"ის არ აღიარებს ბრალს" - რას ამბობს ადვოკატი მამაკაცზე, რომელსაც 8 შვილი სვანეთში სახლში ჰყავდა გამოკეტილი

მამა, რომელსაც სვანეთში 8 შვილი სახლში ჰყავდა ჩაკეტილი, სამართალდამცველებმა დააკავეს. თუმცა ამირან დევნოზაშვილი წარდგენილ ბრალს არ აღიარებს. ამის შესახებ „ინტერპრესნიუსს“ დევნოზაშვილის ადვოკატმა გოჩა კილასონიამ განუცხადა.

მრავალშვილიან მამას იძულების მუხლით ბრალი უკვე წარედგინა და მას სასამართლომ აღკვეთის ღონისძიების სახით პატიმრობაც შეუფარდა. ადვოკატის ინფორმაციით, პირველი ინსტანციის სასამართლოს გადაწყვეტილება, მან სააპელაციო სასამართლოში გაასაჩივრა, თუმცა სააპელაციო სასამართლომ მისი საჩივარი დაუშვებლად ცნო.

„ის არ აღიარებს ბრალს. არც დუმილის უფლებას იყენებს. დევნოზაშვილი გამოძიებას არ დაუკითხავს. საქმეში მთავარი მტკიცებულებები არის სოციალური მუშაკების ჩვენებები - რომ თითქოს ამირან დევნოზაშვილი არ უშვებს ბავშვებს სახლიდან და თითქოს მაგის გამო არ დადიან ბავშვები სკოლაში. თავად კი მიიჩნევს, რომ ეს არავითარი მტკიცებულება არ არის. ზოგადად, საქმე მოცულობითია, 13 ტომიანია“, - განაცხადა გოჩა კილასონიამ.

შეგახსენებთ, რომ სვანეთში მყოფი ერთ-ერთი ოჯახის შესახებ ინფორმაცია იანვარში გახდა ცნობილი. ადგილობრივი მოსახლეობის ცნობით, ამირან დევნოზაშვილს 8 შვილი - სამი ბიჭი და 5 გოგო ჰყავს. შვილების სახლში გამოკეტვის მიზეზად მამა იმ არგუმენტს ასახელებდა, რომ ისინი საზოგადოებისგან მხოლოდ ცუდს ისწავლიან. ამირან დევნოზაშვილი შსს-მ სისხლის სამართლის კოდექსის 150-ე მუხლით დააკავა, რაც იძულებას გულისხმობს.