკეთა.

"იმ განცხადებაში, რაც მე გავაკეთე, არავითარი დანაშაული არ იკვეთება. ეს განცხადება ემოციურ ფონზე გავაკეთე. მე არც მიფიქრია და არც მქონია ასეთი რამ გულში. ჩემს ადგილას სხვა უფრო მეტსაც იტყოდა. სამი თვის შემდეგ ჩემი დაკითხვა იმიტომ ხდება, რომ ყველანაირად ცდილობენ რაღაც ზღაპარი შეთხზან და რაღაც გამოიგონონ", - განაცხადა მალხაზ მაჩალიკაშვილმა.

იხილეთ ვიდეო: "ემოციურ ნიადაგზე გავაკეთე განცხადება" - მალხაზ მაჩალიკაშვილის დაკითხვა სუს-ში

კითხვაზე: რამდენად გამორიცხავს, რომ პასუხისგებაში მისცენ, მალხაზ მაჩალიკაშვილის თქმით, ეს მისთვის სულერთია.

"როგორი მოლოდინი უნდა მქონდეს?! ეს სამყარო ამათ ჯოჯოხეთად მიქციეს, გინდა აქ ვყოფილვარ და გინდ იქით, სულ ფეხებზე მკიდია უკვე", - განაცხადა მაჩალიკაშვილმა.

მისი ადვოკატის, ქეთევან ჩუთლაშვილის განმარტებით კი მაჩალიკაშვილის სისხლის სამართლებრივ პასუხისმგებლობაზე საუბარი არარელევანტურია.

როგორც ჩუთლაშვილმა ჟურნალისტებს სუს-ში შესვლამდე განუცხადა, მალხაზ მაჩალიკაშვილის განცხადება არავითარი დანაშაულის ნიშნებს არ შეიცავდა. აქედან გამომდინარე, ადვოკატისთვის გაუგებარია, რატომ დაიწყო აღნიშნულ ფაქტზე გამოძიება.

"ამ განცხადებასთან და ზოგადად, გამოძიების მიმდინარეობასთან დაკავშირებით ჩვენი პოზიცია არის ის, რომ თვითონ ბატონი მალხაზის მიერ გაკეთებულ განცხადებაში დანაშაულის ნიშნები არ ჩანდა. აქედან გამომდინარე ვფიქრობთ, რომ გამოძიების დაწყება და საგამოძიებო მოქმედებების განხორციელება არის აბსოლუტურად დაუსაბუთებელი. ეს იყო ემოციურ ფონზე გაკეთებული განცხადებები. ჩვენ ისიც კი არ ვიცით, სისხლის სამართლის კოდექსის რომელი მუხლით არის დაწყებული გამოძიება. ჩვენ ამ დრომდე არ მიგვიღია ინფორმაცია იმის მიუხედავად, რომ გამოძიების თაობაზე მედიაში ინფორმაციის გამოქვეყნებისთანავე მივმართეთ საგამოძიებო ორგანოს და მოვითხოვეთ განემარტათ, სსკ-ის რომელი მუხლით გათვალისწინებულ ფაქტზე მიმდინარეობს გამოძიება, თუმცა საგამოძიებო ორგანოს ამგვარი განმარტება არ გაუკეთებია და შესაბამისად, არანაირ დამატებით ინფორმაციას არ ვფლობთ", - განაცხადა მაჩალიკაშვილის ადვოკატმა.

სუს-ის განმარტებით, მალხაზ მაჩალიკაშვილი დაკითხვაზე აქციაზე გაკეთებული იმ განცხადების გამო დაიბარეს, რომლის თანახმადაც ის სუს-ში შესვლას და თავის აფეთქებას გეგმავდა.